قازاقستاننىڭ كاسىپوداقتار فەدەراسياسى الداعى پارلامەنت ءماجىلىسى مەن ءماسليحات دەپۋتاتتارىنىڭ سايلاۋىنا باقىلاۋشى رەتىندە 5700-گە جۋىق ادامدى بەلگىلەدى. ولار سايلاۋدىڭ اشىقتىعى مەن ءادىل ءوتۋىن باقىلاماق.

– كەشە عانا ءماجىلىس پەن ءماسليحات دەپۋتاتتارى سايلاۋىنا قاتىساتىن كاسىپوداقتار فەدەراسياسى باقىلاۋشىلارىنىڭ رەسپۋبليكالىق شتابىنىڭ ءبىرىنشى وتىرىسىن وتكىزدىك. ءبىز سايلاۋعا باقىلاۋشى رەتىندە قاتىسامىز. بۇگىنگى كۇنى 9500-دەن استام سايلاۋ ۋچاسكەلەرىنە 5700-گە جۋىق باقىلاۋشى ءوز كانديداتۋراسىن ۇسىندى. ءبىز ولارعا پاندەميا كەزىندە ساقتىق شارالارىن تۇسىندىرەمىز. باقىلاۋشىلار وقۋدان جانە ترەنينگتەردەن وتەدى، – دەدى كاسىپوداقتار فەدەراسياسى ءتوراعاسىنىڭ ورىنباسارى نۇرلان وتەشيەۆ كاسىپوداقتار ۇيىندە وتكەن بريفينگتە.

رەسپۋبليكالىق شتابتىڭ مۇشەسى، "مەملەكەتتىك، بانك مەكەمەلەرى جانە حالىققا قىزمەت كورسەتۋ قىزمەتكەرلەرىنىڭ قازاقستاندىق كاسىپوداعى" قوعامدىق بىرلەستىگى ءتوراعاسىنىڭ ورىنباسارى اتاقوزى نۇرلانوۆتىڭ ايتۋىنشا، باستى ماقسات – باقىلاۋشىلاردىڭ جۇمىسىن اشىق جانە ادال ۇيىمداستىرۋ.

– كاسىپوداقتار فەدەراسياسى ءماجىلىس پەن ءماسليحاتتار دەپۋتاتتارىن سايلاۋداعى ەركىن پروسەستەرگە باقىلاۋشى رەتىندە قاتىسۋعا دايىن ەكەنىن مالىمدەدى. وڭىرلەردە ايماقتىق باقىلاۋشىلار شتابى قۇرىلدى، ولارعا ايماقتاردان بارلىق اقپارات كەلىپ تۇسەدى. ءبىزدىڭ ماقساتىمىز – باقىلاۋشىلاردىڭ جۇمىسىن اشىق، شىنايى تۇردە ۇيىمداستىرۋ جانە سايلاۋدىڭ اشىقتىعى مەن ءادىل ءوتۋىن قامتاماسىز ەتۋ. ەڭ باستىسى – ادامنىڭ تاڭداۋ مۇمكىندىگىنە قاتىستى كونستيتۋسيالىق قۇقىعىن قامتاماسىز ەتۋ. مەنىڭ ويىمشا، ءبىز ادالدىقتى، اشىقتىقتى، زاڭناما قاعيداتتارىن ساقتاۋدى قامتاماسىز ەتە الامىز، – دەيدى اتاقوزى نۇرلانوۆ.