2020-2021 وقۋ جىلى وقۋشىلارعا ونلاين ساباق وقۋمەن ەستە قالدى. پاندەمياعا بايلانىستى بالالاردى ءداستۇرلى وقۋ فورماتىندا وقىتۋعا مۇمكىندىك بولماي، وقۋشىلار قاشىقتان ءبىلىم الدى. جالپى قاشىقتان وقىتۋ ءبىلىم بەرۋ سالاسىنا وڭاي تيگەن جوق. ءبىراق ساباعىن ونلاين وقىسا دا، ءتۇرلى دودالاردا توپ جارىپ قاتارلاستارىنان اسىپ ءتۇسىپ جاتقان وقۋشىلار دا از ەمەس. ماڭعىستاۋدىڭ دارىندى وقۋشىلارى جىل سايىن وليمپيادادا توپ جارادى. 2021 جىل ماڭعىستاۋ وبلىسى ءۇشىن جەمىستى بولدى. وبلىس بويىنشا رەسپۋبليكالىق وليمپيادادان 752 وقۋشى، حالىقارالىق وليمپيادادان 250 وقۋشى جۇلدەلى ورىن الدى. 25-30 ءساۋىر ارالىعىندا وتكەن رەسپۋبليكالىق پاندىك وليمپيادانىڭ قورىتىندى كەزەڭىندە ماڭعىستاۋ وبلىسىنىڭ كومانداسى 5 التىن، 6 كۇمىس جانە 18 قولا مەدال يەلەندى. وسى وليمپيادادا ۇزدىك ناتيجە كورسەتكەنى ءۇشىن اقتاۋ قالاسىنداعى «ءبىلىم-يننوۆاسيا» ليسەي-ينتەرناتى «ۇزدىك وليمپيادالىق مەكتەپ-2021» نوميناسياسى بويىنشا ءىى ورىن السا، ال مۇنايلى اۋدانىنداعى جالپى ءبىلىم بەرەتىن №3 مەكتەپ «ەڭ ۇزدىك اۋىل مەكتەبى – 2021» نوميناسياسىن يەلەندى. ماڭعىستاۋ وبلىسىنىڭ كومانداسى «ەڭ ۇزدىك وليمپيادالىق كوماندا – 2021» نوميناسياسى بويىنشا ءىىى ورىنعا جايعاستى. 
قاتارلاستارىنان وزىق شىققانداردىڭ ءبىرى، اقتاۋ قالاسىنداعى «ءبىلىم-يننوۆاسيا» ليسەي-ينتەرناتىنىڭ 11-سىنىپ وقۋشىسى ادىلەت ابۋ. وقۋدا وزات وقۋشى 2021 جىلى ماتەماتيكادان جاۋتىكوۆ اتىنداعى حالىقارالىق وليمپيادادا كۇمىس مەدال، حالىقارالىق «جىبەك جولى» وليمپياداسىندا التىن مەدال، حالىقارالىق «تىنىق مۇحيتتىق» وليمپيادادا قولا مەدال الدى. رەسپۋبليكالىق پاندىك وليمپياداعا دا قاتىسىپ كۇمىس مەدال يەگەرى اتاندى.
-پاندىك وليمپياداداعى جەتىستىك ومىردەگى كەز كەلگەن جەتىستىك سەكىلدى ۇلكەن ەڭبەكپەن كەلەدى. مۇنداي ماقساتقا جەتۋ ءۇشىن، بىرىنشىدەن ىستەپ جاتقان نارسە وزىڭە جاقىن بولۋى كەرەك. ەكىنشىدەن وعان كەمىندە 1-2 جىل، الدە وداندا كوپ ۋاقىت دايىندالۋ قاجەت. مەن ءوزىم 7 جانە 8 سىنىپتاردان باستاپ، ماتەماتيكانى تاڭداپ وسى باعىتتا دايىندالىپ باستادىم. ال ءار وليمپياداعا رەتىمەن كەلەتىن بولساق، وتكەن جىلداردا بولعان ەسەپتەردى الىپ سونى شىعارىپ كورىپ تولىعىمەن ءتۇسىنۋ كەرەك. ەگەر كەي نارسەلەردى تۇسىنبەي جاتسام ينتەرنەتتەن ىزدەپ نەمەسە مۇعالىمنەن سۇرايتىن ەدىم. وسىلاي جىلدار بويى بوس ۋاقىتىڭىزدى دايىندىققا بولەتىن بولساڭىزدار كوزدەگەن ماقساتىڭىزعا جەتەسىز. مەن ءار وليمپيادا ارقىلى ءوزىمنىڭ دايىندىعىمدى تەكسەرەمىن. سول ءۇشىن ءاربىر جارىستان كەيىن وقۋعا ىنتامدى ارتتىرىپ، كەلەسىدە وداندا جاقسى جەتىستىككە جەتۋگە تىرىسامىن، دەيدى ادىلەت ابۋ.
