زامان وزگەردى. الەم استاڭ-كەستەڭ. بۇرىنعى قۇندىلىقتارمەن ءومىر ءسۇرۋ مۇمكىن بولماي قالدى. ويلاماعان وقىس وقيعالار كوبەيۋدە. اسىرەسە، بوسقىندار ماسەلەسى وتكىر تۇردە كۇنتارتىبىنە قويىلۋدا. ادەتتە ادام قۇقىن كوپ ايتاتىن ەۋروپا بوسقىندار تاسقىنىنىڭ الدىندا نە ىستەرىن بىلمەي داعدارىپ قالدى. اقش 10 مىڭ بوسقىن قابىلدايمىز دەدى. ول نە بولادى!؟ دۇنيەجۇزىنىڭ نازارى تابيعي رەسۋرستارى مول، جەرى كەڭ ەلدەرگە قاراي بۇرىلۋدا. بىزگە دە تىقىر تايادى. ۇلتتىق ارنانىڭ بۇگىن حابارلاۋىنشا ءبىزدىڭ ەلگە دە بوسقىندار كەلە باستاپتى. 2009 جىلى «حالىقارالىق بوسقىندار تۋرالى زاڭعا» قوسىلىپپىز. ءبۇۇ-دىڭ بوسقىندار تۋرالى باسقارماسى بىزدە جۇمىس ىستەيدى ەكەن. ۇلتتىق ارنا قازىرگە دەيىن 600-دەن استام بوسقىندى قابىلداعانىمىزدى، ولاردىڭ ءبىر جىل بوسقىن مارتەبەسىن الا تۇرىپ، ودان ارى ىقتيار حاتقا (تۇراقتى تۇرۋعا) قول جەتكىزەتىندىگىن، مۇنى الەمدە بەيبىتشىلىك پەن تۇراقتىلىقتىڭ جانە ۇلتارالىق كەلىسىمنىڭ بەسىگى بولىپ وتىرعان ەلىمىزدىڭ سىندارلى ساياساتىنىڭ جەمىسى رەتىندە ماقتانىش ەتتى. وكىنىشكە وراي، بوسقىن بولىپ كەلگەندەر ءبىر اۋىز قازاق ءتىلىن ۇيرەنبەپتى. ءتىلشىنىڭ سۇراعىنا تۇگەلدەي ورىسشا جاۋاپ بەردى (زاڭ بويىنشا ورىس ءتىلى ۇلتارالىق قاتىناس ءتىلى بولعاسىن، قازاق ءتىلى ول فۋنكسيانى اتقارا المايتىندىقتان سويتەدى دە).
تەلەديداردى كورىپ وتىرىپ، ەسىمە ەرىكسىز سىرتتاعى اعايىندار ورالدى. ءبىزدىڭ ۇكىمەتتىڭ بوسقىن ەكەش بوسقىنمەن دە كەلىسىمشىلدىگى نەگە قازاققا كەلگەندە كەرى باعۋشىلىق بولىپ قالاتىنىنا قايران قالدىم. ايتپەسە، ءبىزدىڭ ۇكىمەت پەن پارلامەنتكە سىرتتان ءوز اياعىمەن ورالعان قانداستارعا قولايلىلىق جاراتۋ ماسەلەسىن سونشالىق ويلاناتىنداي نە بولدى. قىلاياعى بوسقىنعا بەرىلەتىن جەڭىلدىك تە جوق ەكەن عوي كەلگەن قازاققا! جامان ايتپاي جاقسى جوق. وسىلاي، قازاقتاردى شەكارانىڭ سىرتىندا قاقپايلاپ، كەلگەندەرىن كوپ كورىپ، كوزگە تۇرتكى قىلىپ وتىرعاندا ەلىمىزگە باسا-كوكتەپ ەنتەلەگەن (ەرتەڭ ورىس بولىپ شىعا كەلەتىن) قالىڭ قارا توبىر قاپتاپ كەتە مە دەپ قورقامىن. ءسوز ۇقپايتىن «اۋىلدان كەلگەن»، «ساپاسىز»، جۇقسىز بۇزاقىنىڭ كوكەسىن سوندا كورىپ جۇرمەيىك.

تۇرسىنحان زاكەن ۇلى، ل. ن گۋميليەۆ اتىنداعى ەۇۋ  پروفەسسورى

«Facebook» پاراقشاسىنان