پروكۋراتۋرا ماڭعىستاۋ وبلىسىنىڭ كوللەدجدەرىندە جالعان ديپلومدارمەن جۇمىس ىستەگەن قىزمەتكەرلەردى انىقتادى، دەپ حابارلادى ماڭعىستاۋ وبلىسىنىڭ پروكۋراتۋراسى.

وبلىستىق پروكۋراتۋرا مالىمەتىنشە، تالداۋ جالعان قۇجاتتى پايدالانۋدىڭ 8 دەرەگىن انىقتادى: اقتاۋ كوللەدجدەرىندە – 5 وقىتۋشى، قاراقيا اۋدانىندا – 3 وقىتۋشى جۇمىس ىستەگەن.

پروكۋرورلار بارلىق فاكتىلەر بويىنشا سوتقا دەيىنگى تەرگەپ-تەكسەرۋدى باستاپ ماتەريالداردى ودان ءارى تەرگەپ-تەكسەرۋ جۇرگىزۋ ءۇشىن پوليسيا ورگاندارىنا جولداعان.

مىسالى، قۇقىق بۇزۋشىلاردىڭ ءبىرى 2 جىل بويى قاراقيا كاسىپتىك كوللەدجىندە جالعان ديپلوممەن تاماقتاندىرۋدى ۇيىمداستىرۋ بويىنشا وقىتۋشىنىڭ جۇمىسىن اتقارعان.

قاراقيا اۋدانىنىڭ سوتى ونى ق ر قىلمىستىق كودەكسىنىڭ 385-بابىنىڭ 3-بولىگى (كورىنەۋ جالعان قۇجاتتى پايدالانۋ) بويىنشا 30 ساعات قوعامدىق جۇمىستار تۇرىندە جازا تاعايىنداۋمەن قىلمىستىق جاۋاپتىلىققا تارتتى.

وسى تەكتەس قۇقىق بۇزۋشىلىق ءۇشىن اتالعان سوت سول كوللەدجدىڭ باسقا ەكى وقىتۋشىسىنا قاتىستى ۇكىم شىعاردى، ولار جۇمىستان بوساتىلدى.

ءتورت ەپيزود بويىنشا پوليسيا ورگاندارىنىڭ سوتقا دەيىنگى تەرگەپ-تەكسەرۋ جۇرگىزگەن قىلمىستىق ىستەرى راقىمشىلىق اكتىسى بويىنشا توقتاتىلدى.

ءبىر دەرەك بويىنشا سوتقا دەيىنگى تەرگەپ-تەكسەرۋ ارەكەتتەرى جۇرگىزىلۋدە.

ايتا كەتەيىك، 2022 جىلى پروكۋراتۋرا ۇقساس فاكتىلەر بويىنشا 14 قىلمىستىق ءىس تىركەگەن جانە وسى باعىتتاعى جۇمىستاردى جالعاستىرۋدا.

ماڭعىستاۋ وبلىسىنىڭ پروكۋراتۋراسى ازاماتتاردى بولاشاق ۇرپاققا قاجەتتى ءبىلىم بەرۋ جانە كاسىبي ورتانى قولداۋ ءۇشىن شىنايى ءبىلىم الۋعا شاقىرادى.