XX سەزد قارساڭىندا پارتيانىڭ ورتالىق اپپاراتىندا «Nur Otan» ساياسي كەڭەسىنىڭ وتىرىسى ءوتتى. بەينەكونفەرەنسيا بايلانىسى رەجيمىندە ۇيىمداستىرۋ ماسەلەلەرىمەن قاتار پارتيانىڭ سوڭعى 5 جىلداعى قىزمەتىنىڭ قورىتىندىلارى قارالدى.

«Nur Otan»-نىڭ بەسجىلدىق جۇمىسىن قورىتىندىلاي كەلە، پارتيا ءتوراعاسىنىڭ ءبىرىنشى ورىنباسارى باۋىرجان بايبەك پارتيانىڭ 234 قوعامدىق قابىلداۋ بولمەسى سايلاۋالدى باعدارلامانى باقىلاۋ مەن «كەرى بايلانىستىڭ» پارمەندى تەتىگى بولعانىن اتاپ ءوتتى.

ەلباسى، پارتيا ليدەرى نۇرسۇلتان نازاربايەۆتىڭ تاپسىرماسى بويىنشا «Nur Otan» 2014 جىلى ەلىمىزدە ءبىرىنشى بولىپ «ەلەكتروندى پارتيا» جوباسى اياسىندا قوعامدىق ونلاين-قابىلداۋ بولمەسىن، ۆەب-پورتال اشىپ، مەسسەندجەرلەر مەن الەۋمەتتىك جەلىلەر ارقىلى كوممۋنيكاسيانىڭ جاڭا ارنالارىن ەنگىزە باستادى.

«5 جىل ىشىندە پارتياعا شامامەن 1،2 ملن. ادام جۇگىندى، ونىڭ 30%ء-ى وتىنىشتەرىن ونلاين جولدادى. وتىنىشتەردىڭ 92%ء-ى بويىنشا وڭ شەشىم قابىلدانىپ، تەگىن كەڭەس بەرىلىپ، قۇقىقتىق كومەك كورسەتىلدى. نۇروتاندىق دەپۋتاتتار، ورتالىق جانە جەرگىلىكتى اتقارۋشى ورگانداردىڭ باسشىلارى 180 مىڭعا جۋىق قابىلداۋ وتكىزىپ، 340 مىڭنان استام ازاماتتى قابىلدادى. وتىنىشتەردىڭ 72%ء-ى وڭ شەشىمىن تاپتى، 28%ء-ى بويىنشا تۇسىندىرمەلەر مەن قاجەتتى كەڭەستەر بەرىلدى»، - دەدى باۋىرجان بايبەك.

ونىڭ ايتۋىنشا، پاندەمياعا قاراماستان، قوعامدىق قابىلداۋلاردىڭ جۇمىسى ونلاين فورماتتا جالعاسىپ، ەلەكتروندى تۇردە 339 مىڭ ءوتىنىش قابىلدانعان.

«الەمدىك تاجىريبە كورسەتكەندەي، پاندەميا كەزىندە تۇرمىستىق زورلىق-زومبىلىق وسۋدە. قيىن-قىستاۋ جاعدايعا تاپ بولعان وتباسىلارعا، ايەلدەر مەن بالالارعا كەشەندى كومەك كورسەتۋدى ۇيىمداستىرۋ ءۇشىن تاۋلىك بويى جۇمىس ىستەيتىن «111 شۇعىل قىزمەت» بايلانىس ورتالىعى ىسكە قوسىلدى. 2 ايدىڭ ىشىندە 3 مىڭنان استام ءوتىنىش بويىنشا زاڭ كەڭەستەرى بەرىلىپ، پسيحولوگيالىق كومەك كورسەتىلدى. بۇل – ەل پرەزيدەنتى قاسىم-جومارت كەمەل ۇلى توقايەۆتىڭ «حالىق ۇنىنە قۇلاق اساتىن مەملەكەت» تۇجىرىمداماسىن جۇيەلى جۇزەگە اسىرۋدىڭ كورىنىسى»، - دەدى پارتيا ءتوراعاسىنىڭ ءبىرىنشى ورىنباسارى.

