12 جاستاعى قىز 6 جىل قۇلدىقتا بولعان. ول اناسى جانە اجەسىمەن تاشكەنتتەن (وزبەكستان) الماتىعا كەلەدى. اناسى اجەسىنىڭ قۇجاتتارىن بىرەۋگە كەپىلگە بەرىپ ءوزى ولاردى تاستاپ بەلگىسىز جەرگە كەتىپ قالعان. ول ۋاقىتتا قىزدىڭ جاسى 11-دە ەدى. اناسىنىڭ قۇربىسى ولارعا ۇيىندە ۋاقىتشا تۇرۋعا رۇقسات بەرەدى. كوپ ۋاقىت وتپەي ولاردىڭ ومىرىندە ا پايدا بولدى. ول قىز بەن اجەسىنە شۇلىق، ورامال سەكىلدى تاۋاردى ساتۋدى ۇسىنادى. اجەسىنىڭ قۇجاتى جوق، ال قىزدىڭ تەك تۋۋ تۋرالى كۋالىگى عانا بار بولعاندىقتان امالسىز كەلىسەدى. ءبىر اي اجەسى مەن قىزى پاتەر جالداپ تۇرادى، ودان كەيىن ا ولاردى اتا-اناسىنىڭ ۇيىنە كوشىرىپ اكەلەدى. ا-نىڭ اناسى ءبىرىنشى كۇنى-اق ەكەۋىنە ءۇي جۇمىسىن ىستەۋگە ماجبۇرلەگەنىن ەسكە الدى. ولاردىڭ كۇنى وزگەرمەيتىن سەنارييمەن وتەتىن. اجەسى مەن نەمەرەسى ءۇي جيناپ، تاماق ءپىسىرىپ، كىر جۋىپ، 15 الابايدى تاماقتاندىرۋمەن اينالىساتىن. ا-نىڭ اكەسى يتتەردى ساتۋمەن اينالىسادى.

قىز 12 جاسقا تولعاندا ا (ونىڭ جاسى ول ۋاقىتتا 24 ەدى) ۇيدە ولاردىڭ جالعىز قالعانىن پايدالانىپ قىزدى زورلايدى. قىز جىنىستىق قاتىناسقا تۇسۋگە فيزيكالىق تۇرعىدا جەتىلمەسە دە ا قىزدى كۇندە زورلاۋدى ادەتكە اينالدىرعان. قىز ا-نىڭ اناسىنا بولعان جاعدايدى باياندادى، الايدا ا-نىڭ اناسى بۇل جاعداي تۋرالى ەشكىمگە ءتىس جارماۋىن تالاپ ەتكەن. زورلاۋ تۋرالى قىزدىڭ اجەسى ەستىگەندە جانجال شىقتى. سول ۋاقىتتا ا-نىڭ اكەسى ارالاسىپ، بىرەۋگە شاعىمدانسا ولاردىڭ سوڭىنا ءتۇسىپ، بوتەن ەلدە جۇرگەنىن ەسكە سالىپ،  «بىت-شىتىن» شىعارىپ، قالدىقتارىن يتتەرگە بەرەمىن دەپ قورقىتقان.

ءبىر جىلدان كەيىن قىز 14-كە تولعاندا بالا كوتەرەدى. جۇكتىلىك تۋرالى اجەسى بىلمەيدى. ا-نىڭ اتا-اناسى اجەسى ءىستىڭ ءمان-جايىن تۇسىنبەي تۇرعاندا ودان قۇتىلۋدىڭ جولدارىن ىزدەيدى. اجەسىن قۋىپ، قىزدى ۇيدە قالدىرادى.

جۇكتىلىك كەزىندە قىزدى دارىگەرگە اپارماعان. ا كامەلەت جاسقا تولماي تۇرىپ قىلمىسقا بارعان، ۇيىنەن ءجيى قاشىپ كەتىپ جۇرگەن. قىزدى ۇيگە كوشىرىپ الىپ كەلگەننەن كەيىن ۇيدەن جىراققا كەتۋدى قويعان. ۇيدە تەگىن ءۇي قىزمەتكەرىن، بالاسىنا سەكس قۇلدىقتا بولاتىن «ايەل» ۇستاۋ وتباسى ءۇشىن ءتيىمدى ەدى.

وتباسى قىزدى جۇكتىلىك كەزىندە قاماۋدا ۇستاپ، اجەسىمەن تەلەفونمەن سويلەسكەندە قاسىندا وتىرىپ، ءار ءسوزىن اڭدىعان.

پەرزەنتحاناعا بارماس بۇرىن ا-نىڭ اناسى بالاسى تۇرمەگە وتىرماۋى ءۇشىن دارىگەرلەرگە ايتاتىن سوزدەرىن الدىن الا دايىنداپ، ايتقانىن بۇلجىتپاي قايتالاۋىن تالاپ ەتەدى.

