يزرايل گازاعا جويقىن شابۋىل جاساپ، حاماس توبىنىڭ جەراستى جولىن جويدى

دۇيسەنبىدە يزرايل اسكەريلەرى كەزەكتى اۋە شابۋىلىن باستادى. جارىلىستار گازا قالاسىن سولتۇستىكتەن وڭتۇستىككە قاراي قيراتىپ كەلەدى. بۇل 42 ادامنىڭ ءومىرىن قيعان جەكسەنبىدەگى شابۋىلدان دا جويقىن ەكەنى حابارلانىپ جاتىر. يزرايل اسكەرى اۋە شابۋىلى كەزىندە حاماس توبىنىڭ (گازا سەكتورىن باقىلاپ وتىرعان كەي مەملەكەتتەر لاڭكەستىك توپ دەپ تانىعان ۇيىم) 15 شاقىرىمدىق جەراستى جولى مەن حاماس كومانديرلەرىنىڭ 9 ءۇيى جويىلعانىن ءمالىم ەتتى.

ەكىنشى اپتاعا جالعاسىپ جاتقان گازا سەكتورىنداعى قاقتىعىستىڭ العاشقى اپتاسىندا سەكتوردا 192 ادام، ونىڭ ىشىندە 58 بالا، 34 ايەل قازا تاپقان.

حاماس توبىنىڭ ءيزرايلدىڭ امكەلون، بەەر-شيەۆا قالالارىن اتقىلاۋىنىڭ سالدارىنان 10 ادام، ونىڭ ىشىندە 2 بالا قازا تاپقانى حابارلانعان.

جەكسەنبىدە بۇۇ قاۋىپسىزدىك كەڭەسى جينالىپ، سەكتورداعى جاعدايعا بايلانىستى ءبىر ماملەگە كەلە المادى. جۇڭگو كەڭەستىڭ ءبىراۋىزدان مالىمدەمە جاساۋىنا اقش كەدەرگى كەلتىردى دەپ وتىر.

اljazeera دەرەگىنشە، قاقتىعىس باستالعالى 366 بالا جاراقات العان.

سەكتورداعى قاقتىعىسقا بىرنەشە اراب وتباسىن شىعىس يەرۋساليمنەن باسقا شاققا كوشىرۋ تۋرالى سوت شەشىمى سەبەپ بولعان. سوت شەشىمى كەيىنگە قالدىرىلعانىمەن قاقتىعىس توقتامادى.

يەرۋساليم 1967 جىلعى التى كۇندىك سوعىستان كەيىن يزرايل باقىلاۋىندا. الايدا حالىقارالىق قاۋىمداستىق قالانىڭ تۇتاس يزرايلگە تيەسىلى ەكەنىن مويىنداماعان. قالا بىرنەشە بولىككە بولىنگەن. قالانىڭ شىعىس بولىگىندە ارابتار تۇرادى. يزرايل بيلىگى شىعىس يەرۋساليمدە تۇراتىندارعا ەل ازاماتى اتانۋ قۇقىعىن بەرگەن. ءبىراق ول جەردەگىلەردىڭ باسىم كوپشىلىگى رەزيدەنت رەتىندە تۇرىپ كەلەدى.

گازا سەكتورى زاڭ جۇزىندە تاۋەلسىزدىگى ءىشىنارا مويىندالعان پالەستينا مەملەكەتىنىڭ ءبىر بولىگى بولىپ سانالادى. شىعىسى مەن سولتۇستىگى يزرايلمەن شەكتەسىپ جاتىر. ەل كەي مەملەكەتتەر لاڭكەستىك توپ دەپ تانىعان حاماس توبىنىڭ باقىلاۋىندا.

پالەستينا زاڭ جۇزىندە تاۋەلسىز مەملەكەت. ءبىراق ونىڭ تاۋەلسىزدىگىن بۇۇ مەملەكەتتەرىنىڭ بارلىعى بىردەي مويىنداماعان. قازاقستان پالەستينانىڭ تاۋەلسىزدىگىن مويىنداعان. ەلدە شىن مانىندە ەگەمەندىك ناقتى قۇرىلماعان. مەملەكەتتىك قۇرىلىمدار ءىشىنارا عانا جاساقتالعان. مەملەكەتتىڭ پرەزيدەنتى، ۇكىمەتى مەن پارلامەنتى بولعانىمەن، اسكەرى، ۇلتتىق ۆاليۋتاسى، حالىقارالىق اۋەجايى جوق.

يزرايل گازاعا جويقىن شابۋىل جاساپ، حاماس توبىنىڭ جەراستى جولىن جويدى

قاتىستى تەگتەر :

پىكىر قالدىرۋ

قاتىستى ماقالالار