انيا شيەۆچەنكو:

- بىرىنشىدەن، مەن تاۋەلسىزدىك مەرەكەسىن نەمىس تىلىنەن بولاتىن ەكزامەندە اتاپ وتەمىن. قازۇۋ-دىڭ فيلولوگيا فاكۋلتەتىندە وقيمىن، ءقازىر رەسەيدە اكادەميالىق ۇتقىرلىق باعدارلاماسىمەن ءبىلىم الىپ جاتىرمىن. ەكىنشىدەن، 16 كۇنگى مەرەكەنى مىندەتتى تۇردە اتاپ ءوتۋ كەرەك دەپ ويلايمىن.

رومان كاشكۋلي

- شىندىعىن ايتقاندا، مەرەكە مەن ءۇشىن ەمەس، سوندىقتان  وعان تۇكىرگەنىم بار. سىزگە ءدال وسىلاي دەپ جاۋاپ بەرىپ تۇرعان ءبىرىنشى ادام ەمەس شىعارمىن.

امانكەلدى اقىنوۆ:

- تاۋەلسىزدىك كۇنىن نەگىزى جاڭا جىلدان ارتىق تويلاۋىمىز قاجەت. ءبىراق مۇنى ءالى حالىق قابىلداماي جاتىر.

عابيت كادىربايەۆ:

- ازا تۇتۋ كەرەك، ەسكە الۋ كەرەك بوزداقتاردى، تاۋەلسىزدىك كۇنىن 25-قازاندا تويلاۋ كەرەك.

فيراست سو:

- مەرەكەدە ۇيدە بولامىن. ەشقايدا بارمايتىن شىعارمىن. مەنىڭ ويىمشا، بۇل قازالى كۇن.

الماس كوكجال:

-16 كۇنى مەن ءۇشىن، ارينە، مەرەكە. تاۋەلسىزدىك جولىندا قان توگۋلەر بولادى، وڭاي كەلمەيدى. مەن قازاقپىن، ءبىراق، قازاق ازاماتى ەمەسپىن. تاۋەلسىزدىك مەرەكەسى دەپ ايتايىن دەسەم، ءالى تاۋەلسىز  سانالمايمىز. قازاقستانعا كەلىپ، ورىسشا بىلمەگەنىم ءۇشىن جۇمىسقا كىرە الماي، ورىسشا كۋرسقا بارۋىما تۋرا كەلدى.

سەرىك ابىكەن:

-16-جەلتوقسان جاڭاوزەن وقيعاسىنان بەرگىدە ازا كۇنى.

الي بيتورە:

- شىنى كەرەك، وسى كۇنگە دەيىن تاۋەلسىزدىك كۇنىن اتاپ، نەمەسە تويلاپ وتكەن جوقپىن. ءبىراق، جىلدا بولماسا دا تاۋەلسىزدىك مونۋمەنتىنە گۇل شوقتارىن قويىپ كەلەمىن. بۇيىرسا بۇل جىلى دا گۇل شوقتارىن قويىپ كەلۋدى نيەت ەتىپ وتىرمىن. نەگىزىندە 16 جەلتوقسان تاۋەلسىزدىك كۇنى ەمەس، تاۋەلسىزدىك كۇنى 25 قازان. ال، 16 جەلتوقسان "جەلتوقسان قۇرباندارىن" ەسكە الۋ، ازا كۇنى. تاۋەلسىزدىكتى اتاپ، تويلاپ ءوتۋدىڭ قاجەتى جوق. تاۋەلسىز قازاقستان، "ەگەمەندى ەلمىز" دەگەن تىركەستەردى مۇلدە قولدانۋدىڭ قاجەتى جوق. تاۋەلسىز فرانسيا، تاۋەلسىز گەرمانيا مەملەكەتى دەگەندى ەستىپ پە ەدىڭىز؟! جوق. جالپى الەمدە 3-اق تاۋەلسىز مەملەكەت بار، ولار: اقش، رەسەي فەدەراسياسى جانە جۇڭگو. باسقا مەملەكەتتەردىڭ ءبارى تاۋەلدى. تاۋەلسىزدىك كۇنىن اتاپ ءوتۋدىڭ قاجەتى جوق مەنىڭشە!

ەسحات بوجان:

- سۇراعىڭىزعا ن. ماندەلانىڭ سوزىمەن جاۋاپ بەرەيىن: "تاۋەلسىزدىك ءۇشىن تاۋەلسىز اسپاندى ساتىپ الۋدىڭ قاجەتى جوق. تاۋەلسىزدىك جۇرەكتە". مەن 16-سىن قۋانا قارسى الامىن، اعا بۋىندار بىزگە ءوز ازاسىمەن مەرەكە كۇن قالدىردى.

باحىتجان نۇرپەيسوۆ:

- ول كۇنى مەن جۇمىستا بولامىن، ءبىراق، ازا كۇنىن مەرەكە دەپ قارسى الۋ قيىن سياقتى.

الياش، 42 جاستا:

- مەرەكەنى ۇيدە، وتباسىممەن قارسى الامىن. بۇل كۇن مەنىڭ جادىمدا جەلتوقساندىق وقيعامەن قالدى. وعان مەنىڭ سول كەزدە ستۋدەنت بولىپ جۇرگەن تۋعان-تۋىستارىم قاتىناستى. ارينە، ولاردىڭ بارلىعى دا ءدىن امان. ولار ۇنەمى تاۋەلسىزدىكتىڭ قانمەن كەلگەنىن ايتىپ وتىرادى.

ساۋالنامانى دايىنداعان زاميرا پۋلاتوۆا