كۇدىكتى ۋاقىتشا تەرگەۋ اباقتىسىندا وزىنە قول جۇمساماق بولدى. بۇل تۋرالى كتك ارناسى حابارلادى.
كوكشەتاۋدا ەرلى-زايىپتى زەينەتكەرلەردى ءولتىردى دەپ ايىپتالعان 25 جاستاعى ازامات ۋاقىتشا تەرگەۋ اباقتىسىندا سۋيسيد جاساماق بولدى. 1 قازان كۇنى وسى قاندى وقيعاعا قاتىستى سوت پروسەسى باستالۋى كەرەك بولاتىن. ءبىراق ۆاديم دوستوۆ اباقتىدان سوتقا ەمەس، اۋرۋحاناعا جەتكىزىلدى.
كوكشەتاۋ قالاسىنداعى تەرگەۋ اباقتىسى سانيتارلىق ءبولىمىنىڭ مەيىربيكەسى ايمان ءابىلماجىنوۆانىڭ ايتۋىنشا، ايىپتى سوتقا دەيىن پىشاقپەن ءوزىنىڭ تاماعىن ورىپ جىبەرگەن. توقتاۋسىز قان كەتىپ، جەدەل تۇردە وبلىستىق اۋرۋحاناعا جەتكىزىلگەن كورىنەدى.
دوستوۆ ايىپتالىپ وتىرعان ەلدى دۇرلىكتىرگەن وقيعا وسىدان 5 اي بۇرىن بولعان. 10 بالانىڭ اكە-شەشەسى 84 جاستاعى اكىمبەك پەن 78 جاستاعى قۇرالاي بەيسەنبايەۆتار 30 ءساۋىر كۇنى تاڭەرتەڭ ءولى كۇيىندە پاتەرلەرىندە تابىلعان. ەكى قارت تۇنشىقتىرىلىپ، پىشاق جاراقاتىنان كوز جۇمعان.
پىكىر قالدىرۋ