الماتى قالاسىنىڭ جەتىسۋ اۋدانىنىڭ پروباسيالىق قىزمەتىندە 396 ادام تىركەۋدە تۇر. سولاردىڭ ءبىرى – مارال (ءاتى-جونى ءوز ءوتىنىشى بويىنشا وزگەرتىلدى) ەسىمدى كەلىنشەك. «سۇرىنبەيتىن تۇياق جوق» دەمەك بابالارىمىز ايتپاقشى، مارال دا ءبىراز جىلدار بۇرىن زاڭنان اتتاپ، جازا باسقان ەدى. كەز كەلگەن سوتتى بولعان كىسىلەر سياقتى ول دا تۇزەۋ مەكەمەسىندە جازاسىن وتەپ شىعىپ، ءقازىر وتباسىمەن بىرگە تىرشىلىك ەتىپ جاتىر.

14-قازان – مارالدىڭ قىزى سابينانىڭ (بەلگىلى سەبەپتەرگە بايلانىستى ونىڭ دا ەسىمى وزگەرتىلىپ وتىر) تۋعان كۇنى بولاتىن. ءۇي يەلەرىن قۇتتىقتاپ شىعۋ ماقساتىندا جەتىسۋ اۋدانى پروباسيا قىزمەتىنىڭ باستىعى، ەربول جاقىپوۆ،  اعا ينسپەكتور گۇلنۇر دۋشيەۆا، ينسپەكتورلار اسحات بولات، الماس نامازبەكوۆ، «ماڭگىلىك قازاقستان» قوعامدىق قورىنىڭ قىزمەتكەرلەرى جانە «ارمان – مەچتا» ەرىكتىلەر توبى مارالدىڭ شاڭىراعىنا باس سۇقتى. قوناقتار ۇيگە كىرگەن بويدا تۋعان كۇن يەسىنە سىي-سىياپات جاساپ، تارتۋ-تارالعى تاراتتى. «ءبىز پروباسيا قىزمەتىندە ەسەپتە تۇرعان ازاماتتار مەن ازاماتشالارعا ۇنەمى قولىمىزدان كەلگەن كومەگىمىزدى كورسەتىپ كەلەمىز، – دەپ ءسوز باستادى دەلەگاسيا باسشىسى ە.جاقىپوۆ. – قايعىسى بولسا بولىسەمىز، قۋانىشى بولسا دا وسىلاي ورتاقتاسامىز. بۇگىنگىدەي شارالار ءبىزدىڭ اۋداندا وتە ءجيى وتەدى. ولاردىڭ ءبارىن ۇكىمەتتىك ەمەس ۇيىمدارمەن جانە ەرىكتىلەرمەن تىزە قوسىپ ۇيىمداستىرامىز. مارالدىڭ ىسىنە ساتتىلىك، جانۇياسىنا بەرەكە تىلەيمىز». ەرىكتىلەر توبى دا لەبىزىن ءبىلدىردى. «پرەزيدەنت ق.توقايەۆتىڭ 2020 جىلدى ەرىكتىلەر جىلى دەپ جاريالاعانى بارشاعا ايان. مەملەكەتتىك ساياساتتى قولداۋ ماقساتىندا ءبىر توپ جاستار ەرىكتىلەر ۇيىمىن قۇرىپ، كوپتەگەن قوعامدىق، الەۋمەتتىك ءىس-شارالاردىڭ باسى-قاسىندا ءجۇرمىز. سابينانىڭ قۋانىشىنا ورتاقتاسىپ، ونىڭ ريزاشىلىعىنا بولەنۋ ءبىز ءۇشىن ۇلكەن ابىروي. وعان تەك قانا جاقسىلىق تىلەيمىز. اۋرۋ-سىرقاۋدان، پاندەميادان امان بولىڭىزدار. ءبىزدى وسىنداي شاراعا شاقىرعان جەتىسۋ اۋداندىق پروباسيا قىزمەتىنە راحمەت»، دەپ التىناي ەسىمدى ەرىكتىلەر توبىنىڭ مۇشەسى جۇرەكجاردى تىلەگىن ايتتى. قۇتتىقتاۋشىلار قاتارىندا جۇرگەن ۇكىمەتتىك ەمەس ۇيىمنىڭ جوبا جەتەكشىسى ب.نالىبايەۆ بۇل قۋانىشقا الماتى قالاسى قوعامدىق دامۋ باسقارماسىنىڭ دا ىقپالى بار ەكەنىن اتاپ ءوتتى. ونىڭ ايتۋىنشا باسقارما بيىل باس بوستاندىعىنان ايىرۋ ورنىنان شىققان ادامداردى الەۋمەتتىك بەيىمدەۋگە باعىتتالعان جوبانى جاريالاپ، تۇرمەدەگى جانە تۇرمەدەن شىققان ادامدارعا قۇقىقتىق، پسيحولوگيالىق، الەۋمەتتىك قولداۋلار كورسەتىپ جاتىر. سابينانىڭ تۋعان كۇنىنە سىي-سىيپات جاساۋ وسى يگى ىستەردى ءبىر پاراسى ەكەن. «ءبىز بۇعان دەيىن قالا بويىنشا 3 وتباسىعا كىرىپ، وسىنداي قولداۋ جۇمىستارىن ۇيىمداستىردىق. مىنە، بۇگىن ءتورتىنشى شاڭىراققا دا ات باسىن بۇردىق. تيتتەي جۇمىستار كوپ ىستەلگەن جەردە ۇلكەن ىستەر بىتەدى عوي. ءبىز ۇلكەن ىسكە ۇلەس قوسىپ جاتقانىمىزعا سەنىمدىمىز»، دەيدى قوعامدىق قور قىزمەتكەرى.

شارا اياقتالعان سوڭ ءۇي يەلەرى قوناقتارعا العىس ايتىپ، شىعارىپ سالدى.

 ن.ناۋرىزالييەۆ