11 قىركۇيەك كۇنى «قامشى» پورتالىندا قوستاناي جانە اقتوبە  وبلىستارى اكىمدەرى قىزمەتتەرىنەن بوساتىلۋى مۇمكىن اتتى ماقالا جاريالانعان بولاتىن.    

وندا قوستاناي وبلىسىنىڭ اكىمى قىزمەتىنە ءۇش بىردەي كىشى شەنەۋنىكتىڭ كانديداتۋراسى قاراستىرىلۋدا دەلىنگەن.

بۇل جاڭالىق قازاقستاندىق باق-ندا جاريالانىپ ۇلگەرمەي جاتىپ، 14:00-دە ۇكىمەت باسشىسى كارىم ءماسىموۆ قوستاناي جۇرتشىلىعىنا جاڭا اكىمدى، دالىرەك ايتساق، اقتوبە وبلىسىنىڭ بۇرىنعى اكىمى ارحيمەد مۇحامبەتوۆتى تانىستىرعان. وسىلايشا 51 جاستاعى نۇرالى سادۋاقاسوۆتىڭ ورىنتاعى ەندىگى جەردە جاڭا اكىم – 43 جاستاعى ارحيمەد مۇحامبەتوۆكە تيەسىلى بولدى.

ال قوستاناي وبلىسنىڭ بۇرىنعى اكىمى نۇرالى سادۋاقاسوۆتىڭ قىزمەتىنەن  نە سەبەپتى كەتكەنى تۋرالى ناقتى اقپاراتتار جاريالانباعانىمەن، سوڭعى ۋاقىتتا قازاقستاندىق بۇقارالىق اقپارات قۇرالدارىن شۋلاتقان «ساۋناداعى قويىلىم» سەبەپ بولۋى مۇمكىن دەگەن سىبىس تاراعان. اقوردا مەن ۇكىمەتتەگى توسىن ءاۋىس-تۇيىس ساياسي ساراپشىلاردى دا تاڭقالدىرىپ وتىرعانى جاسىرىن ەمەس. دەسەك تە، پرەزيدەنت مىرزا اقتوبە وبلىسىنىڭ اكىمى لاۋازىمىنا كىمدى تاعايىندايدى دەگەن ساۋال ءالى جاۋابىن تاپقان جوق.

İnformburo.kz سايتىنىڭ حابارلاۋىنشا،  ۆيسە-پرەمەر-مينيستر بەردىبەك ماشبەك ۇلى ساپاربايەۆ اقتوبە وبلىسىنىڭ جاڭا اكىمى بولىپ تاعايىندالدى.

1990-جىلدارى بەردىبەك ماشبەك ۇلى قىزىلوردا، وڭتۇستىك قازاقستان وبلىستارىنىڭ اكىمى بولدى. ءار جىلدارى بيۋدجەتتىك جوسپارلاۋ جانە ەكونوميكا ۆيسە-مينيسترى، ەڭبەك جانە الەۋمەتتىك قورعاۋ ءمينيسترى ت.ب. لاۋازىمدى قىزمەتتەردە بولعان. بەردىبەك ماشبەك ۇلى ساپاربايەۆ 2009 جىلى شىعىس قازاقستان وبلىسىنىڭ اكىمى بولىپ تاعايىندالعان. ال 2014 جىلدان باستاپ ق ر پرەمەر-مينيسترىنىڭ ورىنباسارى بولىپ قىزمەت اتقارىپ كەلدى.

