سولتۇستىك قازاقستان وبلىسىندا سەپاراتيستىك ارەكەت جاساعانى ءۇشىن 18 ادام جاۋاپقا تارتىلىپ جاتىر. بۇل تۋرالى ءماجىلىس وتىرىسىندا باس پروكۋروردىڭ ورىنباسارى جاندوس ومىرالييەۆ حابارلادى.

"ۇلتتىق قاۋىپسىزدىك كوميتەتىنىڭ سقو داعى دەپارتامەنتى قىلمىستىق كودەكستىڭ 180 بابى، 2 بولىگىنە سايكەس "ب ا ق ارقىلى سەپاراتيزمدى ناسيحاتتاۋ" بويىنشا قىلمىستىق ءىس قوزعادى. ايىپتالۋشىلاردىڭ تۇرعىلىقتى جەرى مەن جۇمىس ورىندارىندا ءتىنتۋ جۇرگىزىلدى. دالەل زاتتار الىندى. اتاپ ايتقاندا، فلەشكا جانە تاعى باسقا زاتتار. وسى زاتتار جانە توپ مۇشەلەرىنىڭ ايتقان سوزدەرى بويىنشا ءتيىستى ساراپتاما تاعايىندالدى. سىزدەر ولاردىڭ قانداي ءسوز ايتقانىن بىلەسىزدەر. ساراپتاما ادىلەت مينيسترلىگىمەن بىرلەسىپ جۇرگىزىلەدى. ول 1 اي جۇرگىزىلەدى. ءبىز جاقىن ارادا وسى ساراپتامانى الامىز. ونىڭ قورىتىندىسى بويىنشا جانە ءار ادامنىڭ ايتقان ءسوزى نەگىزىندە ولارعا تاعىلاتىن ايىپتىڭ باپتارى كورسەتىلەدى"، - دەدى باس پروكۋروردىڭ ورىنباسارى.

سونداي-اق جاندوس ومىرالييەۆ ايىپ تاعىلعاننان كەيىن جازانى سوت تاعايىندايتىنىن ايتتى.  پروكۋراتۋراعا تەرگەۋ ناتيجەسى مەن ساراپتاما قورىتىندىسى جەتكىلىكتى نەگىز بەرسە، ولارعا ايىپ تاعىلىپ، جاۋاپقا تارتىلادى.

ەسكە سالا كەتسەك، بۇعان دەيىن الەۋمەتتىك جەلىدە قازاقستان كورپاراسياسىنا باعىنبايتىنىن حابارلاعان ءبىر توپ بەلسەندىنىڭ ۆيدەوسى جاريالاندى. ۆيدەودا پەتروپاۆل قالاسىنىڭ تۇرعىندارى حالىقتىق جۇمىسشىلار كەڭەسىن قۇرىپ، قازاقستاننان ءبولىنىپ، "تاۋەلسىزدىگىن" جاريالاعان. 

جيىندا 19 ادام جاڭا دەكلاراسيانى، جارعى جوباسىن، سيمۆوليكانى، حالىق كەڭەسىنىڭ ءمورىن بەكىتىپ، 1937 جىلعى قازاق كسر كونستيتۋسياسى بويىنشا ءومىر سۇرەتىندەرىن ايتقان. ولار وزدەرىن "ۇلى وتان سوعىسىندا جەڭىسكە جەتكەن باتىرلاردىڭ ۇرپاعىمىز" دەپ تانىستىرعان.