كەلەسى جىلى اكادەميك، قازاق زاڭ عىلىمىن قالىپتاستىرعان تۇلعا سالىق زيمانوۆتىڭ تۋعانىنا 100 جىل تولادى. الايدا ايتۋلى داتا الداعى جىلى اتالىپ وتەتىن مەرەيتويلار تىزبەسىنەن تىس قالعان. وسىعان وراي مۇحتار قۇل-مۇحاممەد باستاعان ءبىر توپ سەناتور ۇكىمەت باسشىسىنىڭ اتىنا دەپۋتاتتىق ساۋال جولدادى.

ساۋالدا اكادەميكتىڭ تاۋەلسىزدىگىمىزدى زاڭدىق تۇرعىدان بەكىتۋگە سىڭىرگەن ەڭبەگى، بىلىكتى دە ءبىلىمدى زاڭگەرلەر دايارلاعان ۇستازدىق قىزمەتى جانە ۇلى وتان سوعىسىنداعى ەرەن ەرلىگى ايتىلعان.

– سالىق زيمانوۆ 1990 جىلى قازاق كسر جوعارعى كەڭەسىنە دەپۋتات بولىپ سايلانىپ، كوميتەت ءتوراعاسى ءارى 1990 جىلى 25 قازاندا قابىلدانعان قازاق كسر-نىڭ "مەملەكەتتىك ەگەمەندىگى تۋرالى" دەكلاراسياسىنىڭ جوباسىن دايارلاعان دەپۋتاتتىق كوميسسيانىڭ باسشىسى بولدى. كەيىن 1991 جىلى 14-16 جەلتوقساندا "قازاقستان رەسپۋبليكاسىنىڭ مەملەكەتتىك تاۋەلسىزدىگى تۋرالى" كونستيتۋسيالىق زاڭىن قابىلداۋ بارىسىندا كەلىسىم كوميسسياسىنىڭ قۇرامىنا كىرىپ، تاريحي قۇجاتتىڭ قابىلدانۋىنا زاڭگەر دەپۋتات رەتىندە زور ۇلەس قوستى"، – دەدى مۇحتار قۇل-مۇحاممەد.

سونىمەن قاتار سەناتور اكادەميك زيمانوۆتىڭ جەلتوقسان وقيعاسى كەزىندەگى قايسارلىعىن ەرەكشە اتاپ ءوتتى.

– اعا بۋىن وكىلدەرى قاھارمان سالىق زيمانوۆتىڭ ازاتتىعىمىزعا جارقىن جول اشقان جەلتوقسان كوتەرىلىسىنەن كەيىن زيالى قاۋىمنىڭ ەرىك-جىگەرىن باسۋ ءۇشىن 1986 جىلدىڭ 29 جەلتوقسانىندا ۇلتتىق عىلىم اكادەمياسىنا كەلگەن م.س.سولومەنسيەۆ پەن گ.ۆ.كولبيننىڭ الدىندا اقىرىپ تەڭدىك سۇراعان اقساراعات سوزدەرىن دە ۇمىتقان جوق، – دەدى سەناتور ءوز ساۋالىندا.

شىن مانىندە، ءومىر بويى قايتپاس قايسارلىعىنان، پرينسيپشىلدىگىنەن جازباعان سالىق زيمانوۆ بارشا قازاقتىڭ قابىرعاسىن قايىستىرعان قاھارلى جەلتوقسان وقيعاسى كەزىندە ماسكەۋدەن جەدەل جەتكەن سول كەزدەگى كوكپ ورتالىق كوميتەتىنىڭ حاتشىسى سۇرقاي سولومەنسيەۆ پەن "قاڭعىپ كەلگەن شۇرەگەي" كولبيننىڭ الدىندا قاسقايا قارسى ءسوز سويلەپ، جاستارىمىزدىڭ ىس-ارەكەتىن قورعاپ قانا قويماي، ونى عىلىمي تۇرعىدان دالەلدەگەن ازامات ەكەنىن ۇمىتپاعان ءجون.

بۇگىندە ءبىر كەزدەرى جەلتوقسان وقيعاسىنا قاتىسقان جازىقسىز جاس ۇلانداردى سوتتاۋعا، جازالاۋعا، قۋدالاۋعا اتسالىسقاندار اراسىندا وزدەرىن باتىر رەتىندە ناسيحاتتاپ جۇرگەندەر بار. ال ناعىز باتىر – سالىق زيمانوۆ، سافۋان شايمەردەنوۆ جانە جۇبان مولداعالييەۆ سياقتى اعالارىمىز.

وسىعان وراي، اكادەميك سالىق زيمانوۆتىڭ عاسىرلىق مەرەيتويىن لايىقتى اتاپ ءوتۋ ءۇشىن: قاھارمان عالىمنىڭ ءومىرى مەن شىعارماشىلىعىنا ارنالعان حالىقارالىق عىلىمي-پراكتيكالىق كونفەرەنسيا، تانىم-تاعىلىمدىق شارالار وتكىزۋ، ونىڭ ەسىمىن اتىراۋ مەن الماتى قالالارىنىڭ كوشەلەرىنە جانە نۇر-سۇلتان قالاسىنداعى جاڭادان سالىنعان مەكتەپتەردىڭ بىرىنە بەرۋ، تۋعان جەرىندە ونىڭ ەڭسەلى ەسكەرتكىشىن ورناتۋ ماسەلەسىن قاراستىرۋدى سۇرايمىز"، – دەلىنگەن ساۋالدا.

ءبىز دە سەناتوردىڭ ساۋالىن ورىندى دەپ ەسەپتەيمىز جانە وندا ايتىلعان ۇسىنىستاردى تولىق قولدايمىز.