اباقتىدان شىعىپ، قوعامعا ءسىڭۋ ءبىر ساتتىك كورىنىس بولعانىمەن، قوعامعا بەيىمدەلۋ ءبىراز ەڭبەكتى تالاپ ەتەدى. تۇرمەدەگى ءتارتىپ پەن قوعامداعى ەركىندىكتىڭ اراسىن سايكەستەندىرۋ ءبىرشاما ۋاقىتقا سوزىلاتىنى راس. وسى ورايدا «ماڭگىلىك قازاقستان» قوعامدىق قورى الماتى قوعامدىق دامۋ باسقارماسىنىڭ قولداۋىمەن بۇرىن ءىستى بولعان ازاماتتارعا پسيحوالەۋمەتتىك دياگنوستيكا جۇمىستارىن جۇرگىزدى. بۇل ءىس-شارا قالالىق پروباسيا قىزمەتىنىڭ ينسپەكتورلارىمەن بىرلەسىپ جۇزەگە اسىرىلدى. بۇل جولى پسيحوالەۋمەتتىك دياگنوستيكاعا تۇركسىب اۋدانىنىڭ پروباسيا قىزمەتىندە تىركەۋدە تۇرعان 40-شاقتى ادام مەن ناۋرىزباي اۋدانى پروباسيا قىزمەتىنىڭ تىزىمىندەگى 50-گە تارتا ادام قامتىلدى.

بىلىكتى پسيحولوگ جاننا ياۆورسكايا مەن زاڭگەر، تولىستاعى پولكوۆنيك مۇحامەدجان توقتاعۇل وتكىزگەن دياگنوستيكادا سوتتى بولىپ، تۇزەۋ مەكەمەسىندە جازاسىن وتەپ شىققان جاندارمەن ديالوگ ءجۇردى. پسيحولوگ حانىم ولارعا ساق قاعازعا سۋرەت سالدىرىپ، سونان سوڭ سۋرەتكە قاراپ سۋرەت اۆتورلارىنىڭ جان-دۇنيەسىنە باعا بەردى. «مەن سۋرەت سالدىرعاندا قاتىسۋشىلارعا سۋرەتتىڭ جانىنا ءوز ەسىمدەرىن جازباۋدى سۇرادىم. سەبەبى پسيحوالەۋمەتتىك دياگنوستيكا جاساعانىمدا سۋرەت اۆتورىنىڭ كوڭىلىنە جاقپايتىن ءسوز ايتىپ قالۋىم ابدەن مۇمكىن. مەن ولارعا پايدالى بولۋ ءۇشىن ءادىل اقپارات ايتۋعا ءتيىسپىن»، دەيدى ج.ياۆورسكايا. «كەيبىر كىسىلەر سۋرەتتى قاعازدىڭ ورتاسىنا نەمەسە بۇرىشىنا كىشكەنتاي ەتىپ سالادى، – دەپ ءسوزىن جالعادى پسيحولوگ بىزگە بەرگەن سۇحباتىندا، – بۇل ولاردىڭ بويىندا الدەبىر قورقىنىش بارىن كورسەتەدى. سوسىن ولارعا كەز كەلگەن ادامنىڭ سۋرەتىن سالىڭدار دەپ ەدىم، بىرەۋى اياق-قولى جوق قىزدىڭ سۋرەتىن بەينەلەپتى. مەنىڭ ويىمشا ول سۋرەتتىڭ اۆتورى قاراما-قارسى جىنىستاعى ادامدارمەن ارالاسا المايدى. كوممۋنيكاسيالىق قابىلەتىن شىڭداۋى كەرەك. مەن جاساعان جورامالداردىڭ ءبارى ءجۇز پايىز شىندىق ەمەس، گيپوتەزا بولىپ سانالاپدى. ءبىراق پسيحولوگيا عىلىمىندا بۇل ءادىستىڭ دياگنوستيكالىق قىرى دالەلدەنگەن».

زاڭگەر م.توقتاعۇلدىڭ سوزىنشە قاتىسۋشىلار اراسىندا اياعىن اڭداپ باساتىن، ساق ادامداردىڭ سانى كوپ. «اۋزى كۇيگەن ۇرلەپ ىشەدى» دەمەكشى، جىگىتتەر ءتارتىبىن تۇزەپ، جاڭا ومىرگە ۇمتىلعىسى كەلەدى. مەن ولارعا دياگنوستيكالىق ساباق رەتىندە «شەكارانى بۇزباۋ» دەگەن ءتاسىلدى ءتۇسىندىردىم. قىلمىستىڭ كوبى بىرەۋدى جەكە ومىرىنە قول سۇققاندا ورىن الادى. ادامدار ەموسياعا بەرىلىپ، كەيدە مۇنداي شەكارانىڭ بار ەكەنىن ۇمىتىپ كەتەدى دە، باسقالارمەن سوقتىعىسىپ، جازالى بولادى. ەڭ باستىسى قاتىسۋشىلاردىڭ بويىندا ساقتىق شارالارى بار»، دەيدى زاڭگەر.

ال جوبانى ۇيىمداستىرۋشى ب.نالىبايەۆ اتالعان ءىس-شارا باس بوستاندىعىنان ايىرۋ ورنىنان شىققان ادامداردى الەۋمەتتىك بەيىمدەۋ ماقساتىندا جۇرگىزىلىپ جاتقانىن ايتادى. «جوبا اياسىندا پسيحوالەۋمەتتىك باعدارلامالار ۇيىمداستىرۋ دەگەن تارماق بار. دياگنوستيكالىق جۇمىستار سونىڭ اياسىندا اتقارىلىپ جاتىر. بۇدان بولەك كەيبىر سوتتى بولعان ازاماتتار مەن ازاماتشالاردىڭ وتباسىنا الەۋمەتتىك كومەك كورسەتتىك. سونىمەن قاتار پسيحوالەۋمەتتىك دياگنوستيكالار تۇرمە ىشىندە دە جۇرگىزىلدى» دەيدى ول.

ن.ناۋرىزالييەۆ