جالپى وقۋشىلاردىڭ جەتىستىككە جەتۋى ەڭ ءبىرىنشى وزىنە، سوسىن ءمۇعالىمى مەن اتا-اناسى بايلانىستى. ءبىراق بالانىڭ بىلمەگەنىن ۇيرەتىپ، تالانتى مەن قابىلەتىن اشىپ، ارى قاراي جەتىلدىرۋ ماقساتىندا ارنايى ورتالىقتاردىڭ قوسار ۇلەسى مول. ماڭعىستاۋ وبلىستىق «دارىن» قوسىمشا ءبىلىم ورتالىعى وسى باعىتتى مىقتاپ قولعا العان. وندا وقۋشىلاردىڭ عىلىمي جوبا جازۋىنان بولەك، ارنايى وليمپيادالارعا دايىندالۋىنا كومەكتەسەدى. وقۋشىلاردى وليمپياداعا دايىنداۋ ماقساتىندا ورتالىق جانىنداعى «بالداۋرەن» دەمالىس بازاسىندا جىلدىڭ ءار مەزگىلىندە دايىندىق ماقساتىندا 1-2 رەت وقۋ-جاتتىعۋ وتكىزىلىپ تۇرادى. دايىندىق ۇزاقتىعىنىڭ ءبىر اۋىسىمى بەس كۇن. وعان وبلىستان، رەسپۋبليكا جانە حالىقارالىق دەڭگەيدەگى وليمپيادالاردان ورىن الىپ جۇرگەن وبلىستىق وليمپيادالىق رەزەرۆتەگى وقۋشىلار قاتىسادى. وقۋشىلاردى وقىتۋ ءۇشىن وبلىستىڭ بىلىكتى ۇستازدارى مەن رەسپۋبليكالىق فيزيكا-ماتەماتيكا مەكتەبىنىڭ مۇعالىمدەرى شاقىرتىلادى. وندا وقۋشىلار وقىپ قانا قويمايدى، سونىمەن قاتار پسيحولوگتاردان اقىل-كەڭەس الادى. پسيحولوگ بالانىڭ وزىنە دەگەن سەنىمدىلىگىن ارتتىرىپ، جىگەرلەندىرىپ، قيىندىقتان قورىقپاۋ باعىتىندا ارنايى ءدارىس بەرەدى.
- ءار وقۋشىعا ءار ءتۇرلى ۋاقىت قاجەت. ءبىر وقۋشىعا 1 جىل، كەيبىرەۋىنە 3-4 جىل. وقۋشى جەڭىمپاز اتانۋ ءۇشىن تەرەڭ بەرىلگەن ءبىلىم، جاقسى موتيۆاسيا، پسيحولوگيالىق قولداۋ كەرەك. وقۋشىنى قاي پانگە بەيىم ەكەنىن ءبىرىنشى انىقتاۋ كەرەك. قاي ءپاندى ءسۇيىپ وقيدى، قاي پانگە جاقىن. سودان كەيىن، وقۋشىنى دامىتا بەرەسىز. وليمپيادا جەڭىمپازى بولامىن دەگەن وقۋشى الدا كوپ جۇمىس كۇتىپ تۇرعانىن ءبىلۋى قاجەت. ول كوپ ىزدەنىستى، ۋاقىتتى جانە شىدامدىلىقتى تالاپ ەتەدى. جالپى بالالاردى وليمپياداعا 5-6 سىنىپتان باستاپ دايىنداعان ءجون. سەبەبى بالا ءار جىل سايىن وليمپياداعا قاتىسۋ ارقىلى وليمپيادانىن نە ەكەنىن ءتۇسىنىپ، وزىنە تاجىريبە جينايدى. وليمپياداعا دايىندىق كۇنىنە 2-3 ساعات ەمەس، ءومىر سالتقا اينالۋ كەرەك. جەڭىمپاز اتانۋ ءۇشىن قاتەمەن جانە ءالسىز تۇستارىمەن جۇمىس جاساۋ ماڭىزدى، دەيدى ماڭعىستاۋ وبلىستىق «دارىن» قوسىمشا ءبىلىم ورتالىعىنىڭ زياتكەرلىكتى دامىتۋ جۇمىستارى زەرتحاناسىنىڭ باسشىسى گاۋحار تادجيبەنوۆا.
سونىمەن قاتار، وقۋشىلار رەسپۋبليكاداعى بەلگىلى وليمپياداعا دايىندايتىن «edLight Academy» سەرىكتەستىگى مەن «NURORDA» مەكتەپ-ليسەيىنىڭ ۇيىمداستىرىپ وتىراتىن ارنايى دايىندىقتارىنا دا قاتىسادى.
پىكىر قالدىرۋ