ءبىلىم جانە عىلىم ءمينيسترى اسحات ايماعامبەتوۆ وبلىستىق ءبىلىم باسقارمالارىنىڭ باسشىلارىنا "جاس مامان" جوباسىن جۇيەلى ىسكە اسىرۋدى تاپسىردى. بۇل تۋرالى مينيستر ءبىلىم جانە عىلىم مينيسترلىگىنىڭ اپپاراتتىق وتىرىسىندا مالىمدەدى.

– بايانداما ايتىلعانداي، تۇركىستان وبلىسىندا 16 پايىز، پاۆلوداردا 5 پايىز، ماڭعىستاۋدا 0 پايىز جۇمىس اتقارىلعان. قۇرال-جابدىقتاردى جەتكىزۋ بويىنشا جۇمىس ءتيىستى دەڭگەيدە ەمەس. مىسالى، الماتى وبلىسىندا، جامبىل وبلىسىندا، باسقا وبلىستاردا بۇل جۇمىس مارەسىنە جەتەيىن دەپ قالدى. سوندا نەگە ءبىر وبلىستا جۇمىس جاقسى جۇرەدى؟ ال باسقا وبلىستا جۇمىس دۇرىس دەڭگەيدە ۇيىمداستىرىلماعان؟ تۇسىنىكسىز! – دەدى مينيستر. 

مينيستر اتالعان وبلىستىڭ ءبىلىم باسقارماسى باسشىلارىنا جوبانى جۇيەلى جۇزەگە اسىرۋدى تاپسىردى. 

– "جاس مامان" جوباسى – كاسىپتىك-تەحنيكالىق ءبىلىمدى دامىتۋعا وتە ۇلكەن اسەر ەتەتىنى بەلگىلى. وتە ماڭىزدى جوبا. كوپتەن بەرى وسى جوبا كەرەك دەپ ارىپتەستەرىمىز ارمانداپ جۇرگەن. كوللەدجدەرگە ءتيىستى قۇرىلعىلار، تەحنيكالار جەتىسپەيتىنىن ايتاتىن. ەندى مەملەكەت تاراپىنان قوماقتى قاراجات بەرىلىپ تۇرعان كەزدە ونى ۋاقتىلى ءارى ءتيىمدى پايدالانىپ قالۋىمىز كەرەك.

سوندىقتان تاعى دا قايتالاپ ايتامىن: بۇل جۇمىستى وزدەرىڭىزدىڭ جەكە باقىلاۋلارىڭىزعا الۋ كەرەك. الدە دە ۋاقىت بار. دەسەك تە جىلدىڭ سوڭىنا دەيىن ۋاقىت بولسا دا، بۇل ماسەلەنى قايتادان كوتەرىپ، سىزدەردىڭ نازارىڭىزعا كورسەتۋدى ءجون كوردىك. تاعى دا قايتالاپ ايتامىن. رەسپۋبليكالىق سايتقا اكەلىنىپ جاتقان بارلىق تەحنيكانى، قۇرىلعىلاردىڭ اكتىلەرىن، فوتوسىن كورسەتۋىمىز كەرەك. قابىلداۋدى دا كوميسسيا ارقىلى جۇرگىزىپ، بەرىلگەن قاراجاتتى ءتيىمدى پايدالانۋعا ءتيىسپىز، – دەدى اسحات ايماعامبەتوۆ.

وقي وتىرىڭىز: اسحات ايماعامبەتوۆ: ءقازىر ميعا سىيمايتىن ەسەپ تۇرلەرى بار