ەلدە جاريالانعان توتەنشە جاعدايدان كەيىن جۇمىسىن باستاعان قالالىق حالىققا قىزمەت كورسەتۋ ورتالىقتارىندا كوروناۆيرۋس پاندەمياسىنا بايلانىستى وزىنە-وزى قىزمەت كورسەتۋ سەكتورلارىنىڭ جۇمىسى شەكتەلگەن. ق ر سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات ءمۋسيننىڭ تاپسىرماسىمەن بۇل ايماقتاردىڭ جۇمىسى قايتا جانداندى، دەپ حابارلايدى Qamshy.kz اقپارات اگەنتتىگى "ازاماتتارعا ارنالعان ۇكىمەت" مەملەكەتتىك كورپوراسياسىنىڭ" باسپا ءسوز قىزمەتىنە سىلتەمە جاساپ.
بۇگىندە رەسپۋبليكالىق جانە وبلىستىق ماڭىزى بار قالالاردا 137 وزىنە-وزى قىزمەت كورسەتۋ ورتالىعى ىسكە قوسىلدى. وندا ازاماتتارعا كەڭەس بەرۋ ءۇشىن مىڭنان استام قىزمەتكەر تارتىلدى. كەلۋشىلەر ونداعى كومپيۋتەرلەر ارقىلى كەرەكتى انىقتامالار مەن ەلەكتروندى قىزمەتتەردى ءوز بەتتەرىنشە الا الادى. وزىنە-وزى قىزمەت كورسەتۋ سەكتورىنداعى ەڭ كوپ الىناتىن قىزمەتتەرگە ەسق راسىمدەۋ، سوتتىلىقتىڭ بولۋى/بولماۋى تۋرالى، ناركولوگيالىق جانە پسيحونيەۆرولوگيالىق ديسپانسەرلەردىڭ ەسەبىندە بولماۋ تۋرالى انىقتامالار الۋ، تۇرعىلىقتى جەر بويىنشا تىركەلۋ جانە ەمحاناعا تىركەلۋ كىرەدى.
ەستەرىڭىزگە سالا كەتەيىك، كارانتين كەزىندە ەلەكتروندى قىزمەتتەردى الۋ ءۇشىن قالالارداعى ساۋدا ورىندارى، جوعارى وقۋ ورىندارى، قالا اكىمدىگى سياقتى ازاماتتار كوپ باراتىن جەرلەردە 700-دەن استام egov بۇرىشتارى ىسكە قوسىلعان. وندا كومپيۋتەر نەمەسە ينتەرنەت بايلانىسى جوق ازاماتتار قاجەتتى انىقتامالار مەن قىزمەتتەردى راسىمدەيتىن. اتالعان بۇرىشتار ءالى دە قىزمەتىن جالعاستىرادى.
بۇعان دەيىن تەگىن الۋعا بولاتىن ەلەكتروندى قىزمەتتەردى اقىلى تۇردە ۇسىناتىن مەكەمەلەردىڭ جۇمىسىنا بايلانىستى ازاماتتاردىڭ شاعىمى كوبەيگەن. ازاماتتارعا ارنالعان ۇكىمەت مەملەكەتتىك كورپوراسياسى ولاردىڭ جۇمىسىنا ەش قاتىسى جوقتىعىن جانە انىقتامالاردى الۋ ءۇشىن بوگدە ازاماتتارعا جەكە مالىمەتتەردى ۇسىنۋ ءقاۋىپتى ەكەنىن ەسكەرتەدى.
مەملەكەتتىك كورپوراسيا قايتا جاندانعان وزىنە-وزى قىزمەت كورسەتۋ ايماقتارىندا بارلىق سانيتارلىق نورمالاردىڭ ساقتالۋىن قامتاماسىز ەتەدى. سونداي-اق وزدىگىنەن قىزمەت الۋشىلارعا بەتپەردە تاعىپ، اراقاشىقتىقتى ساقتاۋ قاجەتتىگىن ەسكە سالادى.
