ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتى مەن «قازاق راديولارى» سەرىكتەستىگى شىعارماشىلىق جانە كاسىبي بايلانىستى ارتتىرۋ ماقساتىندا مەموراندۋمعا قول قويدى.

الدىمىزدا قازاق راديوسىنىڭ 100 جىلدىعى جانە ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتىنە 25 جىل تولادى. ايتۋلى مەرەكەلەردىڭ قارساڭىندا قازاق ءۇنى – «قازاق راديولارى» سەرىكتەستىگى مەن ەۋرازيا ۇلتتىق ۋنيۆەرسيتەتى جاستاردىڭ كاسىبي بىلىكتىلىكتەرىن ارتىپ، بىلىمدەرىن كەڭەيتىپ، تالانتتارىن اشا تۇسۋگە مۇرىندىق بولاتىن كەلىسىم جاسادى.

مەموراندۋم ماقساتى – كادرلاردى دايىنداۋ ىسىندە شىعارماشىلىق جانە كاسىبي قاتىناستاردى ارتتىرۋ، بىرلەسكەن شارالار ۇيىمداستىرۋ جانە تاجىريبە الماسۋ.

ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى، پروفەسسور ەرلان ءباتتاش ۇلى: «مەموراندۋم اياسىنداعى ماقسات ايقىن. ماقسات ءبىر. ۋنيۆەرسيتەتتىڭ العاشقى رەسمي مەرەيتويى كەلە جاتىر. سونىڭ نەگىزىندە راديودا ۋنيۆەرسيتەت تۇلعالارىن تانىستىرىپ، ەستەلىكتەرى مەن جەتىستىكتەرىن ايتىپ وتىراتىن جۇيەلى حابارلار كومپلەكسى جۇرسە دەپ ۇسىنىسىن ايتتى. باستىسى، قاي جەردە دە ناتيجە بولعانى دۇرىس» دەپ ويىن ءبىلدىردى.

رەكتور كەلىسىم نەگىزىندە ورتاق ءىس-شارالار وتكىزىلىپ، ستۋدەنتتەردىڭ وقۋ جانە وندىرىستىك تاجىريبەدەن وتۋىنە جانە جاڭا جوبالارمەن جۇمىس ىستەۋگە جاعداي جاسالاتىنىن ايتتى.

ال «قازاق راديولارى» ج ش س ديرەكتورى ەرنۇر بۋراحان:

– «بيىل قازاق راديوسىنىڭ 100 جىلدىعى بولسا، كەلەسى جىلى «شالقار» راديوسىنىڭ 55 جىلدىعى. بۇگىنگى كۇنى ءبىزدىڭ ۇجىمنىڭ 10 پايىزىن ەۋرازيا ۇلتتىق ۋنيۆەرسيتەتىنىڭ تۇلەكتەرى قۇرايدى، كەيبىر ماماندارىمىز بۇل ءبىلىم ورداسىندا ۇستازدىق قىلادى. قازىرگى ۋاقىتتا قازاق راديوسىنىڭ «التىن قورىنداعى» ەڭ اسىل دۇنيەلەردى، ەسكىنى قايتارىپ جاتقان جايىمىز بار» دەدى ءوز سوزىندە.

كەلىسىم بارىسىندا ەرنۇر كوشەرحان ۇلى ستۋدەنتتەرمەن بىرگە 24 ساعاتتىق ونلاين راديو جۇمىسىن باستاۋ تۋرالى ۇسىنىس ايتتى. جاڭا باستاما ارقىلى ۋنيۆەرسيتەتتىڭ ءبىلىم الۋشىلارى كاسىبي تۇرعىدان ءوسىپ، جاڭا ءبىر الەممەن تانىسادى. ۋنيۆەرسيتەت قابىرعاسىنداعى راديوستۋديادا وزدەرىنە ۇنايتىن تاقىرىپتا حابار دايىنداپ، راديوعا ۇسىنۋلارىنا مۇمكىندىك تۋادى. ەڭ ۇزدىك حابارلار رەسپۋبليكالىق دەڭگەيگە شىعادى. الداعى ۋاقىتتا ستۋدەنتتەردىڭ بۇل ونىمدەرى جۇمىسقا ورنالاسۋعا دا زور مۇمكىندىك بەرەتىنىن ايتتى.

اسەم تاڭاتار،

ەۇۋ ستۋدەنتى