قاڭتار وقيعاسىندا اۋەجايدى باسىپ الدى دەپ ايىپتالعان جۋرناليست ايگەرىم تىلەۋجان ادۆوكاتى اينارا ايدارحانوۆامەن كەزدەسكەندە الماتىداعى №72 تەرگەۋ يزولياتورىندا ايەلدەر اشتىق جاريالاعانىن ايتقان.
بۇل تۋرالى ازاتتىق راديوسى حابارلادى.
"ايەلدەر جەتەكشىلىككە ارىز جازعان، سەبەبى ولاردى باسقالاردان بولەك ۇستاۋى كەرەك. ءبىراق 72 ايەل ورتاق كامەرادا وتىر، ولاردىڭ قۇقىعى بۇزىلىپ جاتىر. ايگەرىممەن ءبىر كامەرادا وتىرعان ايەلدەردىڭ ىشىندە بىرەۋىنىڭ استماسى اسقىنعان، ەكىنشىسىندە ەپيلەپسيا بار. ايگەرىم ايعايلاپ كومەك شاقىرماعاندا ولاردىڭ جاعدايى قيىن بولار ەدى. بەلگىلى ءبىر اۋرۋى بار ادامداردى ارنايى كامەرادا دارىگەردىڭ باقىلاۋىندا ۇستاۋ كەرەك" دەپ جازدى ادۆوكات ايدارحانوۆا.
ادۆوكاتتىڭ سوزىنشە، ءقازىر يزولياتوردا كەمى ەكى ايەلدىڭ اشتىق جاريالاعانى بەلگىلى، ايەلدەردىڭ كوبى قاماۋ ورنىنداعى جاعدايعا نارازى ءارى ءادىل تەرگەۋ مەن ءادىل سوت شەشىمىن تالاپ ەتەدى.
الايدا قىلمىستىق-اتقارۋ كوميتەتى، بۇعان قارسى كۇن سايىن تۇتقىنداردىڭ دەنساۋلىعى تەكسەرىلەتىنىن حابارلادى.
پىكىر قالدىرۋ