17-18 جەلتوقسان كۇندەرى ساعات 21: 40-تا، ال 19 جەلتوقسان كۇنى ساعات 22.00-دە «حابار» تەلەارناسىنان «پوليگون» تەلەحيكاياسى كورەرمەنگە جول تارتادى.
ساياسي دەتەكتيۆ جانرىندا تۇسىرىلگەن التى سەريالىق كينوتۋىندى حح عاسىردىڭ 80-جىلدارىنىڭ سوڭىنداعى قازاق حالقىنا اجال وتىن شاشىپ كەلگەن سەمەي يادرولىق پوليگونىنىڭ جابىلۋىنا ىقپالىن تيگىزگەن تاريحي وقيعالاردى قامتيدى.
– بۇل جوبانى ىسكە اسىرۋ ءۇردىسى شامامەن 4-5 ايعا سوزىلدى. فيلمدە تاريحي فاكتاج بەن كوركەم شىعارماشىلىقتى بىرىكتىرگىم كەلدى. مەن الەمگە تانىلعان «كارتالار ءۇيى» تۋىندىسىنان شابىت الدىم. ءبىز شىندىقتى ەمەس، اقيقاتتى ىزدەدىك. مەن «حابار» اگەنتتىگىنە پوليگون تاقىرىبى كوتەرىلگەنى ءۇشىن العىسىمدى ايتقىم كەلەدى، – دەدى سەريالدىڭ رەجيسسەرى احات يبرايەۆ.
حيكايا جەلىسى بىرنەشە باستى كەيىپكەرلەردىڭ اينالاسىندا داميدى. ولاردىڭ اراسىندا ومىردە بولعان تۇلعالار جانە ويدان شىعارىلعان كەيىپكەرلەر دە بار. تاريحتىڭ قاسىرەتتى بەتتەرىندە ءىز قالدىرعان كەزدى سۋرەتتەيتىن تۋىندىدا يادرولىق سىناق الاڭىنان زارداپ شەككەن تۇرعىندار، ولارعا قارسى تۇرعان پوليگون باستىعى، مقب (مەملەكەت قاۋىپسىزدىگىن قورعاۋ كوميتەتى) اگەنتتەرىنىڭ تاعدىرى شىنايى كورسەتىلەدى. 
تەلەحيكايادا قازاقستان كومپارتياسى سەمەي وبلىستىق كوميتەتىنىنىڭ ءبىرىنشى حاتشىسى كەشىرىم بوزتايەۆتىڭ وبرازى بەينەلەنگەن. قايعى مەن قاسىرەتتەن كوز اشپاعان قازاق ەلىنە يادرولىق سىناقتاردىڭ ەكولوگيا مەن دەنساۋلىققا كەرى اسەرى تۋرالى ماسەلەنى كوتەرگەن قوعام قايراتكەرىنىڭ باتىلدىققا تولى كۇرەس جولى كورەرمەندى سەلقوس قالدىرماسى انىق.
كينوتۋىندىدا گولوششەكين، كولبين، ولجاس سۇلەيمەنوۆ، نۇرسۇلتان نازاربايەۆ سىندى تاريحي تۇلعالاردىڭ رولدەرى شەبەرلىكپەن سومدالعان. سونىمەن قاتار، فيلمدە جارلىقتارى سەمەيدە اجال اپانىنىڭ اشىلۋىنا اكەلگەن كسرو پرەزيدەنتى ميحايل گورباچيەۆ تە كورىنىس تاپقان. 
سەريالدىڭ باستى رولدەرىندە تانىمال اكتەرلەر ازامات ساتىبالدى، ەرجان ءبىلال، جانداربەك سادىربايەۆ، سەرگەي ماتۆەيەۆ، دەنيس اننيكوۆ، الەكسەي شەمەس، اسان ءماجىت، انەل سايلاۋوۆا، مۇرات نۇراسىلوۆ، ۋليانا شتيلمان، الىمبەك ورازبەكوۆ ويناپ شىقتى.
بىرنەشە جىلعا سوزىلعان رەسپۋبليكا باسشىلارى باستاعان حالىق كۇرەسى، ورتالىق مەملەكەتتىك جانە پارتيالىق بيلىككە قارسىلىق، قاقتىعىستار مەن ساياسي شيەلەنىستەر، جەكە تۇلعالاردىڭ ەرلىگىنە تولى تاريحي كەزەڭدى بەينەلەگەن «پوليگون» تەلەحيكاياسىن 17-18 جەلتوقسان كۇندەرى ساعات 21:40-تا، ال 19 جەلتوقسان كۇنى ساعات 22.00-دە «حابار» تەلەارناسىنان جىبەرىپ الماڭىزدار.
پىكىر قالدىرۋ