الەۋمەتتىك جەلىدە ازاماتتىق بەلسەندى دۋلات ءاعادىلدىڭ ۇلى جانبولات اعادىلگە "توبەلەس كەزىندە پىشاق ۇردىم" دەگەن ادامنىڭ ۆيدەوسى تارادى.

ۆيدەوداعى ادام استاناعا اتا-اناسىمەن ءبىر جىل بۇرىن جۇمىس ىستەۋگە كەلگەنىن ايتىپ، دوسىنىڭ شاقىرۋىمەن ءبىر جەرگە بارعانىن، ول جەرگە بارعاندا بىرەۋدى ۇرۋ، ءولتىرۋ ويىندا بولماعانان جەتكىزگەن.

"بارعان كەزدە توبەلەس باستالدى. توبەلەس اراسىندا پىشاق ۇرىپ قويدىم" دەگەن ول قازا تاپقان ادامنىڭ جانبولات ءاعادىل ەكەنىن ارتىنان بىلگەنىن، جانبولات دوسى دا، قاسى دا ەمەستىگىن، تەك قاشىپ بارا جاتىپ پىشاق ۇرىپ قويعانىن ايتىپ، مارقۇمنىڭ جاقىندارىنان كەشىرىم سۇرادى.

رەسمي ورگان تاراپىنان ۆيدەو تۋرالى، ونىڭ جانبولات ءاعادىل قازاسىنا بايلانىستى ىسكە قاتىسى بار-جوعى جايلى ەشقانداي مالىمەت جاريالانعان جوق.

11 قاراشاعا قاراعان ءتۇنى نۇر-سۇلتاندا ازاماتتىق بەلسەندى دۋلات ءاعادىلدىڭ ۇلى جانبولات ءاعادىلدى پىشاقتاپ ءولتىرىپ كەتكەنى حابارلانعان.

ءمايىتحاناعا كىرگەن جانبولاتتىڭ جاقىندارى مارقۇمنىڭ دەنەسىنەن بىرنەشە پىشاق جاراقاتىنىڭ ءىزىن كورگەنىن مالىمدەگەن.