26 قاراشا كۇنى "ق ر تۇڭعىش پرەزيدەنتى: جاسامپازدىق پەن ۇدەمەلى دامۋدىڭ 30 جىلى" اتتى حالىقارالىق كونفەرەنسيادا نۇرسۇلتان نازاربايەۆتىڭ تاراپىنا ماقتاۋ سوزدەر كوپ ايتىلدى،  سولاردى توپتاستىرىپ كورەيىك.

قىتايدىڭ بۇكىلقىتايلىق حالىق وكىلدەرى جينالىسى تۇراقتى كوميتەتىنىڭ ءتوراعاسى لي چجانشۋ:

– تۇڭعىش پرەزيدەنت نازاربايەۆ – حالىقارالىق قوعامداستىقتاعى بەدەلدى ساياساتكەر بولۋمەن قاتار، جۇڭگو حالقىنىڭ تىلەۋلەس دوسى رەتىندە ۇزاق ۋاقىتتان بەرى قىتايلىق-قازاقستاندىق تاتۋ كورشىلىك جانە دوستىق ىنتىماقتاستىقتى نىعايتىپ، قىتايدا جوعارى بەدەلگە يە بولىپ كەلەدى.

اقپارات جانە قوعامدىق دامۋ ءمينيسترى ايدا بالايەۆا:

– راسىندا دا قازاق دەگەن ۇلتتى الەمگە تانىتىپ، قازاقستان دەگەن ەلدى دۇنيە تورىنە وزدىرعان ەلباسىنىڭ وسى پاراساتتى ەڭبەگى، ساليقالى ساياساتى. سودان بولار، بۇل مەرەكە ءبىر تۇلعا ەمەس، تۇتاس ۇلتتىڭ، تاۋەلسىز جۇرتتىڭ ورتاق قۋانىشى دەپ نىق سەنىممەن ايتا الامىز.

ق ر تۇڭعىش سىرتقى ىستەر ءمينيسترى تولەۋتاي سۇلەيمەنوۆ:

– نۇرسۇلتان ءابىش ۇلى ساياسي كورەگەندىگىمەن ەلدىڭ بولاشاعى ءۇشىن جاڭا ۇستانىمدى دايارلاي الدى. دەگەنمەن وعان جەتۋ وڭاي ماقسات بولمادى. سول كەزەڭدە ەسكە الساق، بۇل ءوز كەزەگىندە ەلىمىزدىڭ دامۋىنىڭ تراەكتورياسىن ايقىنداعان ەڭ ماڭىزدى تاريحي كەزەڭ بولدى.

ءتورت فيلمدە ەلباسىنىڭ ءرولىن سومداعان اكتەر، ءماجىلىس دەپۋتاتى نۇرلان ءالىمجان:

– "رۋحاني جاڭعىرۋدى" قاراپ، ەلباسىنىڭ ۇلكەن ساياساتىن، ەڭبەگىن كورىپ وتىرمىز. قاي جەرگە بارساق تا، تۇڭعىش پرەزيدەنتتىڭ اتى اتالادى. ەلباسى – ول الەم مويىنداعان ساياساتكەر، بۇكىل تۇركى الەمىنىڭ ابىزى. الەم ەلدەرىنە بارعان كەزدە ەلباسىنى كورگەن ءاربىر ادام تەك قانا جاقسى پىكىرلەرىن ايتىپ جاتقانىن بايقادىق.

تۇركيا ۇلتتىق جينالىسىنىڭ ءتوراعاسى مۋستافا شەنتوپ:

– قازاقستاننىڭ ۇدەمەلى دامۋىندا ەلباسى نۇرسۇلتان نازاربايەۆتىڭ دەموكراتيانى، ادام قۇقىقتارىن جانە زاڭ ۇستەمدىگىن دامىتۋ جولىندا قابىلداعان قادامدارى ماڭىزدى ورىن الاتىنى ءسوزسىز. نۇرسۇلتان نازاربايەۆ – جول باستاۋشى جانە دانالىققا يە تۇلعا. سوندىقتان ونىڭ قۇندى كوزقاراستارىن بۇكىل الەم قولدانۋى كەرەك.