SpaceX كومپانياسىنىڭ باس اتقارۋشى ديرەكتورى يلون ماسك "X سىيلىق قورىنىڭ" نەگىزىن قالاۋشى پيتەر ديامانديسكە سۇحبات بەردى.
سۇحباتتا ماسك 2026 جىلعا دەيىن ادامداردى مارسقا جەتكىزۋگە ۇمىتتەنەتىنىن ايتتى. ال، NASA عارىشكەرلەردى قىزىل عالامشارعا ماسكتان جەتى جىل كەيىن، 2033 جىلى جىبەرمەك.
جالاڭاياق وتىرىپ، سۇحبات بەرگەن ماسك "مارسقا بارۋ شاكلتوننىڭ انتاركتيداعا باراتىن جارناماسى سياقتى. سىزدەر بۇل ميسسيانىڭ ءقاۋىپتى ەكەنىن بىلەسىزدەر، بۇل قيىن جانە ۇزاق ساپار. ءسىز ءتىرى ورالماۋىڭىز دا ىقتيمال، ءبىراق بۇل كەرەمەت جانە تاڭعاجايىپ وقيعا بولادى. يا، شىندىعىن ايتساق، باستاپقى كەزدە ادامدار ءولۋى مۇمكىن. وتە قيىن ميسسيا" دەدى.
NASA ارتەميدا باعدارلاماسىنىڭ اياسىندا العاشقى عارىشكەرلەردى مارسقا 2033 جىلعا قاراي جىبەرمەك جانە 2024 جىلى ايعا عارىشكەرلەر جىبەرۋدى جوسپارلاپ وتىر. ولاردىڭ اراسىندا العاشقى ايەل عارىشكەردىڭ ايعا اياق باساتىنى حابارلاندى.
ال، ماسك 2026 جىلعا دەيىن ادامداردى قىزىل عالامشارعا قوندىرۋ ماقساتىنا جەتەمىن دەپ ۇمىتتەنەنەدى. ول تەحنيكالىق كەدەرگىلەر پروبلەماسىن شەشۋگە ۋاقىت جەتكىلىكتى ەكەنىن ايتتى.
ماسكتىڭ ايتۋىنشا، مارسقا جۇلدىزكەمە ارقىلى ساپار شەگۋ ءۇشىن 2026 جىلعا دەيىن ءبىرقاتار تەحنولوگيالىق جەتىستىكتەر قاجەت.
قاجەتتى تەحنولوگيالىق جەتىستىككە قايتا پايدالانۋعا بولاتىن جۇلدىزكەمەنى جاساۋ جانە وربيتادا جانار ماي قۇيۋ پروبلەمالارى كىرەدى. وربيتادا جەتكىلىكتى جانارماي تولتىرىلعان سوڭ، جۇلدىزكەمە مارسقا دەيىنگى التى ايلىق ساپارعا جىبەرىلمەك.
ءبىرقاتار ءساتتى سىناق رەيستەرىنەن كەيىن ماسك 2024 جىلى مارسقا ەكيپاجسىز جۇلدىزكەمە جىبەرۋدى جوسپارلاپ وتىر جانە 2 جىلدان كەيىن عارىشكەرلەردى جىبەرمەك.
"جەردىڭ ءتورت جارىم ميلليارد جىلدىق تاريحىندا العاش رەت تىرشىلىكتى جەرشاردان تىس (اۋماققا) كەڭەيتۋ جانە تىرشىلىكتى كوپ عالامشارلى ەتۋ مۇمكىن بولماق" دەدى ول.
"ادامزات تىرشىلىكتىڭ وكىلى سانالادى. ءبىز جەردە اپات بولعان كۇننىڭ وزىندە، ول تەحنوگەندىك نەمەسە تابيعي اپات بولسا دا، جەردەگى جاراتىلىستاردىڭ جالعاسۋىن قامتاماسىز ەتۋگە مىندەتتىمىز. ەگەر ءسىز قازبا قالدىقتارعا نازار اۋدارساڭىز، جەرشاردا كوپتەگەن جاپپاي جويىلۋ بولعان" دەيدى ماسك.
"ءبىرىنشى قايسىسى بولۋى مۇمكىن؟ مارستاعى ءوزىن-وزى قامتاماسىز ەتەتىن قالا نەمەسە ءۇشىنشى دۇنيەجۇزىلىك سوعىس؟" دەگەن ول قىزىل عالامشاردا تەزىرەك تاۋەلسىز قالا سالۋدىڭ ماڭىزى جوعارى ەكەنىن جەتكىزدى.
ول جانارماي زاۋىتى، كۇن ەنەرگياسى، تاماق ءوندىرىسى، تەمىر رۋداسىن وڭدەۋ زاۋىتى مارستاعى قالانى ءوزىن-وزى قامتاماسىز ەتۋگە قاجەت "ونەركاسىپتىڭ نەگىزى" ەكەىن ايتتى.
ايتا كەتەيىك، وسى ايدىڭ باسىندا NASA عارىشكەرلەردى ايعا اپاراتىن عارىش اپپاراتىن جاساۋ ءۇشىن يلون ماسكتىڭ SpaceX كومپانياسىن تاڭدادى.
پىكىر قالدىرۋ