ارالاس جەكپە-جەك شەبەرى قۋات حاميتوۆ ۇيىنەن "ومون" قىزمەتكەرلەرى ۇستاپ اكەتكەنىنە بايلانىستى پىكىر ءبىلدىرىپ، سپورت كارەراسىن اياقتايتىنىن ءمالىم ەتتى. بۇل تۋرالى ول الەۋمەتتىك جەلىدەگى پاراقشاسىندا ايتتى.
ايتۋىنشا، بەيبىت ميتينگكە باتىستىق باۋىرلارىن قولداۋ ماقساتىندا شىققان.
– ەشكىم ەشتەڭەنى بۇزعان جوق، ەشتەڭەگە تيىسكەن جوق. حالىق جينالا باستاعان كەزدە پوليسەيلەر، پوليسيا بولىمدەرىنىڭ، قالا اكىمىنىڭ ورىنباسارى، پروكۋراتۋرا وكىلدەرى كەلدى. ولاردىڭ بارلىعى ميتينگتىڭ بەيبىت تۇردە وتكەنىن كوردى، ەشكىم ەشكىمدى سوققىعا جىققان جوق. ءبىز ول جەردە شامامەن 5-6 ساعات بولدىق. مەملەكەتكە قانداي تالاپ قوياتىنىمىزدى ايتىپ، بەينەۇندەۋ جازدىق. بۇل نەگىزىنەن ازىق-تۇلىك، بەنزين، گاز باعاسى كوتەرىلمەسىن دەگەن تالاپ بولدى. مەملەكەت جاعدايدى باقىلاۋعا الىپ، باعانى كوتەرگەندەر ءوز ورنىن بوساتۋىن سۇرادىق. ارينە، داۋ-دامايسىز بولمادى. شامام كەلگەنشە قورعادىم، – دەدى سپورتشى.
حاميتوۆ پوليسيا، پروكۋراتۋرا، مەملەكەتتىك ورگان قىزمەتكەرىنە بىردە-بىر نارازىلىق ءبىلدىرۋشى ساۋساعىنىڭ ۇشىن دا تيگىزبەگىن ايتتى.
– مەن ول جەردەن شىعىپ كەتكەندە اكىمنىڭ ورىنباسارى ماعان قوڭىراۋ شالىپ، حالىقتى تىنىشتاندىرۋعا كومەكتەسۋىمدى ءوتىندى. ويتكەنى ونىڭ ايتۋىنشا، ادامدار مەنى تىڭدايدى، قۇرمەتتەيدى. مەن "حالىق ارەناعا" بارىپ، جينالعاندارمەن سويلەسۋدى ءجون كوردىم. حالىق مەنى قۇرمەتتەپ قارسى الىپ، ءسوز بەردى. ءبىز وز-وزىمىزگە جاۋ ەمەس ەكەنىمىزدى، ەلىمىزدى جاعىپ، قيراتىپ، ورتەۋدىڭ كەرەگى جوقتىعىن، ءبىز باتىس ءوڭىردى قولداۋ ءۇشىن جانە مەملەكەت ءبىزدى ەستۋى ءۇشىن جينالىپ جاتقانىمىزدى ايتتىم. "ءقازىر جولدى جاپپايىق، جەدەل جاردەم بار، جۇمىستان كەلە جاتقان حالىق بار، جۇرتتى شوشىتپاي، مىنا جولدان كەتەيىك. باسقا ءبىر جەرگە بارىپ ايتاتىمىزدى تالابىمىزدى ايتايىق" دەپ حالىقتى سول جاقتان الىپ كەتكەن بولاتىنمىن، – دەدى قۋات حاميتوۆ.
ول ءبارى اياقتالعاننان كەيىن ۇيىنە قايتقانىن جانە قالادا بۇلىك بولىپ جاتقاندا قالا سىرتىنداعى ۇيىندە بولعانىن جەتكىزدى.
– بۇل كۇندەرى ينتەرنەت بايلانىسى بولمادى. كەيىن ۇلتتىق قاۋىپسىزدىك قىزمەتكەرلەرى دوسىم ارقىلى مەنىمەن بايلانىسقا شىعىپ، "نەگە قاشىپ كەتتىڭ؟" دەپ سۇرادى. مەن ولارعا ەشقايدا قاشپاعانىمدى، ينتەرنەت بايلانىسى بولماي ۇيالى تەلەفونىم ءوشىپ قالعانىن ايتتىم. سودان ولارمەن ۇقك عيماراتىندا كەزدەسەمىز دەپ كەلىستىك. قالاعا كەلىپ ەندى ولارعا بارۋعا جينالىپ جاتقانىمدا ارنايى ورگاننان ادامدار كەلىپ، تۇسىندىرمەي ۇستاپ الىپ كەتتى. ولار مەنىڭ اكەمدى اۆتوماتپەن ءبىر ۇرىپ جىبەردى، ءوزىمدى دە سوققىعا جىقتى. ءسويتىپ ەش تۇسىندىرمەستەن ۇيدەن الىپ كەتتى. ءبىزدى پوليسيا بولىمشەسىنە جەتكىزگەننەن كەيىن نە ءۇشىن ايىپتاپ تۇرعاندارىن ايتپادى. سول جەردە مەنىڭ كەسىرىمنەن قۇقىق قورعاۋ قىزمەتكەرلەرى قايتىس بولعانىن ەستىدىم، سول ءۇشىن ۇستاپ وتىرعان، – دەدى حاميتوۆ.
قۋات حاميتوۆ سونداي-اق سپورتتاعى كارەراسىن اياقتايتىنىن مالىمدەدى. ول بۇعان دەيىن 5 جىل كارەراسىن جالعاستىرۋ جوسپارى بولعانىن جەتكىزدى. ايتۋىنشا، ەندى ومىرىندە جاڭا تاراۋ، جاڭا كارەرا باستالادى. سپورتشى شەشىمى ناقتى نەمەن بايلانىستى ەكەنىن، جاڭا تاراۋ دەپ نەنى مەڭزەپ وتىرعانىن ايتپادى.
بۇعان دەيىن ءحاميتوۆتى "ومون" قىزمەتكەرلەرى سوققىعا جىققانىن حابارلاعانبىز.
الماتىدا ميتينگ كەزىندە مما سپورتشىسى قۋات حاميتوۆ الاڭعا شىعىپ، حالىققا قولداۋ بىلدىرگەن بولاتىن.
پوسموترەت ەتۋ پۋبليكاسيۋ ۆ Instagram
پىكىر قالدىرۋ