انتيكور الماتى قالاسىنىڭ جەر قاتىناستارى سالاسىندا ورىن العان زاڭبۇزۋشىلىقتاردى انىقتادى.

جەمقورلىققا قارسى قىزمەتتىڭ حابارلاۋىنشا، الماتى اكىمدىگىنىڭ تاۋ بوكتەرىندەگى اۋدانداردان جەر ءبولۋ جانە قۇرىلىس ورىندارىن سالۋدا سىبايلاس جەمقورلىق ورىن العان.

سونىمەن قاتار، ساۋلەت جانە قالا قۇرىلىسى تۋرالى زاڭنامانىڭ ساقتالماعانى بەلگىلى بولدى. 2017 جىلدان باستاپ تۋريزمدىك ايماققا ارنالعان 286 گەكتارعا جۋىق جەرگە تۇرعىن ۇيلەر سالىنعان. بۇل وزگەرىستەر ەكولوگتاردىڭ، سەس پەن ءورت سوندىرۋشىلەردىڭ كەلىسىمىنسىز جۇزەگە اسىرىلىپ، قوعامدىق تىڭداۋدان وتكىزىلمەگەن.

توتەنشە جاعداي قىزمەتىنىڭ دەرەكتەرى بويىنشا تاسقىن، كوشكىن جانە سەل ءقاۋپى بار ايماقتارعا 5 000 عا جۋىق تۇرعىن ءۇي سالىنعان. ول ايماقتا 26 مىڭ ادام تۇرادى. مىسالى، نابەرەجنايا كوشەسىندە تىك بەتكەيدىڭ استىنداعى سارى توپىراققا 12 تۇرعىن ءۇي سالىنعان.

سوڭعى ەكى جىلدا لاندشافتتاردى وزگەرتۋ بويىنشا 26 ءىس انىقتالدى. ناۋرىزباي اۋدانىنىڭ تاۋ بوكتەرىندەگى جەر ۋچاسكەسىنىڭ يەسى رۇقسات قۇجاتسىز تاۋدى قوپارىپ تاستاعان. مامانداردىڭ قورىتىندىسى بويىنشا، كەسىلگەن توپىراقتىڭ كولەمى 100 مىڭ تەكشە مەتردى قۇرادى. ول جەرلەردى 50 ۋچاسكەگە ءبولىپ، ساتۋعا شىعارماق بولعان.

سونىمەن قاتار، ساۋلەت ورگاندارى جەكە ءۇيدىڭ ەسكيزىن بەكىتكەنىمەن، ءىس جۇزىندە كوپپاتەرلى تۇرعىن ءۇي كەشەنى سالىنعان. بۇل ۇيلەرگە سۋ مەن جىلۋ تارتىلۋ ءۇشىن تەحنيكالىق شارتتار دا ەسكەرىلمەيدى. قۇرىلىس سالۋشىلار بەكىتىلگەن ەسكيزدەردى بۇزا وتىرىپ، تروتۋارلار مەن دەمالىس الاڭدارىنا ارنالعان جەرلەرگە دە تۇرعىن ءۇي سالا بەرگەن. قازىرگى تاڭدا اتالعان زاڭ بۇزۋشىلىقتار بويىنشا تەرگەۋ جۇمىستارى جۇرگىزىلىپ جاتىر.