قاۋىپسىزدىك كەڭەسىنىڭ ءتوراعاسى نۇرسۇلتان نازاربايەۆ تۇركىستان وبلىسىنا جاساعان ساپارىندا اشىلۋىنا قاتىسقان تۇركىستانداعى حالىقارالىق اۋەجاي شىن مانىندە ءالى تولىق پايدالانۋعا بەرىلمەگەنى بەلگىلى بولدى. بۇل تۋرالى kaztag.kz سايتى حابارلادى.

نۇرسۇلتان نازاربايەۆ تۇركىستان وبلىسىندا 28 قىركۇيەكتە بولعان. Elbasy.kz سايتى نازاربايەۆتىڭ ساپار بارىسىندا تۇركىستان قالاسىنىڭ حالىقارالىق اۋەجايىنىڭ اشىلۋ سالتاناتىنا قاتىسقانىن جازدى.

"حالىقارالىق اۋەجايدىڭ قۇرىلىسى مەملەكەتتىك-جەكەمەنشىك سەرىكتەستىك اياسىندا جۇزەگە اسىرىلدى. قالادان 20 شاقىرىم جەردە ورنالاسقان اۋەجاي حالىقارالىق ستاندارتتارعا ساي زاماناۋي تەحنولوگيالاردى قولدانا وتىرىپ سالىنعان. ونىڭ قۇرىلىسىنا 102 بىرلىك ارنايى تەحنيكا مەن 300-دەن استام قۇرىلىسشى جۇمىلدىرىلدى. جالپى اۋدانى 905 گەكتار بولاتىن حالىقارالىق اۋەجايدىڭ قىزمەت كورسەتۋ الەۋەتى جىلىنا شامامەن ءۇش ميلليون جولاۋشىنى قۇرايدى" دەلىنگەن Elbasy.kz سايتىندا جاريالانعان اقپاراتتىق حابارلامادى.

الايدا بىرنەشە اۋەكومپانيادا قىزمەت ەتكەن يۋليا نەچايەۆا تۇركىستانداعى حالىقارالىق اۋەجايدىڭ قۇرىلىسى ءالى بىتپەگەنىن ءمالىم ەتتى.

يۋليا نەچايەۆا اۋەجايدىڭ اشىلعانىن ەستىپ، بارىپ كورمەك بولعان. "تۇركىستاننىڭ حالىقارالىق اۋەجايى" كومانداسى بويىنشا ناۆيگاتور ولاردى ويقى-شويقى جولمەن بىرنەشە جىلدان بەرى ىستەمەي تۇرعان ەسكى اۋەجايعا اكەلگەن.

ارتىنشا، "جاڭا اۋەجايعا اپاراتىن جول" دەلىنگەن جاڭا تراسساعا تۇسكەنىن ايتقان يۋليا نەچايەۆا دىتتەگەن ورىنعا جەتكەندە پايدالانۋعا بەرىلگەن اۋەجايعا ەمەس، قۇرىلىس الاڭىنا تاپ بولعان.

ونىڭ ايتۋىنشا، عيماراتتىڭ سىرتقى جاعى عانا دايىن. اۋەجايدا قۇرىلىس قىزۋ ءجۇرىپ جاتىر.

"الايدا مەرزىمىندە پايدالانۋعا بەرىلگەن، ءيا. رەيستەر اشىلعانعا دەيىن ءبىتىرىپ قالاتىن شىعار" دەپ جازدى ناچايەۆا.

سوندا تۇركىستان وبلىسىنىڭ اكىمى ءومىرزاق شوكەيەۆ نۇرسۇلتان نازاربايەۆقا قاي اۋەجايدى كورسەتىپ ءجۇر؟ ولار بىرلەسىپ قاي اۋەجايدى اشقان؟ تۇسىنىكسىز.