قازاقستاندىقتار اراسىندا جالعان حابارلامالاردىڭ تارالۋى توقتاماي تۇر. وسى ايدا قىزۋ تالقىلانعان حابارلامالار وقىرمان نازارىنا ۇسىنامىز. 

تۇركىستان وبلىسىنداعى ميتينگكە بايلانىستى ۆيدەوحابارلاما جالعان بولىپ شىقتى

جەلىدە 12-13 ساۋىرگە قاراعان ءتۇنى باتىس ەۋروپا-باتىس جۇڭگو تاس جولىنىڭ بويىندا ورنالاسقان قازمۇنايگاز اۆتوجانارماي قۇيۋ ستانسياسىنىڭ جانىندا ازاماتتار جانارماي باعاسىنىڭ وسۋىنە بايلانىستى ميتينگكە جينالدى دەگەن بەينەجازبا پايدا بولدى، دەپ حابارلايدى تۇركىستان وبلىسى پوليسيا دەپارتامەنتىنىڭ باسپا ءسوز قىزمەتى.

"سايرام اۋدانىنىڭ قۇزىرەتتى ورگاندارى 13.04.2023 ج. وقيعا ورنىنا تۇنگى ساعات 04.30 شاماسىندا پوليسيا قىزمەتكەرلەرى مالىمەتتەردىڭ جالعان بولىپ شىققانىن انىقتادى. ياعني، 12.04.2023 ج. اۆتوجولدا اۆتوجارىس ءوتتى"، - دەپ حابارلادى ايماق پوليسياسى.

قازىرگى ۋاقىتتا اۋداندىق پب قىزمەتكەرلەرى جالعان اقپارات تاراتقان ازاماتتى انىقتاۋ ماقساتىندا ءتيىستى جۇمىستار جۇرگىزىپ جاتقاندارىن حابارلادى.

سونىمەن قاتار، وبلىس پد-دا جالعان اقپارات تاراتقانى ءۇشىن قاتاڭ جاۋاپكەرشىلىككە تارتۋ قاراستىرىلعانىن ەسكە سالىپ، تەك قانا رەسمي اقپارات كوزدەرىنە عانا سەنۋدى سۇرايدى.

الاياقتار رامازان ايىنا بايلانىستى Halyk Bank اتىنان «سىيلىق» تاراتقان

WhatsApp الەۋمەتتىك جەلىسىندە الاياقتار Halyk Bank اتىنان رامازانعا سىيلىقتار ۇتىسىنا قاتىسۋعا شاقىرۋمەن حابارلاما جىبەرگەن.

Halyk Bank كومپانياسىنىڭ رەسمي سايتىندا رامازانعا سىيلىقتار نەمەسە باسقا دا سىياقىلار تۋرالى حابارلاندىرۋلار جاريالانباعان. Instagram جانە Facebook الەۋمەتتىك جەلىلەرىندەگى بانكتىڭ رەسمي پاراقشالارىندا دا مۇنداي ەشتەڭە ايتىلماعان.

اقپاراتتىق بيۋللەتەننىڭ ءوزى فيشينگتىك سحەمانىڭ بارلىق بەلگىلەرىنە يە: ول پايدالانۋشىلارعا بەلگىلى ءبىر حابارلاندىرۋ جىبەرەدى جانە بەلگىسىز ءارى ءقاۋىپتى دەپ تانىلعان سايتقا اكەلەدى. بۇرىن ءبىز وسىنداي سحەمالاردىڭ ءقاۋىپى تۋرالى ايتقان بولاتىنبىز.

ينتەرنەتتەگى الاياقتىقتىڭ بۇل ءتۇرى فيشينگ دەپ اتالادى. ءوز سايتتارىنىڭ كومەگىمەن الاياقتار ءموبيلدى بانكينگتەن، جەكە شوتتاردان جانە باسقالاردان لوگين مەن پارولدەر سياقتى پايدالانۋشىلاردىڭ جەكە اقپاراتىنا قول جەتكىزە الادى.

"نازاربايەۆ زياتكەرلىك مەكتەبى" ەمتيحاندارعا قاتىستى ماتەريالداردى ساتۋ تۋرالى اقپاراتتى تەرىسكە شىعاردى

"نازاربايەۆ زياتكەرلىك مەكتەپتەرى" باسقارما ءتوراعاسى ءانۋار جانعوزين مەكتەپ تۇلەكتەرى تاپسىراتىن ەمتيحاندارعا ماتەريالداردى ساتۋ تۋرالى اقپاراتتى جوققا شىعاردى.

