شىمكەنت قالاسى مادەنيەت، تىلدەردى دامىتۋ جانە ارحيۆتەر باسقارماسى باسشىسىنىڭ مىندەتىن اتقارۋشى حانزادا ەسەنوۆانىڭ وكىمىمەن "شىمكەنت قالالىق مادەنيەت ءۇيى" كونسەرتتىك ۇيىمى" مكقك ديرەكتورىنىڭ مىندەتىن اتقارۋشىسى بولىپ ساكەن مايعازييەۆ تاعايىندالدى. بۇل تۋرالى شىمكەنت مادەنيەت باسقارماسىنىڭ باسپا ءسوز قىزمەتى حابارلادى.

ساكەن قورداباي ۇلى – قازاقستان رەسپۋبليكاسىنىڭ مادەنيەت قايراتكەرى، قازاقستاننىڭ ەڭبەك سىڭىرگەن قايراتكەرى، "دارىن" مەملەكەتتىك جاستار سىيلىعىنىڭ يەگەرى.

ول 1975 جىلى 1 قاڭتاردا تۇركىستان وبلىسى، سوزاق اۋدانىندا دۇنيەگە كەلگەن.

1993 جىلى ج.ەلەبەكوۆ اتىنداعى رەسپۋبليكالىق ەسترادا – سيرك كوللەدجىندە "سوقپالى اسپاپتار جانە ەسترادا ءانشىسى" بولىمىنە تۇسكەن.

1997 جىلى ت.جۇرگەنوۆ اتىنداعى "ونەر" اكادەمياسىنىڭ "ەسترادا ءانشىسى" ءبولىمى بويىنشا ءبىلىم العان.

2001 جىلدان باستاپ "مۋزارت" توبىنىڭ مۇشەسى.

2012 جىلدان باستاپ – ج.ەلەبەكوۆ اتىنداعى ەسترادا جانە سيرك كوللەدجىندە ۇستاز قىزمەتىن اتقاردى.

2018-2020 جىلدارى ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ شىعارماشىلىق جۇمىستار جانە حالىقارالىق بايلانىستار جونىندەگى پرورەكتورى قىزمەتىن اتقاردى.