ەل تاۋەلسىزدىگىنىڭ 30 جىلدىعى اياسىندا VI رەسپۋبليكالىق «Worldskills Kazakhstan» چەمپيوناتى باستالدى. ماڭعىستاۋ وبلىستىق ءبىلىم باسقارماسى باسپا ءسوز قىزمەتىنىڭ حابارلاۋىنشا، اقتاۋدا «Worldskills Kazakhstan» چەمپيوناتىنىڭ «ناۋبايشى ءىسى» قۇزىرەتتىلىگى بويىنشا كونكۋرستىڭ اشىلۋ سالتاناتى ءوتتى. شارادا ماڭعىستاۋ وبلىسى اكىمىنىڭ ورىنباسارى گۇلميرا قالمۇراتوۆا قاتىسۋشىلارعا ساتتىلىك تىلەپ، ءوز لەبىزىن جەتكىزدى.

-«WorldSkills» چەمپيوناتى تەحنيكالىق جانە كاسىپتىك ءبىلىم سالاسىنداعى باستى كورسەتكىشتەرىنىڭ ءبىرى بولىپ وتىر. رەسپۋبليكامىزدىڭ 180 كوللەدجى «جاس مامان» جوباسى بويىنشا جابدىقتالىپ، ۇلتتىق چەمپيوناتتى وڭىرلەردە وتكىزۋ مۇمكىندىگى تۋدى. ماڭعىستاۋ تۋريزم كوللەدجىنىڭ بازاسىندا بۇل كونكۋرستىڭ ءوتۋى وبلىس ءۇشىن دە ۇلكەن مارتەبە. سىزدەر ءاربىر سالا ماماندىقتارىن حالىقارالىق دەڭگەيگە ساي دارەجەدە مەڭگەرىپ، شەتەلدىك كادرلارعا باسەكەلەستىك تۋدىراتىن مامان بولۋىڭىز قاجەت. سەبەبى ءقازىر ەلىمىزدە يندۋستريالدى-يننوۆاسيالىق دامۋ باعدارلاماسىنا سايكەس ءار وڭىردە جاڭا وندىرىستىك كاسىپورىندار سالىنۋدا. ولارعا بىلىكتى كاسىبي جۇمىسشى ماماندارى اۋاداي قاجەت»،-دەدى گۇلميرا قالمۇراتوۆا.

الداعى ءۇش كۇندە اقتاۋداعى تۋريزم كوللەدجىندە ءار ايماقتان كەلگەن 15 ستۋدەنت پەن ساراپشىلار ءوز باقتارىن سىنايدى. ايتا كەتەيىك بۇگىن كونكۋرستىڭ قاتىسۋشىلارى ءۇشىن جۇمىس ورىندارىن دايىنداۋ كەزەڭى وتەدى. سودان سوڭ «Aktau Tourism City Ltd»  RIXOS  قوناقۇيىندەگى TETYSBLU  پاركىنە ساياحات جۇرگىزىلەدى. 9، 10، 11 قاراشا كۇنى كونكۋرستىڭ نەگىزگى ءبولىمى وتكىزىلىپ، 11 قاراشادا CIS باعالاۋ جۇيەسىندە قورىتىندى شىعارىلادى.