پارلامەنت ءماجىلىسىنىڭ كەزەكتى وتىرىسىندا دەپۋتات ايقىن قوڭىروۆ قازاقستاندا زەينەت جاسىن 60 جاسقا دەيىن تومەندەتۋ ماسەلەسىن كوتەردى.
– كوممۋنيستەر COVID-19 ەكىنشى تولقىنى، كوروناۆيرۋس مۋتاسياسى ءقاۋپىنىڭ ءوسۋى، ۆيرۋستىڭ باسقا دا ءقاۋىپتى شتامدارىنىڭ پايدا بولۋى كەزىندە قارت كىسىلەردىڭ دەنساۋلىعىن ساقتاۋ كەرەك دەپ سانايدى. اۋرۋى بار ەگدە جاستاعى كىسىلەردىڭ وقشاۋلانۋى ءۇشىن بارلىق جاعدايدى جاساۋ، سونداي-اق ماسەلەلەردى ۋاقىتىلى شەشۋ ماڭىزدى، – دەدى دەپۋتات.
ول وسى ماقساتتا ايەلدەر مەن ەرلەردىڭ زەينەت جاسىن 60 جاسقا دەيىن تومەندەتۋ تۋرالى باستاما كوتەردى.
– 2013 جىلى ءبىز ايەلدەردىڭ زەينەتكە شىعۋ جاسىنا بايلانىستى زەينەتاقى رەفورماسىن قولدامادىق. بۇگىن پارتيانىڭ وبلىستىق جانە قالالىق كوميتەتتەرىندە قوعامدىق پىكىرتالاستار سەرياسىندا ايتىلعان ازاماتتاردىڭ پىكىرلەرىنە سۇيەنە وتىرىپ، ءبىز ازاماتتارىمىزدىڭ زەينەتكە شىعۋ جاسىن ازايتۋدى جانە ايەلدەر مەن ەرلەردىڭ زەينەت جاسىن 60 جاسقا دەيىن تومەندەتۋدى ۇسىنىپ وتىرمىز، – دەدى ا.قوڭىروۆ پرەمەر-مينيسترگە جولداعان ساۋالىندا.
پىكىر قالدىرۋ