وسى ورايدا، ول ەلباسى، پارتيا ءتوراعاسى نۇرسۇلتان نازاربايەۆتىڭ تاپسىرماسىنا سايكەس، «Nur Otan» پارتياسى ناقتى الەۋمەتتىك توپتاردىڭ ماسەلەلەرىن جوبالىق ءتاسىل نەگىزىندە شەشەتىنىن اتاپ ءوتتى.

ماسەلەن، «ارداگەرلەردى ارداقتايىق» جوباسىن جۇزەگە اسىرا وتىرىپ، ارداگەرلەر مەن تىل ەڭبەككەرلەرىنىڭ 200 مىڭنان استام الەۋمەتتىك-تۇرمىستىق ماسەلەلەرى شەشىلدى. «باقىتتى وتباسى» جوباسى اياسىندا 1300-دەن استام ءبىلىم بەرۋ، دەنساۋلىق ساقتاۋ جانە الەۋمەتتىك قورعاۋ مەكەمەلەرىنە مونيتورينگ جۇرگىزىلدى، بالا قۇقىقتارىن قورعاۋ جانە تۇرمىستىق زورلىق-زومبىلىققا قارسى تۇرۋ تۇرعىسىنان زاڭ جوبالارىنا 45 ۇسىنىس ەنگىزىلدى.

«كەدەرگىسىز كەلەشەك» جوباسىنىڭ ارقاسىندا ەرەكشە قاجەتتىلىكتەرى بار 40 مىڭعا جۋىق ازامات جۇمىسقا ورنالاستىرىلىپ، 24 مىڭنان استام نىسان سولارعا ىڭعايلاندىرىلدى. سونداي-اق، جالپى ءبىلىم بەرەتىن مەكتەپتەردە 43 ينكليۋزيانى قولداۋ كابينەتى اشىلدى.

«ەلباسى، پارتيا ليدەرى ن.ءا. نازاربايەۆ قويعان مىندەتتەردىڭ شەشىلۋىن، الىنعان مىندەتتەمەلەردىڭ ورىندالۋىن باقىلاۋدى پارتيالىق باقىلاۋ كوميتەتى مەن سىبايلاس جەمقورلىققا قارسى ءىس-قيمىل جونىندەگى رەسپۋبليكالىق قوعامدىق كەڭەس ىسكە اسىرادى. سوڭعى 5 جىل ىشىندە پارتيالىق باستى ورگاندار ءتۇرلى مەملەكەتتىك جانە پارتيالىق ورگاندارعا 800-دەن استام ۇسىنىم ازىرلەدى. ماسەلەن، پارتيالىق باقىلاۋ كوميتەتىنىڭ ارالاسۋىمەن 9،3 مىڭ مەديسينا قىزمەتكەرىنە وتەماقى تولەندى»، – دەپ اتاپ ءوتتى باۋىرجان بايبەك.

سىبايلاس جەمقورلىققا قارسى كۇرەس تە پارتيا ءۇشىن ءپرينسيپتى ماسەلە بولىپ قالا بەرەدى. سىبايلاس جەمقورلىققا قارسى ءىس-قيمىل جونىندەگى رەسپۋبليكالىق كەڭەس «Jas Otan» جاستار قاناتىمەن بىرلەسىپ جوعارى وقۋ ورىندارى مەن كوللەدجدەردى تەكسەردى. ناتيجەسىندە 10 مىڭنان استام ستۋدەنتتىڭ جاتاقحانالارداعى ءومىر ءسۇرۋ جاعدايى جاقساردى.

