بوكسشى ەرماحان يبرايموۆ Instagram پاراقشاسىندا 10 قاڭتاردا الماتىدا تاۋەلسىزدىك الاڭىندا وتكەن ميتينگكە نە ءۇشىن بارعانىن جانە وندا بولعان جاعدايعا بايلانىستى تۇسىنىكتەمە بەردى.
"اسسالاۋماعالەيكۇم، قۇرمەتتى قازاق ەلى جانە الماتىلىقتار!!!
مەن، يبرايموۆ ەرماحان ساعي ۇلى، 10.01 كۇنى تاۋەلسىزدىك الاڭىندا بولعان جايتقا قىسقاشا اقپارات بەرىپ كەتەيىن.
قۇرمەتتى، وتانداستار!!! وسى ۋاقىتقا دەيىن مەن حالقىممەن بىرگە بولدىم جانە ءالى دە بىرگە بولاتىنىمدى ايتقىم كەلەدى. ميتينگ كەزىندە نارازىلىق بىلدىرگەن حالىققا كۇش كورسەتۋ ماقساتىندا ەمەس، سابىرعا شاقىرۋ ءۇشىن بارعان بولاتىنمىن. ءبىراق، قارسى توپتاردىڭ بەلسەندىلەرى ماعان كەرى پىكىر ءبىلدىرىپ، مەنىڭ جەكە نامىسىما تيەتىن سوزدەر ايتىپ جاتقاسىن، جاقىنداپ بارىپ، ءبارىن تۇسىندىرمەكشى بولدىم. سول تۇستا قارسى توپتاردىڭ ارانداتۋشىلارى مەنى كادرعا الىپ، ءتۇرلى باعىتتا اقپاراتتار تاراتىپ جىبەرگەن بولاتىن.
ءيا، الەۋمەتتىك جەلىلەردە سۋرەتىم مەن ۆيدەو تاراپ كەتىپ، ماعان كەرى پىكىرلەر ايتىلۋدا. ونىڭ ءبارىن سىني تۇرعىدا قابىلدايمىن.
الايدا مەن وسى سايلاۋعا قاتىسۋىمنىڭ سەبەبى دە قاراپايىم حالىق ءۇشىن ەكەنىن تاعى دا ايتقىم كەلەدى. سەبەبى توبەمە كوتەرىپ، قۇرمەتتەگەن حالىققا قارسى شىعۋ مەنىڭ ويىمدا دا بولماعان!
سوندىقتان ءقادىرلى قازاق ەلى، ميتينگ كەزىندە بولعان جاعدايدى قىسقاشا وسىلاي تۇسىندىرگىم كەلەدى. بارلىعى الدا. ەل مۇددەسى ءۇشىن الدا ءالى دە يگىلىكتى ىستەردى اتقاراتىن بولامىن.
قۇرمەتپەن، يبرايموۆ ەرماحان ساعي ۇلى!،" دەپ جازدى سپورتشى.
پىكىر قالدىرۋ