اسفەندياروۆ اتىنداعى قازۇمۋ يممۋنولوگيا كافەدراسىنىڭ مەڭگەرۋشىسى، مەديسينا عىلىمدارىنىڭ كانديداتى ەلميرا بيتانوۆا الدىن الۋ شارالارىن ۇستانۋ ارقىلى COVID-19 ينفەكسياسىن باسەڭدەتۋگە بولاتىنىن ءمالىم ەتتى. بۇل تۋرالى الماتى قالالىق اكىمشىلىكتىڭ باسپا ءسوز قىزمەتى حابارلادى.
وڭىرلىك كوممۋنيكاسيالار قىزمەتىنىڭ الاڭىندا وتكەن ونلاين-بريفينگ بارىسىندا ەلميرا بيتانوۆا الماتىلىقتاردىڭ ەسىنە كوروناۆيرۋستىڭ الدىن الۋ شارالارىن ۇستانۋدىڭ ماڭىزى جايلى سالدى.
– بۇگىنگى تاڭدا كوروناۆيرۋسقا قارسى پرەپارات جوق ەكەنى بارىمىزگە بەلگىلى. ءبىراق بارىمىزگە جاقسى تانىس الدىن الۋدىڭ قاراپايىم ەرەجەلەرى مەن شارتتارى بار. بۇل كەزەڭدە ۋاقىتىلى ۇيىقتاۋ جانە دەمالىس، كۇن ءتارتىبىن دۇرىس ساقتاۋ وتە ماڭىزدى ەكەنىن اتاپ وتكەن ءجون. ەكىنشىدەن، كۇيزەلىستى جاعدايلاردان اۋلاق ءجۇرۋ قاجەت. بارلىق دەرتتەردى دەر كەزىندە ەمدەپ، اۋرۋدىڭ الدىن الۋ كەرەك. اۋىرىپ ەم ىزدەگەنشە، اۋىرماۋدىڭ جولىن ىزدەگەن ءجون. دۇرىس تاماقتانۋ ادەتىن ۇستانعان ماڭىزدى. يممۋندىق جۇيەگە جۇك ءتۇسىرۋدىڭ قاجەتى جوق، الكوگول تۇتىنۋ مەن تەمەكىنى شەكتەن تىس قولدانۋدى تىيۋ كەرەك. تەك وسىنداي جاعدايدا عانا يممۋندىق جۇيەنى قالىپتى جاعدايدا ۇستاۋعا بولادى. پاندەميا كەزىندە بۇل ماسەلەلەر ودان دا ايقىن بولا ءتۇستى، – دەپ اتاپ وتكەن ول وسى كەزەڭدە دەنساۋلىقتى باقىلاۋ وتە ماڭىزدى ەكەنىن ايتتى.
الدىن الۋ شارالارىنا قاتىستى ە.بيتانوۆا قوعامدىق ورىنداردا الەۋمەتتىك قاشىقتى ساقتاۋدىڭ اسا ماڭىزدىلىعى مەن جۇقتىرۋدى بولدىرماۋ ءۇشىن ءبىر عيماراتتا شوعىرلانۋدان اۋلاق بولۋ قاجەتتىگىن اتاپ ءوتتى.
پىكىر قالدىرۋ