«جاستار – وتانعا!» باعدارلاماسى اياسىندا سوڭعى 5 جىلدا 13 مىڭنان استام جاس بۋىن جۇمىسقا تۇردى. جاستار باستامالارىنىڭ مەملەكەتتىك الەۋمەتتىك تاپسىرىسىن قارجىلاندىرۋ 2،5 ەسە ءوستى.

«Nur Otan» پارتياسى قوعامدىق-ساياسي ۇيىمداردىڭ ىشىنەن العاشقىلاردىڭ ءبىرى بولىپ پاندەميانىڭ الەۋمەتتىك-ەكونوميكالىق سالدارىنا قارسى تۇردى. ەلباسى، «Nur Otan» پارتياسى ءتوراعاسىنىڭ باستاماسىمەن قۇرىلعان «Birgemiz» قوعامدىق قورى 2،2 ميليوننان استام ادامعا، نۇر-سۇلتان مەن الماتى قالاسىنداعى 2 مىڭنان استام مەديسينا قىزمەتكەرىنە ماتەريالدىق كومەك كورسەتتى. حالىقتىڭ نەعۇرلىم از قورعالعان توپتارىنا جاتاتىن 100 مىڭ وتباسىنا 5 ملن. مەديسينالىق ماسكا تەگىن تاراتىلدى. 1 ملن-نان استام ادام 4،4 ملرد. تەڭگە سوماعا ءبىرىنشى كەزەكتە قاجەتتى تاۋارلارمەن قامتاماسىز ەتىلدى. ماقتاارالدا سۋ تاسقىنىنان زارداپ شەككەن ازاماتتارعا ارناپ 32 ءۇي سالىنىپ، 1 مىڭ توننادان استام گۋمانيتارلىق كومەك جىبەرىلدى»، - دەدى باۋىرجان بايبەك.

باۋىرجان بايبەكتىڭ ايتۋىنشا، پاندەميا مەن كۇردەلى ەكونوميكالىق احۋالعا قاراماستان، پارتيا بەلسەندى جۇمىس جۇرگىزدى، ءوزىنىڭ بارلىق الەۋمەتتىك سايلاۋالدى مىندەتتەمەلەرىن ورىندادى جانە سايلاۋشىلاردىڭ سەنىمىن نىعايتتى.

اشىقتىق پەن ەسەپتىلىك قاعيداتتارىن باسشىلىققا الا وتىرىپ، «Nur Otan» 2014 جىلدان باستاپ جىل سايىن باق-تا شىعىستاردىڭ بارلىق باپتارىن كورسەتە وتىرىپ، قارجىلىق ەسەبىن جاريالاپ كەلەدى. پارتيا باستاماسىمەن ەسەپ كوميتەتى ەكى رەت تەكسەرۋ جۇرگىزىپ، بارلىعى قولدانىستاعى زاڭناماعا سايكەس كەلەتىنىن انىقتادى.

«كوشباسشىلىقتى ساقتاۋ ءۇشىن ۋاقىت تالابىنا جاۋاپ بەرە وتىرىپ، وزگەرۋ قاجەت. ەلباسى ايتقانداي، «Nur Otan» ودان ءارى دامۋدى جالعاستىرا بەرۋى ءتيىس. سوندىقتان وتكەن جىلى پارتيا باسشىسىنىڭ تاپسىرماسىمەن «سەنىم. ديالوگ. بولاشاققا نىق قادام» اتتى پارتيانى قايتا جانداندىرۋ باعدارلاماسى قابىلداندى. بيلىكتىڭ بارلىق دەڭگەيىندە پارتيالىق جاۋاپكەرشىلىكتى ارتتىرۋعا بايلانىستى شارالار قولعا الىنىپ، پارتيانىڭ ماجىلىستەگى جانە ءماسليحاتتارداعى دەپۋتاتتىق فراكسيالارىنىڭ جۇمىسى جانداندىرىلدى. «پارتيا قاتارىن تازارتۋ» اياسىندا جارعى مەن ەتيكا كودەكسىن ساقتاماعانى، پارتيامەن بايلانىستى جوعالتقانى ءۇشىن 240 مىڭنان استام ادام، سىبايلاس جەمقورلىق قۇقىق بۇزۋشىلىعى ءۇشىن 610 ادام پارتيادان شىعارىلدى. ءوز كەزەگىندە «Nur Otan» پرايمەريزى ەلىمىز ءۇشىن ەلەۋلى ساياسي وقيعاعا اينالىپ، ءىس جۇزىندە «مىقتى ليدەرلەر – مىقتى پارتيا» فورمۋلاسىن ىسكە اسىردى»، - دەپ قورىتىندىلادى جەتەكشى پارتيا ءتوراعاسىنىڭ ءبىرىنشى ورىنباسارى.