قىز  اۋىر بوساندى. دارىگەرلەر جاتىردى الىپ تاستاۋدى ويلادى، قۋانىشقا وراي ونى امان الىپ قالدى.

ا-نىڭ اناسى پوليسياعا قىزدىڭ وزبەكستان ازاماتىمەن بايلانىسقا ءتۇسىپ، ودان بالا كوتەرگەنىن ايتادى. قىزدى انا مەن بالا ۇيىنە الىپ كەتەدى. بۇل ۋاقىت قىز اۋىر دەپرەسسيادا بولعاندىقتان كوپ جاعداي ەسىندە جوق. قىز كۇنى بويى تەرەزەگە قاراپ ءۇنسىز وتىراتىن بولعان.  انا مەن بالا ءۇيىنىڭ قىزمەتكەرلەرى قىزدى ەسىنەن اۋىسقان دەپ ويلاعان. 

ەكى اپتا وتكەننەن كەيىن ا-نىڭ اناسى قىزدى ءوز قامقورلىعىنا العىسى كەلەتىنىن ايتىپ، انا مەن بالا ءۇيى قىزمەتكەرلەرىنىڭ سەنىمىنە كىرىپ، قىز بەن ءسابيدى الىپ كەتكەن.

زاڭسىزدىق ءۇشىن جازاسىن وتەمەگەننەن كەيىن قىزدى قۇلدىقتا ۇستاعان وتباسى ودان سايىن كۇشىنە ءمىندى.

قىز 16-عا تولعاندا ەكىنشى بالانى دۇنيەگە اكەلگەن. ول ۋاقىتتا قىزدىڭ بەلگىسىز بىرەۋمەن ءوز قالاۋىمەن جىنىستىق قاتىناسقا ءتۇسىپ، ودان بالا كوتەرگەنىن ايتقان. ەكىنشى جۇكتىلىك كەزىندە دە قىزدى دارىگەردىڭ تىركەۋىنە قويماعان، تەكسەرمەگەن.

ۇل بالا دۇنيەگە كەلگەننەن كەيىن ول قاتتى اۋىردى. ءسابيدىڭ ءىشى اۋىرىپ، قۇسقان. قىز ۇلىن دارىگەرگە كورسەتۋىن وتىنسە دە بالاعا مەديسينالىق كومەك كورسەتىلمەدى. ءۇش ايدان كەيىن ءسابي شەتىنەپ كەتتى.

ا قاماۋعا الىندى. ونىڭ اتا-اناسى بوستاندىقتا، ياعني انا مەن قىزدىڭ ومىرىنە ءقاۋىپ ءتونىپ تۇر دەپ قاۋىپتەنەدى دينا ءتاڭسارى. ولاردى مەملەكەت قورعاۋى كەرەك دەگەن ويدا.

قىز قۇلدىقتا بولعان 6 جىلدا بىردە ءبىر رەت ءوز ەركىمەن جىنىستىق قاتىناسقا تۇسپەگەن. قىز جىنىستىق قاتىناس كەزىندە اۋىرلىق سەزىمىن سەزىنگەنىن جانە ول تۋرالى تالاي مارتە ايتسا دا ا ونى زورلاۋىن توقتاتپاعانىن ايتتى.

الماتىلىقتار قىز بەن بالاسىنا ماتەريالدىق جانە مورالدىق كومەك كورسەتتى. دينا ءتاڭسارى جينالعان قارجىعا ازىق-تۇلىك، دارى-دارىمەك پەن باسقا دا قاجەتتى زاتتار ساتىپ الىنعانىن ايتادى. قايىرىمدىلىققا 393 555 تەڭگە جينالدى. ءقازىر قىز بەن اناسى تۋۋ تۋرالى كۋالىك الدى. ءىس ق ر ءبىلىم جانە عىلىم مينيسترلىگى، وزبەكستاننىڭ بالالار ومبۋدسمەنىنىڭ قاراۋىندا.

قىز بەن ونىڭ بالاسىنا كومەكتەسكىسى كەلەتىندەر المات مۋحامەدجانوۆتىڭ اتىنا تىركەلگەن +7705 151 0000 نومىرىنە «الماتىداعى قىزعا» (دليا ديەۆوچكي يز الماتى) دەپ جازىپ اقشا جىبەرە الادى.

بۇگىن دينا ءتاڭسارى جەلىدە قىزدىڭ اجەسى جۇمىس تاپقانىن جازدى. وزبەكستاننىڭ قازاقستانداعى باس ەلشىسى قابىلداعانىن حابارلادى. وزبەكستان ەلشىلىگى وتباسى مۇشەلەرىنە قۇجات الۋعا كومەكتەسپەك.