ەلدە 2021 جىلى وتەتىن سايلاۋدىڭ تاۋەلسىز باقىلاۋشىلارىن وقىتۋمەن اينالىسىپ جاتقان، 2000 جىلدارى "تاۋەلسىز باقىلاۋشىلار جەلىسىن" قۇرىپ، وعان جەتەكشىلىك ەتكەن ساياساتتانۋشى، بەلگىلى قوعام قايراتكەرى دوس كوشىم Azattyq Rýhy اقپارات اگەنتتىگىنە بەرگەن سۇحباتىندا سايلاۋعا قاتىستى ءادىل باعا "بارلىق ۋچاسكەلەردەگى داۋىس بەرۋدىڭ قالاي وتكەنى مەن وندا بولعان جاعدايلار تولىقتاي قامتىلعاندا عانا بەرىلۋگە ءتيىس" دەيدى.

ساياساتتانۋشىنىڭ پىكىرىنشە، ەلدە تاۋەلسىز باقىلاۋشىلار ينستيتۋتى قالىپتاسىپ كەلە جاتىر. ماسەلەن، بىلتىر وتكەن پرەزيدەنت سايلاۋىندا مەملەكەت تاراپىنان قويىلعان باقىلاۋشىلاردان بولەك، وپپوزيسيالىق تاراپتان 6 مىڭ باقىلاۋشى بولعان.

– سايلاۋعا باقىلاۋشى رەتىندە تاۋەلسىز، قوعامدىق ۇيىمداردان بولەك، جۋرناليستەردە قاتىسا الادى. باقىلاۋشىلاردىڭ ءبىر عانا ايىرماشىلىعى – داۋىس ساناۋ كەزىندە بيۋللەتەننىڭ ءارقايسىسىن جەكە-جەكە كورسەتىپ، قاي پارتيانىكى ەكەنىن انىقتاۋىندا. داۋىس ساناۋ كەزىندە عانا پارتيا باقىلاۋشىلارىنىڭ ەكى كوزى وزدەرىنىڭ گرافاسىندا بولىپ، ساياسي پارتيانىڭ باقىلاۋشىسى ەكەنى ەستەرىنە تۇسەدى. ال سايلاۋ پروسەسىنىڭ داۋىس بەرۋىنىڭ بارلىق كەزەڭىندە ولار باقىلاۋشىلاردىڭ ءرولىن اتقارادى. كادىمگى قاراپايىم باقىلاۋشىلار بىرگە جۇرەدى. سايلاۋدىڭ قالاي وتكەنىنە باعا بەرگەن كەزدە، بارلىق ۋچاسكەلەردىڭ باعالاۋ ناتيجەلەرى ەسەپكە الىنۋعا ءتيىس. سايلاۋ ۋچاسكەسىنىڭ 1-2% قاراپ "سايلاۋ ادىلەتسىز ءوتتى" دەۋ ساياسي مادەنيەتكە جاتپايدى. 10000-نان استام سايلاۋ ۋچاسكەسىنىڭ ساناۋلىسىنا عانا قاراپ باعا بەرۋ ارتىقتاۋ، – دەدى دوس كوشىم.

ساياساتتانۋشى بۇگىنگى تاڭدا حالىقتىڭ سايلاۋعا قاتىستى ساۋاتى ارتقانىن جاسىرمادى.

– بىلتىرعى سايلاۋدا ۇلكەن ۇيىمدارمەن قاتار اۋدانداردىڭ وزىندەگى سايلاۋشىلار قالادا، اۋىلداردىڭ وزىندە سايلاۋدىڭ نە ەكەنىن ءبىلىپ، وزدەرىنىڭ باقىلاۋشىلارىن قويا باستادى. مەنىڭ ويىمشا، بۇل ۇلكەن ءبىر العا باسقان قادام. قاراپايىم ازاماتتار، قاراپايىم سايلاۋشىلار وزدەرىنىڭ داۋىستارىنا وزدەرى باقىلاۋ جاساۋ دەڭگەيىن ءبىلدى، ءتۇسىندى. جالپى باقىلاۋشى دەگەن نە ەكەنىن، باقىلاۋشى ينستيتۋتىنىڭ سايلاۋ بارىسىندا قانداي ءرول اتقاراتىنىن حالىق ءتۇسىنىپ قالدى، – دەيدى مامان.

2021 جىلدىڭ 10-قاڭتارى كۇنى پارلامەنت ءماجىلىسى مەن جەرگىلىكتىا ءماسليحاتتاردىڭ سايلاۋى وتەدى. بيىل "Nur Otan" پارتياسى دا پارتيالىق باقىلاۋشىلاردىڭ سايلاۋداعى ءرولىن ارتتىرۋعا كۇش سالىپ وتىر. ساياسي ۇيىم 30 مىڭ باقىلاۋشىنى 10 قاڭتاردا وتەتىن سايلاۋعا بايقاۋشى رەتىندە قاتىستىرماق.