الماتى قالاسىنىڭ باس سانيتار دارىگەرى جانداربەك بەكشين قازان ايىنا بولجام جاسادى. بۇل تۋرالى ول ونلاين-بريفينگتە ايتتى.

ونىڭ سوزىنشە،  قازان ايىنىڭ ورتاسىنا تامان اۋرۋ جۇقتىرۋ دەڭگەيى تومەندەۋى مۇمكىن.

– جالپى العاندا قازان ايىنىڭ ورتاسىنا دەيىن كوروناۆيرسپەن اۋىرعاندار سانى كۇنىنە 50-200 ادامنان اسپاۋى مۇمكىن. قالا وتە ۇلكەن بولعاندىقتان حالىقتىڭ تىعىزدىعى جوعارى. سوندىقتان كوروناۆيرۋس ەشقايدا كەتپەيدى. ەڭ از مولشەردە بولسا دا اۋرۋ سانى تىركەلە بەرەدى. بۇل  ءبىزدىڭ مەديسينالىق ۇيىمدارعا ەڭ الدىمەن جۇقپالى اۋرۋلار اۋرۋحانالارىنا، ادەتتەگىدەي جۇمىس ىستەۋگە مۇمكىندىك بەرەدى، – دەدى باس سانيتار دارىگەر.

مەگوپوليستە وتكەن تاۋلىكتە كوروناۆيرۋس ينفەكسياسىن 976 ادام جۇقتىرعان. ەمدەلىپ شىققانى – 1410 ادام.

بۇگىندە كوروناۆيرۋستىڭ تارالۋى بويىنشا "جاسىل" ايماقتا تۇركىستان وبلىسى عانا تۇر.

"سارى" ايماقتا شىعىس قازاقستان، قىزىلوردا، سولتۇستىك قازاقستان، جامبىل وبلىستارى بار.

ال "قىزىل" ايماقتا نۇر-سۇلتان، الماتى، شىمكەنت قالالارى، اقمولا، اقتوبە، الماتى، اتىراۋ، باتىس قازاقستان، قاراعاندى، قوستاناي، ماڭعىستاۋ، پاۆلودار، سولتۇستىك قازاقستان وبلىستارى بار.

9 قىركۇيەكتەگى مالىمەت بويىنشا قازاقستاندا كوروناۆيرۋس ينفەكسياسىنا قارسى ۆاكسينانىڭ 1-كومپونەنتىن 6 969 069 ادام، 2-كومپونەنتىن 5 795 901 ادام سالدىرعان.