20 شىلدەدە قاڭتار وقيعاسى كەزىندە وققا ۇشقان 4 جاسار ايكوركەمنىڭ تۋىستارى سوتتىڭ اشىقتىعىن تالاپ ەتىپ، پرەزيدەنت اكىمشىلىگىنە باردى.

ايدوس مەلدەحان قىزىنىڭ قازاسى بويىنشا باستالعان سوتقا ءوزىن كىرگىزبەي قويعانىنا قارسى بولعان. بۇل تۋرالى ازاتتىق راديوسى حابارلادى.

پرەزيدەنت اكىمشىلىگىنىڭ وكىلى ەرعالي نازاروۆ ايدوس مەلدەحاننىڭ ساۋالدارىنا جاۋاپ بەرمەي، ارىز قالدىرۋىن سۇراعان. ايكوركەمنىڭ اكەسى كەلەسى سوت پروسەسىنە دەيىن جاۋاپ الماي كەتپەيتىنىن ايتتى. 

ەسكە سالا كەتەيىك، 13 شىلدەدە الماتى گارنيزونى اسكەري سوتىندا ايكوركەم مەلدەحاننىڭ قازاسى بويىنشا سوت پروسەسى باستالعان ەدى. سۋديا ايكوركەمنىڭ اكەسى مەن اپكەسىن "مەملەكەتتىك قۇپيا" دەپ، سوتقا قاتىستىرمادى. ءىس جابىق قارالاتىن بولدى.  

قازىرگى ۋاقىتتا ايكوركەمنىڭ قازاسىنا بايلانىستى ءبىر اسكەري قىزمەتكەر ايىپتالىپ جاتىر. ونىڭ ۇستىنەن "وكىلەتىن اسىرا پايدالانۋ" بابى بويىنشا ءىس قوزعالعان. كەلەسى سوت وتىرىسى 26 شىلدەدە وتەدى.