وسكەمەندە كومىر كەزەگىندە بىرنەشە كۇن تۇرعان 30 جاستاعى ەر ادام كەزەكتى جىلجىتۋ ءۇشىن "ءوزىن-وزى ورتەيمىن" دەپ قورقىتقان. بۇل تۋرالى qumash_kz تەلەگرام كانالى حابارلادى. 

بەلگىلى بولعانداي، بىرنەشە كۇن كەزەكتە تۇرىپ، قارا وتىنعا قول جەتكىزە الماعان ۇلان اۋدانىنىڭ تۇرعىنى ءوزىنىڭ جۇك كولىگىمەن جولدى جاۋىپ، بەنزين شاشىپ، ءوزىن ورتەپ جىبەرەمىن دەپ شۋ شىعارعان.

"پوليسيا قىزمەتكەرلەرى ەر ادامنان كانيستردى الىپ، ونى تىنىشتاندىردى. ول مۇنداي ارەكەتكە، كومىر الا الماعانى ءۇشىن بارعان. قاقتىعىستى رەتتەۋگە اتسالىسقان بازا باسشىلىعى مەن اكىمدىك وكىلى وعان كومىر بەرۋ تۋرالى شەشىم شىعاردى. كەزەكتە تۇرعاندار قارسى بولمادى" دەلىنگەن پوليسيا دەپارتامەنتىنىڭ باسپا ءسوز قىزمەتىندە. 

ال جولدى بوگەپ، باسقا كولىك قۇرالدارىنىڭ قوزعالىسىنا كەدەرگى كەلتىرگەنى ءۇشىن وعان 10 اەك كولەمىندە (29 170 تەڭگە) ايىپپۇل سالىندى.

جىلىتۋ ماۋسىمى باستالعالى قازاقستاننىڭ كوپتەگەن وڭىرلەرىندە كومىر تاپشى. بۇعان دەيىن الماتى وبلىسى سارىوزەك اۋىلىندا بەلگىسىز ايەل كومىر ءۇشىن جۇك تيەگىش-ەكسكاۆاتوردىڭ كوۆىشىنا ءمىنىپ العان. 

بيىل ەلدە كومىردىڭ باعاسى 5 پايىزعا قىمباتتاعان. شقو-دا باعانىڭ ءوسۋى بىردەن 11 پايىزدى قۇراسا، وڭتۇستىك وڭىرلەردە 7 پايىزعا جەتكەن.