مەملەكەت باسشىسى قاسىم-جومارت توقايەۆ قاراعاندى وبلىسىنا جۇمىس ساپارىمەن باردى. ساپار بارىسىندا جاڭادان سالىنعان 1200 ورىندىق مەكتەپ-گيمنازيانى جانە قاراعاندىداعى ءبىرقاتار سپورت نىسانىن ارالاپ كوردى. بۇل تۋرالى akorda.kz سايتى حابارلادى. 

پرەزيدەنتكە جاڭا مەكتەپتەگى زاماناۋي قۇرالدارمەن جابدىقتالعان كابينەتتەر، STEM-لابوراتوريا، روبوتتىق تەحنيكا جانە زياتكەرلىك بولمەلەر، مەكتەپ تەلەستۋدياسى مەن مەدياستۋديا كورسەتىلدى. 

توقايەۆ جاڭا مەكتەپ-گيمنازياعا ابايدىڭ ەسىمىن بەرۋ جونىندەگى ۇسىنىستى قولدادى. وقۋ وشاعى ۇلى اقىن ءارى ويشىلدىڭ مۇرالارىن زەرتتەۋ، ناسيحاتتاۋ ورتالىعىنا اينالادى. مەكتەپ بازاسىندا قالالىق قانا ەمەس، وبلىستىق ءىس-شارالار دا وتكىزىلەدى. ول ءۇشىن 700 ورىندىق اكت زالى بار. ونىڭ ءىشى اباي شىعارماشىلىعىمەن بەزەندىرىلگەن.

جاڭا وقۋ جىلىندا وڭىردەگى 504 مەكتەپتە 204 مىڭ وقۋشى، سونىڭ ىشىندە، 22 مىڭ ءبىرىنشى سىنىپ وقۋشىسى ءبىلىم الۋدا.

كونتينگەنتى 300-دەن اسپايتىن 279 مەكتەپ شتاتتىق رەجيمدە جۇمىس ىستەپ جاتىر. مۇنداي وقۋ ورىندارىندا 29 مىڭعا جۋىق وقۋشى وقيدى. باستاۋىش جانە بەسىنشى سىنىپ وقۋشىلارى ءۇشىن 6166 كەزەكشى سىنىپتار ۇيىمداستىرعان. بۇل سىنىپتاردا 77 مىڭنان استام بالا وقىپ جاتىر. بۇكىل ءبىلىم بەرۋ مەكەمەلەرىندە سانيتارلىق رەجيم بارىنشا كۇشەيتىلگەن.

سونىمەن قاتار، مەملەكەت باسشىسى قاراعاندى قالاسىنداعى جاڭادان سالىنعان تەننيس ورتالىعىنىڭ جۇمىسىمەن تانىستى. ورتالىقتا ءبىر مەزگىلدە 650 بالا جاتتىعا الادى.

نىساننىڭ ينفراقۇرىلىمى الەمنىڭ ەڭ وزىق ستاندارتتارىنا ساي كەلەدى. مۇندا 11 كورت بار، ونىڭ 7ء-ۋى جابىق. سونىمەن قاتار جالپى جانە ارنايى دەنە شىنىقتىرۋ جۇمىستارىنا ارنالعان زالدار بار.

قاسىم-جومارت توقايەۆقا ورتالىقتىڭ تەحنيكالىق جابدىقتالۋى تۋرالى ەگجەي-تەگجەيلى باياندالدى. 

– قالا ومىرىندەگى وسىنداي ماڭىزدى نىساننىڭ پايدالانۋعا بەرىلۋىمەن قۇتتىقتايمىن. ءبىز ءقازىر بۇقارالىق سپورتتى دامىتۋدى ماقسات ەتىپ وتىرمىز. مىنا سپورت ورتالىعى بارلىق بالالاردىڭ ۇلكەن تەننيسپەن شۇعىلدانىپ، دەنساۋلىعىن كۇشەيتۋگە مۇمكىندىك بەرەدى. بۇل كوپجاقتى ءارى ىڭعايلى نىسان. وسى مۇمكىندىكتى پايدالانا وتىرىپ، قازاقستان تەننيس فەدەراسياسىنىڭ پرەزيدەنتى بولات ءجامىش ۇلى وتەمۇراتوۆقا ريزاشىلىعىمدى بىلدىرەمىن، – دەدى مەملەكەت باسشىسى.

ورتالىقتىڭ جالپى كولەمى 7،8 مىڭ شارشى مەتردى قۇرايدى. وندا ءماجىلىس زالى مەن 2 كافەتەريي جانە قوناق ءۇي كەشەنى بار.

شاھار شارۋاشىلىعىن دامىتۋدىڭ ۇزدىك الەمدىك تاجىريبەلەرىنە سايكەس تەننيس ورتالىعىنىڭ اينالاسىنداعى 1،5 گەكتار اۋماق تولىعىمەن اباتتاندارىلىپلىپ، كوگالداندىرىلعان. نىسان قۇرىلىسىنا جەكە ينۆەستورلار 2،4 ملرد تەڭگە كولەمىندەگى قاراجات سالعان.

سونىمەن قاتار توقايەۆ ۇستەل تەننيسى ورتالىعىنىڭ جۇمىسىمەن تانىستى. ورتالىقتا كۇنىنە 400 ادام ۇستەل تەننيسىن ويناي الادى.

مەملەكەت باسشىسى بۇقارالىق سپورتتى دامىتۋدىڭ، دەنە شىنىقتىرۋمەن جانە سپورتپەن اينالىساتىن حالىقتىڭ سانىن ارتتىرۋدىڭ ماڭىزدىلىعىن اتاپ ءوتتى. 

– بۇل تەك جاتتىعىپ قانا قويماي، حالىقارالىق جارىس وتكىزۋگە بارلىق جاعداي جاسالعان ادەمى ورتالىق ەكەن. ۇستەل تەننيسىنىڭ پرەزيدەنتى دانيار ابىلعازينگە، قاراعاندى وبلىسىنىڭ اكىمى جەڭىس قاسىمبەككە، قازاقستاننىڭ ۇستەل تەننيسىنەن باس باپكەرى ەلميرا الييەۆاعا العىس ايتقىم كەلەدى. بولاشاقتا ۇلكەن جەڭىسكە جەتەسىزدەر دەپ ۇمىتتەنەمىن. كوپ جاتتىقساڭىزدار، جەتىستىك تە مول بولادى، – دەدى قاسىم-جومارت توقايەۆ.

ورتالىق قۇرىلىسىنا قازاقستان رەسپۋبليكاسىنىڭ ۇستەل تەننيسى فەدەراسياسى 1 ملرد 950 ملن تەڭگە قارجى جۇمساعان.

بيىل قاراعاندى وبلىسىندا 85 سپورت نىسانى پايدالانۋعا بەرىلەدى دەپ جوسپارلانعان.