COVID-19-دىڭ تارالۋىن تەجەۋ ماسەلەلەرى جونىندەگى ۆەدومستۆوارالىق كوميسسيانىڭ ءتوراعاسى، پرەمەر-مينيستردىڭ ورىنباسارى ەرالى توعجانوۆتىڭ سولتۇستىك قازاقستان وبلىسىنا جۇمىس ساپارى بارىسىندا وبلىستا 9 قاراشادان باستاپ جاڭا شەكتەۋ شارالارى ەنگىزىلەتىنى حابارلاندى.

پەتروپاۆل قالاسىندا قالانىڭ پەريمەترى بويىنشا بلوكپوستتار ورناتا وتىرىپ كارانتين ەنگىزۋ كوزدەلۋدە. سونداي-اق كۇن سايىنعى ىندەت بويىنشا ءوسىم 10-نان استام جاعدايدى قۇرايتىن ەلدى مەكەندەردە سانيتارلىق بلوكپوستتار ورناتىلماق.

پەتروپاۆل-الماتى باعىتى بويىنشا تەمىرجول تاسىمالدارىن اپتاسىنا 7-دەن 3 رەتكە دەيىن قىسقارتۋ، پەتروپاۆل قالاسىنان شىعاتىن اۋە جولاۋشىلارى ءۇشىن تەرىس ناتيجەسى بار پتر انىقتاماسىنىڭ (بەرىلگەن ساتتەن باستاپ 3 تاۋلىكتەن اسپايتىن) بولۋىن مىندەتتەۋ، ءدىني وبەكتىلەردىڭ، تەاترلاردىڭ، كينوتەاترلاردىڭ، مادەنيەت وبەكتىلەرىنىڭ قىزمەتىن توقتاتۋ جوسپارلانعان.

جۇمىس كۇندەرى قوعامدىق تاماقتاندىرۋ وبەكتىلەرى ءبىر مەزگىلدە 30-دان اسپايتىن كەلۋشىلەردى قابىلداي الادى. 30-دان كەم ورىندى وبەكتىلەر ءۇشىن ورىننىڭ 50%-ى عانا تولۋعا ءتيىس.

دەمالىس كۇندەرى قوعامدىق تاماقتانۋ وبەكتىلەرىندە جەتكىزۋ قىزمەتى عانا ىستەيدى. ساۋدا ۇيلەرى، ساۋدا ورتالىقتارى، اۋدانى 500 شارشى مەتردەن اساتىن ازىق-تۇلىكتىك ەمەس دۇكەندەر جۇمىسى شەكتەلەدى. سۇلۋلىق سالوندارىنىڭ، شاشتارازداردىڭ، باسسەيندەردىڭ، فيتنەس-كلۋبتاردىڭ، جاتتىعۋ زالدارىنىڭ جۇمىستارى توقتايدى.

اۋەجايلارعا، تەمىر جول ۆوكزالدارىنا كۇتىپ الاتىن جانە شىعارىپ سالاتىن تۇلعالارعا كىرۋگە تىيىم سالىنادى.