نۇر-سۇلتاندا ماس جۇرگىزۋشى جاياۋ جۇرگىنشىنى قاعىپ، وقيعا ورنىنان قاشىپ كەتتى. بۇل تۋرالى، ktk.kz حابارلادى.

نۇر-سۇلتان قالالىق پوليسيا دەپارتامەنتى باسپا ءسوز قىزمەتىنىڭ مالىمەتىنشە، 6 قازان ساعات 21:19-دا ZAZ Chance ماركالى كولىگىن تىزگىندەگەن ماس جۇرگىزۋشى كەكىلبايەۆ كوشەسىمەن كەلە جاتىپ قايسەنوۆ كوشەسىنىڭ قيىلىسىندا باعدارشامعا نازار اۋدارماي، جاياۋ جۇرگىنشىنى قاعىپ كەتتى.  28 جاستاعى ەر ادام باعدارشامنان وتۋگە رۇقسات بەرىلگەننەن كەيىن جاياۋ جۇرگىنشىلەر جولىمەن ءوتىپ بارا جاتقان. جاياۋ جۇرگىنشى العان جاراقات سالدارىنان وقيعا ورنىندا كوز جۇمدى. 

وقيعا ورنىنان قاشىپ كەتكەن كۇدىكتى ساعات 21:22-دە قيىلىستا تۇرعان Lexus ماركالى كولىگىمەن سوقتىعىسقان. ماس جۇرگىزۋشى كولىگىن تاستاپ، وقيعا ورنىنان جاياۋ قاشىپ كەتكەن. 

لەكسۋستە وتىرعان اياعى اۋىر جولاۋشى اۋرۋحانا جەتكىزىلىپ، دارىگەرلەردىڭ قاراۋىنان كەيىن ۇيىنە جىبەرىلدى. ارتىنشا پوليسەيلەر 23 جاستاعى جۇرگىزۋشىنى ۇستادى. 

ءقازىر تەرگەۋ ءجۇرىپ جاتىر. جۇرگىزۋشى ۋاقىتشا ۇستاۋ يزولياتورىنا قامالدى.