ءومىر ءسۇرۋ قۇنى بويىنشا ەلدەر رەيتينگىندە قازاقستان 140 مەملەكەتتىڭ اراسىندا 91-ورىنعا يە بولدى. بۇل تۋرالى Finprom.kz جازدى. 

بيىل ءبىرىنشى توقسان قورىتىندىسى بويىنشا ءومىر ءسۇرۋ قۇنى رەيتينگىسىندە قازاقستان 91-ورىنعا تۇراقتادى. ەلىمىزدىڭ يندەكسى – 25،4. يندەكس مولشەرى تۇتىنۋ تاۋارلارى مەن جالعا بەرىلەتىن تۇرعىن ءۇي قۇنىن نيۋ-يورك قالاسىمەن سالىستىرا وتىرىپ باعالانادى

تمد ەلدەرىنىڭ ىشىندە قازاقستان ارمەنيادان كەيىنگى ەكىنشى ورىنعا شىعىپ، ەڭ قىمبات مەملەكەتتىك ءبىرى اتاندى.تىزىمدە ارمەنيا – 57 ورىندا، بەلارۋس – 98، مولدوۆا 101، رەسەي –110، قىرعىزستان – 111، ازەربايجان – 119، وزبەكستان 125ء-شى ورىندا تۇر.

شىلدە ايىنداعى ەسەپ بويىنشا بيىل ەلدە تاۋارلار مەن قىزمەتتەردىڭ باعاسى ءبىر جىلدا 14%-عا وسكەن. جىلدىق ديناميكا بويىنشا ازىق-تۇلىك تاۋارلارى – 13،5%-عا، ازىق-تۇلىك ەمەس تاۋارلار – 15%-عا، اقىلى قىزمەتتەر – 13،6%-عا قىمباتتادى.