ءبىلىم جانە عىلىم ءمينيسترى اسحات ايماعامبەتوۆ وقۋلىقتاعى ولقىلىقتار تۋرالى وقۋلىقتاردىڭ ساپاسى جايلى وتكەن ونلاين جينالىستا حابارلادى.

– وقۋلىقتاردا بۇعان دەيىن پروبلەمالار بولدى. مىسالى، ءبىز وقۋلىقتاردى دايىنداعاندا، ونىڭ مازمۇنىندا بالالارعا ءۇي جۇمىسىن جاساۋ ءۇشىن ينتەرنەتتىڭ سىلتەمەسىن جىبەرىپ، «ەندى وسى سىلتەمەنى اش تا، ءۇي جۇمىسىن جاسا» دەيدى. الايدا بارلىق بالادا بۇل مۇمكىندىك بولمادى عوي. اۋىلداعى بالالار بار، قالاداعى بالالار بار، ءارتۇرلى جاعدايداعى بالالار بار. سوندىقتان ءۇي جۇمىسىن مىندەتتەپ، ينتەرنەت ارقىلى عانا وقي الاتىن ءۇي جۇمىسى بولسا، بالا ونى قالاي ىستەيدى؟! وسىنداي كەمشىلىكتەر مۇلدەم بولماۋى كەرەك.

بالانىڭ جاسىنا، مەملەكەتتىك ءتىل ساياساتىنا ساي ادىستەمەلىك تۇرعىدا وقۋلىقتار دۇرىس بولۋى كەرەك. ەلەكتروندىق وقۋلىقتار تۋرالى دا ماسەلە وتە ماڭىزدى. ول قولجەتىمدى بولۋى كەرەك. سونىمەن قاتار، ولاردىڭ تەگىن بولۋ سۇراعى دا باستى نازاردا، – دەدى مينيستر.

ول تاريح جانە ادەبيەت وقۋلىقتارىنىڭ ولقىلىقتارىن اتاپ ءوتتى.

– ءبىراز ماسەلەلەرگە كوڭىلىمىزدى سالىپ قاراۋىمىز كەرەك. بىرىنشىدەن، تاريح وقۋلىعى بويىنشا ءقازىر ءتيىستى جۇمىس قاراستىرىلىپ جاتىر. قازاقستان تاريحى بويىنشا ورتاق وقۋلىق بولۋى كەرەك. ويتكەنى تاۋەلسىز قازاقستاننىڭ تاريحى بولعاندىقتان، وعان ورتاق باعدارلاما بويىنشا ورتاق وقۋلىق بولۋى كەرەك دەگەن ۇسىنىس بار. ۇسىنىستى قاراستىرىپ، ءتيىستى جۇمىستى جۇرگىزىپ جاتىرمىز.

ەكىنشىدەن، كوركەم ادەبيەت بويىنشا زياتكەر، دارىندى، ءححى عاسىردىڭ وقۋشىسىن قالىپتاستىرامىز دەسەك، بالالاردىڭ ادەبيەتتى وقيتىنداي مۇمكىندىگى بولۋى كەرەك. وعان ءبىز باۋلۋىمىز كەرەك. الايدا "ءبىزدىڭ نارىقتا بالاعا قاجەت ادەبيەت جەتكىلىكتى مە؟" دەگەن سۇراق پايدا بولادى. ونىمەن قوسا، مەكتەپ كىتاپحانالارىنىڭ جاعدايى قالاي؟ ولارعا كوركەم ادەبيەت كىتاپتارى جەتكىلىكتى تۇردە ساتىپ الىنىپ وتىر ما، جوق پا؟ جەتكىلىكتى مە؟ ونىڭ جۇمىس ىستەيتىن فورماتى قانداي؟ بۇل سۇراقتار وتە ماڭىزدى. كوركەم ادەبيەتتى مەكتەپتەرگە الىپ بەرۋ جاعدايى، ونىڭ جەتكىلىكتى بولۋى، دۇنيەجۇزىلىك ادەبيەتتە تانىلعان ادەبيەتتەردىڭ قازاق ءتىلىندى قولجەتىمدى بولۋى – بۇگىنگى كۇننىڭ باستى سۇراقتارىنىڭ ءبىرى.

قازاق ادەبيەتى وقۋلىقتارىنىڭ مازمۇنى، باعدارلاماسى بويىنشا دا ءبىراز سۇراق قويىلىپ جاتىر. "ءبىراز كلاسسيك باعدارلاماعا ەنبەي قالعان" دەگەن سۇراقتار، ءوتىنىش حاتتار ءتۇسىپ جاتىر. سوندىقتان وسى ماسەلە بويىنشا جۇمىس توبىن قۇرىپ، ءتيىستى جۇمىستى ۇيىمداستىرىلادى، – دەدى ايماعامبەتوۆ.