ادەتتە بالا قۇشاقتاپ قايىر تىلەپ جۇرگەندەردىڭ قولىنداعى سابيلەرى ولاردى ءبىر ساتكە دە مازالامايدى. كۇننىڭ ىستىعىندا، قىستىڭ ايازىندا دا ولار قۇنداقتاۋلى بالامەن كوشە ارالاپ كۇنەلتەدى. وسىدان ەكى جىل بۇرىن ءولى بالانىڭ دەنەسىمەن قايىر تىلەپ جۇرگەن كەلىمسەكتەردىڭ ۇستالعانىن اقپارات كوزدەرى حالىققا جەتكىزگەن بولاتىن. ەندىگى جاعداي دا- جاعا ۇستارعا جارارلىق جاڭالىق بولىپ تۇر. الماتى قالاسىنىڭ مەدەۋ اۋدانىندا قايىر تىلەپ جۇرگەن ايەلدەردىڭ قولىندا بالا ەمەس، قۇنداقتاۋلى قۋىرشاق بولعان ەكەن. بۇل تۋرالى «قامشى» پورتالى الماتى قالاسىنىڭ ءىىب باسپا ءسوز قىزمەتىنە سىلتەمە جاساي وتىرىپ حابارالايدى. تەكسەرۋ بارىسىندا ۇستالعان ءۇش ايەلدىڭ بىرەۋىنىڭ عانا قولىندا شىنىمەن بالا بولعان. ال، قالعان ەكەۋى قۋىرشاقپەن حالىقتى الداپ كەلگەن.
«ايەلدەر قۋىرشاقتى وراپ الىپتى. وزبەكستان ازاماتشالارى بۇل قادامعا جەڭىل اقشا تابۋ ماقساتىندا بارعان. ولار ءبىزدىڭ ەلگە كوشى-قون زاڭدارىن بۇزۋ ارقىلى كەلگەن ەكەن. تەكسەرۋ كەزىندە ءتىپتى ولاردىڭ قۇجاتتارى دا جوق بولىپ شىقتى.»،-دەيدى مەدەۋ اۋداندىق ءىىب باسشىسى، پوليسيا پولكوۆنيگى ەرلان ورالبايەۆ.
وڭاي جولمەن اقشا تابۋدى كوزدەگەن تىلەمسەكتەر الدىمەن حالىقتىڭ پسيحولوگياسىن زەرتتەپ الاتىنى ءسوزسىز. جەڭىل جولمەن اقشا تاپقىسى كەلگەن قۋىرشاق-بالالى «انالار» ءبىزدىڭ حالىقتىڭ جاناشىرلىعىنا ابدەن سەنىم ارتسا كەرەك. دەمەك، وتانداستارىمىزدىڭ اراسىندا بالا قۇشاقتاعان انا كورسە، جۇرەگى ەلجىرەي قالاتىندار از ەمەس دەگەن ءسوز. الدە، بيلىگى مەن قالاۋلىلارىنا الدانا بەرەتىن قازاقتىڭ سول ءبىر اڭعال مىنەزىن كەلىمسەكتەر دە پايدالانعىسى كەلە مە؟ دەمەك، باسقانى قويعاندا، ءبىزدى قايىرشىعا دەيىن الداپ ءجۇر ەكەن عوي. ساداقا بەرگەن جاقسى عوي. بالكىم بوگدە ەلدە كۇنەلتىپ جۇرگەن ولاردىڭ دا جاعدايى ءماز ەمەس بولار. دەگەنمەن، ءسىزدىڭ مەيىرىمدىلىگىڭىزدى اقشا تابۋدىڭ وڭاي جولىنا اينالدىرۋعا ەشكىمنىڭ حاقىسى جوق. تەڭگەمىز قۇنسىزدانىپ، ەڭ كەدەي مەملەكەتتەردىڭ ساناتىنان تابىلىپ وتىرعان شاقتا قۋىرشاق- قايىرشىلاردىڭ كوز جاسىن سۇرتەتىندەي جاعدايدا ەمەسپىز.
اينۇر تولەۋ