"سوڭعى ۋاقىتتا الەۋمەتتىك جەلىلەر مەن مەسسەندجەرلەردە "نازاربايەۆ زياتكەرلىك مەكتەپتەرى" دببۇ تۇلەكتەرى تاپسىراتىن ەمتيحاندارعا ماتەريالداردى ساتۋ تۋرالى اقپارات تاراتىلۋدا. بۇل اقپارات شىندىققا سايكەس كەلمەيدى. ءبىزدىڭ مەكتەپتەردە وقۋشىلاردى باعالاۋ راسىمدەرىن وتكىزۋگە ارنالعان كەز كەلگەن ەمتيحان ماتەريالدارى حالىقارالىق ستاندارتتارعا سايكەس ازىرلەنەدى. ولاردى ازىرلەۋ كەزىندە قۇپيالىلىق پەن قاۋىپسىزدىك شارالارى ساقتالادى"، - دەپ جازدى ءانۋار جانعوزين ءوزىنىڭ Instagram الەۋمەتتىك جەلىسىندەگى رەسمي پاراقشاسىندا.

ءانۋار جانعوزين ازاماتتاردى ارانداتۋشىلىققا بوي الدىرماۋعا شاقىردى جانە الاياقتىقتىڭ كەز كەلگەن ءتۇرى توقتاتىلاتىنىن ايتتى.

"ءبىز وقۋشىلارىمىزدى وقىتۋدا ادالدىق پەن اشىقتىقتىڭ قاتاڭ پرينسيپتەرىن ۇستانامىز جانە الاياقتىقتىڭ كەز كەلگەن ءتۇرىن، سونىڭ ىشىندە ەمتيحان ماتەريالدارىن ساتۋدى مۇلدەم قۇپتامايمىز. مۇنداي ىس-ارەكەتتەر ءبىزدىڭ ەرەجەلەرىمىزدى ەلەۋلى بۇزۋ رەتىندە قاراستىرىلادى جانە وقۋ ورنىنان دەرەۋ شىعارىلۋعا نەمەسە بوساتىلۋعا جانە كەيىننەن زاڭنامالىق دەڭگەيدە جاۋاپكەرشىلىككە تارتۋعا اكەلۋى مۇمكىن"، - دەپ قورىتىندىلادى ءانۋار جانعوزين.

300 مىڭ تەڭگە زەينەتاقى بەرىلەتىنى جونىندە فەيك حابارلاما تارادى

YouTube پايدالانۋشىلارى اراسىندا 200-300 مىڭ تەڭگە زەينەتاقى، جاردەماقى جانە ۇستەمەاقى الۋ مۇمكىندىگى تۋرالى جالعان اقپارات تاراتىلۋدا. ول ءۇشىن الاياقتار وزدەرى كورسەتكەن سايتقا كىرىپ، جەكە دەرەكتەرىن قالدىرۋدى سۇرايدى، دەپ حابارلايدى Qamshy.kz اقپارات اگەنتتىگى.

بەينەروليكتە "دۇيسەنبىدەن" باستاپ زەينەتكەرلەر، از قامتىلعاندار جانە ازاماتتاردىڭ باسقا دا ساناتتارى 300 مىڭ تەڭگە كولەمىندە ارنايى جاردەماقى الاتىنى، ال ولاردىڭ كەيبىرەۋلەرى 200 مىڭ ۇستەمەاقى بەرىلەتىنى ايتىلعان. الايدا بۇل حابارلاما – جالعان.

تاراتىلاتىن روليكتە جەرگىلىكتى تەلەارنالاردىڭ ءبىرىنىڭ جاڭالىقتار شىعارىلىمىنان ءۇزىندى بەرىلگەن. ءبىراق ءۇزىندى ۆيدەوداعى داۋىس باسقاشا. جۇرگىزۋشىنىڭ ناعىز داۋىسى مەن ءماتىنى ۇلكەن جاردەماقىلار تۋرالى اڭگىمەلەيتىن باسقا داۋىسپەن اۋىستىرىلعانى انىقتالدى.

مۇنداي مازمۇنداعى جاڭالىقتار ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ رەسمي سايتىندا دا جوق. سونىمەن قاتار، حابارلاندىرۋ ءماتىنىنىڭ ءوزى كۇمان تۋدىرادى. بىرىنشىدەن، "وسى دۇيسەنبىدەن باستاپ" دەگەن سوزدە ەشقانداي ناقتىلىق جوق ءارى سەنىمسىز كورىنەدى. ديكتور ناقتى كۇندى اتاماعان، دەمەك، بۇل اقپاراتتىڭ جالعان بولۋ ىقتيمالدىلىعىن ارتتىرادى.

ەكىنشىدەن، جاڭا، ۇلعايتىلعان تولەم تاعايىندالعان ازاماتتاردىڭ ساناتتارىن تىزىمدەي وتىرىپ، زەينەتكەرلەردى، كەدەيلەردى تىزىمدەپ شىققان. بۇل تۇجىرىم ءدال ەمەس ءارى ازاماتتاردىڭ جاڭىلىسۋىنا سەبەپ بولادى.

بۇل جارنامالىق بەينەنىڭ ماقساتى – كورەرمەننىڭ مازمۇنى قانداي دا ءبىر تولەمدەرگە قاتىسى جوق ءۇشىنشى تاراپ سايتىنا وتكىزۋ.