ەلورداداعى باردىڭ كۇزەتشىلەرىنە 19 جاستاعى جىگىتتى ۇردى دەگەن ايىپ تاعىلىپ جاتىر.  بۇل تۋرالى جابىرلەنۋشىنىڭ اناسى الەۋمەتتىك جەلىدە، دالىرەك ايتقاندا باس پروكۋراتۋرانىڭ پاراقشاسىنا جازعان. بۇل تۋرالى tengrinews.kz حابارلادى.

قازىرگى ۋاقىتتا انانىڭ جازباسى باس پروكۋراتۋرانىڭ پاراقشاسىنان وشىرىلگەن.

– تۋعان كۇنىندە، 2020 جىلى 25 قىركۇيەكتە، جۇما كۇنى ۇلىم استانادا بولدى. ول ءوزىنىڭ تۋعان كۇنىن مەيرامحانادا جاقىن دوستارىمەن اتاپ ءوتتى، سول جەردە كەيىنىرەك وسى مەكەمەنىڭ كۇزەتشىسى مەنىڭ ۇلىمدى اياۋسىز ۇرىپ-سوقتى. كەيىنىرەك ءسال ساۋىعىپ كەتىپ، ءوزى پوليسيا وتريادىن شاقىردى، بۇل كەزدە تۇنگى ساعات ەكى شاماسىندا ەدى. سودان كەيىن ونى ۇرىپ-سوعىپ، مۇرنى سىنعان كۇيىندە جالپى اۋرۋحاناعا جەتكىزدى، –  دەدى جابىرلەنۋشىنىڭ اناسى.

نۇر-سۇلتان پوليسياسى بۇل جاعدايعا قاتىستى تومەندەگىدەي تۇسىنىكتەمە بەردى.

"اعىمداعى جىلدىڭ 26 ​​قىركۇيەگىندە ساعات 02.47-دە پوليسياعا ورتالىق كۇزەتشىلەرى تۇران داڭعىلى بويىندا ەكى كەلۋشىگە دەنە جاراقاتىن سالعانى تۋرالى حابارلاما كەلىپ ءتۇستى. ناتيجەسىندە 19 جاستاعى بالا نۇر-سۇلتان قالاسىنىڭ 2ء-شى قالالىق اۋرۋحاناسىنا جەتكىزىلدى. كۇدىكتى  ۇستالدى. اتالعان فاكتى بويىنشا قىلمىستىق كودەكسىنىڭ 293-بابى "بۇزاقىلىق" بويىنشا قىلمىستىق ءىس قوزعالىپ، سوت-مەديسينالىق ساراپتاما تاعايىندالدى" دەلىنگەن پوليسيا حابارلاماسىندا.

سونىمەن قاتار، اكىمشىلىك كودەكستىڭ 425-بابى بويىنشا كارانتيندىك رەجيمدى بۇزعانى ءۇشىن مەكەمە اكىمشىلىگىنە قاتىستى اكىمشىلىك ءىس قوزعالعاندىعى بەلگىلى بولدى.