ساپاربايەۆ ۇكىمەتكە نەسىمەن جاقپاي قالدى؟

دەموگوگياعا قۇرىلعان ق ر ۇكىمەتىنىڭ تۇررالاعان تىرشىلىگى تۋرالى «قامشى» پورتالى از جازباعان. قانشا جىلدان بەرى ءجىبى ءتۇزۋ باسشىعا جارىماي كەلگەن قازاقستان ۇكىمەتىنە بەردىبەك ماشبەك ۇلىنىڭ كەلۋى – جوعارعى بيلىكتە «رەنەسسانس» ءداۋىرى باستالعانمەن پارا-پار ەدى. ۇكىمەت جاساعىنا قوسىلعانىنا ءبىر عانا جىل بولعانىمەن بەردىبەك ساپاربايەۆ حالىقتىڭ كوز الدىندا ادەتتەگى تىنىمسىزدىعىمەن قالدى. ءبىر جىل، ارينە، از ۋاقىت ەمەس. Cونىمەن، ساپاربايەۆ ءبىر جىل ىشىندە نە تىندىردى؟ نە اتقاردى؟ نەنى ۇمىت قالدىردى؟ «قامشى» پورتالى ساراپتاپ كورگەن بولاتىن.

بەردىبەك ساپاربايەۆتىڭ ۇكىمەتتەگى  ءبىر جىلدىق قىزمەتىنەن تۇيگەنىمىز، ۇيالماي ءسوز ەتەرلىك ءبىرشاما اۋقىمدى شارۋالار اتقارىلىپتى. بارلىق سالادا.

ەكونوميكا بولسىن، الەۋمەتتىك سالا بولسىن، رۋحانيات سالاسى بولسىن… 

ءبىلىم جانە عىلىم ءمينيسترى اسلان ءسارىنجىپوۆتىڭ ىزىنە شام الىپ تۇسكەنى تۋرالى وسىعان دەيىن جازعان بولاتىنبىز. بەردىبەك ماشبەك ۇلىنىڭ سەستى سوزدەرىنەن سيتاتالار كەلتىرە كەتەتىن بولساق، «ەلىمىزدىڭ جوعارعى وقۋ ورىندارىن باس پروكۋراتۋرا جاپپاي تەكسەرتەمىن» دەدى، «سانالى ستۋدەنت ەمەس، بولاشاق جۇمىسسىزداردى ازىرلەپ جاتقان   ۋنيۆەرسيتەتتەر مەن كوللەدجدەردىڭ ەسىگىنە قارا قۇلىپ سالىنادى. ال وبلىستاردى ايتپاعاندا، استاناداعى ماقتاۋلى ەكى وقۋ ورنىن ارالاعان    بەردىبەك ساپاربايەۆ ونى كورىپ ۇيالدىم»، دەدى. 

رەفورما قۋعىش ءبىلىم ءمينيسترىن قاتال سىنعا الدى، استانادا وتىرىپ الىپ ايماقتاعى بىلىقتى بىلمەيتىن  ءسارىنجىپوۆتءىڭ شاڭىن قاقتى.

ق ر دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆاعا دا ءبىراز شۇيلىككەن. «سىلبىر جۇمىس ىستەيسىزدەر» دەپ سىنادى.

اسىرەسە بىلىعى مەن شىلىعى كوپ ق ر مادەنيەت جانە سپورت ءمينيسترى ارىستانبەك ءمۇحامادي ۇلىنىڭ دا شاڭىن قاعىپ العان.

قازاق حاندىعىنىڭ 550 جىلدىعىن تويلاۋدا ءدال وسى بەردىبەك ماشبەك ۇلىنىڭ ىقپالى جوعارى ەكەنىن اتاپ وتپەسكە بولمايدى.

ءيا، بەردىبەك ساپاربايەۆ ءبىر جىل ىشىندە وزىنە دە، وزگەگە دە تىنىم بەرمەدى. كابينەتتە وتىرمادى. بالكىم وسى ءۇشىن دە ءماسىموۆ  قازاقستان ۇكىمەتىن بەردىبەك ماشبەكۇلىنان «قۇتقارۋدى» ويلاعان بولار.

ءتۇيىن: ۇكىمەتتەگى ۇلتجاندى باسشىلاردىڭ بىرەگەيىنىڭ ءوزىن شۇرەگەيلەر كوپ كوردى. سوندا ساراپبايەۆ كىمنىڭ جولىن كەسىپ كەتتى؟!

نۇرگەلدى ءابدىعاني ۇلى