جاڭاشىلدىققا قۇمار تاربيە مەكەنى – الماتى مەملەكەتتىك قۋىرشاق تەاترى زامان تالابىنا ساي ءتۇرلى بايلانىس قۇرالدارىن شىعارماشىلىق جاڭالىقتارمەن ۇتىمدى ۇيلەستىرە وتىرىپ كورەرمەندەرمەن جوسپارلى دا جۇيەلى، ساپالى دا پايدالى تىعىز قارىم-قاتىناس جاساۋدى نەگىزگى جۇمىس بارىسىنا اينالدىرىپ وتىر.

تەاتر ۇجىمى قويىلىم ساحنالاۋدا ءوزىنىڭ باعىت-باعدارىن ءتۇرلى جانرلار مەن سان الۋان تاقىرىپتارعا ويىستىرىپ، كورەرمەننىڭ جاس ەرەكشەلىگى مەن قىزىعۋشىلىعىنا قاراي جاڭاشىل تۋىندىلاردى ساحناعا شىعارۋدا. وسى ورايدا، جۋىردا قۋىرشاق تەاترىنىڭ ساحناسىندا اسا كورنەكتى سازگەر ءشامشى قالداياقوۆتىڭ 90 جىلدىق مەرەيتويىنا وراي "ءومىر – وزەن" مۋزىكالىق تەاترلاندىرىلعان قويىلىمى بيىلعى 30 قىركۇيەكتە كورەرمەندەرگە تۇڭعىش رەت جول تارتپاقشى.

عاجايىپ سازى، كوركەم تابيعاتى، ليريكالىق الەمى، نازدىلىق سيپاتىمەن ميلليونداعان تىڭدارماننىڭ جۇرەگىنەن ارداقتى ورىن العان كورنەكتى كومپوزيتور، قازاق ەستراداسىنىڭ نەگىزىن سالۋشى – ءشامشى قالداياقوۆ اندەرىن سپەكتاكل رەجيسسەرى ەركەبۇلان قابدىل بۇگىنگى كۇن كورەرمەندەرىنە لايىقتاپ، تالانت تابيعاتىن ايقىندايتىن وزگەشە قىرلارىن نازىك ەلەمەنتتەرمەن تولىقتىرا، جاڭاشا باعىتتا كورسەتۋدى باستى نازارعا العان. سازگەر اندەرى ارقىلى رەجيسسەر كورەرمەندەرگە ىزگى قاسيەتتەر ماحاببات، سۇيىسپەنشىلىك، وتانشىلدىق، رۋحشىلدىق سىندى رۋحاني قاجەتتىلىكتەردى ءسىڭىرىپ، ۇلتتىق ناقىشپەن نارلەنگەن قازىنالى ازىق سىيلاۋدى ماقسات ەتكەن.

ءان الەمىندەگى ايگىلى تالانت، قازاق ەسترادا ءانىنىڭ قاينار بۇلاعى ىسپەتتەس بولعان ۇمىتىلماس تۋىندىلاردىڭ اۆتورى ءشامشى قالداياقوۆتىڭ وشپەس مۇراسى، ساعىنىش سازى، اسەم الەمىن الماتى مەملەكەتتىك قۋىرشاق تەاترى "ءومىر – وزەن" مۋزىكالىق قويىلىمىندا ۇسىنباقشى. تەاتردىڭ YouTube كانالىندا العاش رەت ونلاين كورسەتىلىمى وتەتىن بولمىسى بولەك پرەمەرادان قاپى قالماڭىز، ءقادىرلى كورەرمەن! 

مادينا تولە