بۇگىن پرەمەر-مينيسترىنىڭ ورىنباسارى ەرالى توعجانوۆ جۇمىس ساپارىمەن الماتى قالاسىنا كەلدى. الماتى قالاسىنىڭ اكىمى باقىتجان ساعىنتايەۆپەن بىرلەسىپ قالانىڭ 70-تەن استام اۋرۋحانالارى مەن ەمحانالارىنىڭ باس دارىگەرلەرىنىڭ قاتىسۋىمەن بەينەبايلانىس رەجيمىندە اۋقىمدى جينالىس وتكىزىلدى، دەپ حابارلادى الماتى اكىمىنىڭ باسپا ءسوز قىزمەتى.
اقپاراتتىق حابارلامادا كەزدەسۋدە قازىرگى ەپيدەميولوگيالىق جاعدايدىڭ وزەكتى ماسەلەلەرى جانە مەگاپوليستە COVID-19 تارالۋىنا جول بەرمەۋ بويىنشا قابىلدانىپ جاتقان شارالار قارالعانى باياندالعان.
ەرالى توعجانوۆ قالادا سىرقاتتانۋشىلىقتىڭ وسۋىنە، سونداي-اق COVID-19 پتر دياگنوستيكاسىنىڭ ماسەلەسى بويىنشا زەرتحانالاردىڭ جۇمىسىن ۇيلەستىرۋدىڭ ماڭىزدىلىعىنا نازار اۋداردى.
– بۇگىن قويىلعان مىندەتتەردى بۇگىن قالانىڭ باس سانيتارلىق دارىگەرىمەن بىرلەسىپ تالداپ، قاجەتتى شارالار قابىلداۋدى سۇرايمىن، – دەپ اتاپ ءوتتى ە. توعجانوۆ.
جيىن قورىتىندىسى بويىنشا ەرالى توعجانوۆ تومەندەگىدەي تاپسىرمالار بەردى:
- قىزمەتكەرلەر سانى 15 جانە ودان دا كوپ ادامدى قۇرايتىن ۇيىم قىزمەتكەرلەرىنىڭ 60-80%-ىن قاشىقتىقتان جۇمىس ىستەۋ رەجيمىنە كوشىرۋ؛
- مەكتەپكە دەيىنگى بالالار مەكەمەلەرىندە قوسىمشا كەزەكشى توپتار، قالا مەكتەپتەرىندە كەزەكشى سىنىپتار اشۋدى توقتاتا تۇرۋ؛
- جەكسەنبى كۇندەرى سانيتارلىق كۇنگە جابىلا وتىرىپ، سوو، ساۋدا وبەكتىلەرىنىڭ جۇمىسىن سەنبى كۇنى ساعات 17.00-گە دەيىن شەكتەۋ؛
- قوعامدىق تاماقتانۋ وبەكتىلەرىنىڭ، ونىڭ ىشىندە ساۋدا ويىن-ساۋىق ورتالىقتارىندا ورنالاسقان نىسانداردىڭ قىزمەتىنە ساعات 19.00-دەن 23.00-گە دەيىن، ۇجىمدىق ءىس-شارالار وتكىزبەي، باس سانيتار دارىگەر قاۋلىسىنىڭ تالاپتارىن ساقتاي وتىرىپ، وتىراتىن ورىندار سانى 50-دەن اسپاعان جاعدايدا قىزمەتىنە رۇقسات ەتۋ؛
- ونەركاسىپتىك، قۇرىلىس، كولىك كاسىپورىندارىنىڭ قىزمەتكەرلەرىن جۇمىسقا جەتكىزۋ جانە تاسىمالداۋ ءۇشىن ۇيىمدارعا قىزمەتتىك كولىكتى ۇسىنۋ؛
- باس سانيتار دارىگەر قاۋلىسىنىڭ تالاپتارىن ساقتاي وتىرىپ، جۇمىس كۇندەرى ساعات 10.00-دەن 18.00-گە دەيىن، سەنبى كۇندەرى ساعات 10.00-دەن 15.00-گە دەيىن جۇمىس كەستەسىن بەلگىلەي وتىرىپ حقكو جۇمىسىن ۇيىمداستىرۋ؛
- تەستىلىك رەجيمدە جۇمىس ىستەۋ كەزىندە بەلگىلەنگەن شەكتەۋ شارالارىن ساقتاي وتىرىپ، تۋريزم وبەكتىلەرىنىڭ جۇمىسىن جالعاستىرۋ.
پىكىر قالدىرۋ