ساياسي كەڭەس وتىرىسى بارىسىندا پاۆلودار وبلىسىنان جاس عالىم يرينا چيدۋنچي پارتياىشىلىك سايلاۋعا قاتىستى پىكىرىمەن ءبولىستى.
«بارلىق پاۆلودارلىق ايەلدەر اتىنان ەلباسىمىزعا اۋقىمدى جوباعا قاتىسۋعا مۇمكىندىك بەرگەنى ءۇشىن العىسىمدى ءبىلدىرىپ، ەلدەگى بولىپ جاتقان وزگەرىستەردەن سىرت قالمايتىنىمىزعا، قازاقستاندى بىرگە وركەندەتۋ ءۇشىن بارلىق كۇش-جىگەرىمىزدى جۇمسايتىنىمىزعا سەندىرگىم كەلەدى»، - دەدى ي.چيدۋنچي.

تۇركىستان وبلىسىنان پرايمەريزگە قاتىسقان بەكارىس شويبەكوۆتىڭ ايتۋىنشا، بيىلعى پرايمەريز قاراپايىم ازاماتتاردىڭ ساياساتقا ارالاسۋىنا جول اشىپ، قوعام تاراپىنان جوعارى باعالانعان.

«بۇگىن «Nur Otan» پارتياسى ءوز جۇمىسىنا جاڭا فورمات ەنگىزدى، ونى كورىپ وتىرمىز. تۇڭعىش رەت رەسپۋبليكالىق اۋقىمدا پرايمەريز وتكىزىلدى. سونداي-اق، ءاربىر ءوڭىر، قالا جانە اۋدان بويىنشا دايىندالعان 216 سايلاۋالدى باعدارلاما حالىق اراسىندا جان-جاقتى تالقىلاندى. بۇنىڭ بارلىعى – ەلباسى، پارتيا ءتوراعاسى ن.ءا.نازاربايەۆتىڭ پارتيانى «قايتا جانداندىرۋ» جونىندەگى باستاماسىنىڭ ارقاسىندا جۇزەگە استى. «Nur Otan» ناعىز حالىقتىق پارتيا ەكەنىن دالەلدەدى، - دەدى ساياسي كەڭەس مۇشەسى باقىتجان جۇماعۇلوۆ.

ساياسي كەڭەس وتىرىسىنىڭ قورىتىندىسى بويىنشا ۇكىمەتتىڭ سايلاۋالدى باعدارلاماسىن ىسكە اسىرۋ جونىندەگى ەسەبى الدىن الا ماقۇلداندى، پارتيانىڭ جارعىسى مەن ساياسي دوكتريناسىنا وزگەرىستەر قارالدى. پرايمەريزدىڭ 78 جەڭىمپازى ەنگەن ماجىلىسكە ارنالعان پارتيالىق ءتىزىم، سونداي-اق جۇمىس ورگاندارىنىڭ قۇرامى مەن پارتيانىڭ كەزەكتەن تىس XX سەزىنىڭ كۇن ءتارتىبى بەكىتىلدى.

«Nur Otan» پارتياسىنىڭ باسپا ءسوز قىزمەتى