بۇگىن ءماجىلىستىڭ جالپى وتىرىسىندا "قازاقستان رەسپۋبليكاسىنىڭ كەيبىر زاڭنامالىق اكتىلەرىنە جول ءجۇرىسىن ۇيىمداستىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ قابىلداندى.

قۇجات اياسىندا ەلەكتر ساموكاتتاردىڭ جولدا ءجۇرۋ ءتارتىبى رەتتەلەدى. اتالعان زاڭ جوباسىن پارلامەنت دەپۋتاتتارى ازىرلەگەن.

"كەيىنگى جىلدارى ەلەكتر ساموكاتتاردىڭ، گيروسكۋتەرلەر مەن مونودوڭگەلەكتەردىڭ پايدا بولعانىن كورىپ ءجۇرمىز. بىزگە وسىنداي جاڭا كولىك قۇرالدارىنىڭ ءجۇرىسىن رەتتەۋ ماسەلەلەرى بويىنشا ءوتىنىش كوپ تۇسەدى. بۇل اسىرەسە مەگاپوليستەر ءۇشىن وزەكتى ماسەلە. ەلەكتر ساموكاتتاردىڭ جولدارمەن جانە تروتۋارلارمەن ءجۇرۋى جاياۋ جۇرگىنشىلەر مەن جۇرگىزۋشىلەرگە ءقاۋىپ ءتوندىرىپ جاتىر"، – دەدى ءماجىلىس دەپۋتاتى ەكاتەرينا سمىشليايەۆا.

ونىڭ ايتۋىنشا، زاڭ جوباسى ەكى جىل بۇرىن ازىرلەنگەن. الايدا ەلەكتر ساموكاتتارعا قاتىستى تەحنيكالىق رەگلامەنت تەك 2022 جىلدىڭ شىلدەسىندە قابىلداندى.

"بۇگىن ءبىز ەلەكتر ساموكاتتاردىڭ ءجۇرىسىن رەتتەۋ بويىنشا تۇزەتۋلەر ەنگىزىپ وتىرمىز. جوباعا سايكەس ەلەكتر ساموكاتتار جەكە كولىك قۇرالى رەتىندە تانىلادى، سونداي-اق ساعاتىنا 25 كم جىلدامدىقپەن جۇرەتىن كولىك قۇرالدارى ەلەكتر ساموكات ساناتىنا جاتادى. ەلەكتر ساموكاتتار ۆەلوسيپەد جولدارى مەن جول جيەكتەرىندە ەركىن جۇرە الادى. ال تروتۋارلاردا ساعاتىنا 6 كيلومەتردەن اسپايتىن جىلدامدىقپەن جۇرۋگە رۇقسات ەتىلەدى. بۇل جاياۋ جۇرگىنشىلەر مەن جۇرگىزۋشىلەر ءۇشىن ەڭ قولايلى شەشىم"، – دەدى دەپۋتات.

ونىڭ پايىمىنشا، تروتۋارداعى جىلدامدىقتى شەكتەۋ – جاياۋ جۇرگىنشىلەردىڭ قاۋىپسىزدىگىن قامتاماسىز ەتەدى.

"ەلەكتر ساموكاتتار جول ءجۇرۋ بولىگىنىڭ وڭ جاق شەتىمەن، ونىڭ ىشىندە اۆتوبۋس جولاعىمەن ءبىر قاتاردا جۇرۋىنە بولادى. الايدا، ول ءۇشىن جۇرگىزۋشى 18 جاسقا تولۋى جانە شلەم كيۋى كەرەك. سونداي-اق ونىڭ ۇستىندە جارىق شاعىلىستىراتىن كيىم مەن جۇرگىزۋشى كۋالىگى بولۋى قاجەت"، – دەدى ەكاتەرينا سمىشليايەۆا.