الەۋمەتتىك جەلىدە قازاق تىلىنە قاتىستى تاعى دا داۋ تۋدى. بۇل جولى الماتى قالاسىنداعى «نەمو» دەلفيناريىندە قازاق تىلىندە قىزمەت كورسەتىلمەگەن. ناقتىلاپ ايتساق، اتالعان مەكەمەدە شوۋ باعدارلامالاردىڭ بارلىعى ورىس تىلىندە وتەدى ەكەن. بۇل تۋرالى جۋرناليست جازيرا بايدالى ءوزىنىڭ الەۋمەتتىك جەلىدەگى پاراقشاسىنا جازدى. 

«2 قىركۇيەك كۇنى 11 ادام بولىپ الماتىداعى "نەمو" دەلفينارييىنە باردىق. 3 ەرەسەك، 8 بالا. 15:00-دە ىشكە كىردىك. قويىلىم باستالدى. باسىندا 10 مينۋت بويى ساحنا ارتىنان ءماتىن وقىلدى. ورىسشا. ءبىز قويىلىمدى كۇتىپ وتىرا بەردىك. سوسىن بارىپ 2 يتبالىقپەن ترەنەر ورتاعا شىقتى. ونەرلەرىن كورسەتتى. دىبىستىق سۇيەمەلدەمە ورىسشا بولدى. مەن 20-25 مينۋتتان كەيىن سىرتقا شىقتىم. كاسساعا بارىپ "نەگە باعدارلاما تۇتاس ورىسشا؟" دەپ سۇراق قويدىم. بيلەتىمدى كورسەتىپ قايتارۋدى تالاپ ەتتىم» – دەيدى جازيرا بايدالى. 

جەڭىلدىكپەن الىنعاندىقتان، بيلەتتىڭ اقشاسى قايتارىلماعان. كاسسادا باستالعان داۋ باسشىلىقتىڭ ارالاسۋىمەن دە شەشىلمەگەن. 

ارتىنشا جۋرناليست 2gis-تە پىكىر قالدىرىپ، سۇراعىن قايتا قويادى. مەكەمە ونىڭ بۇل تالابىن “ق ر قىلمىستىق كودەكسىنىڭ 174-بابىنىڭ 1-تارماعى "ۇلتارالىق الاۋىزدىقتى قوزدىرۋ” دەپ باعالايدى. اتالعان مەكەمە مەملەكەتتىك ستاتۋسى جوق بولعاندىقتان باعدارلامالاردى قازاق تىلىندە وتكىزۋگە مىندەتتى ەمەس ەكەنىن العا تارتقان.

وسى داۋدان كەيىن 2gis-تە پىكىر قالدىرۋشىلار سانى كۇرت كوبەيگەن. كوبى قازاق ءتىلىنىڭ مارتەبەسىن ايتىپ، شوۋ باعدالامالاردىڭ مەملەكەتتىك تىلدە ءوتۋىن تالاپ ەتىپ جاتىر.

Qamshy.kz پورتالىنىڭ ءتىلشىسى "نەمونىڭ" ورتالىعىنا حابارلاسىپ، وقيعانىڭ ءمان-جايىن بىلمەك بولدى. العاشىندا ءاتى-جونىن ايتقىسى كەلمەگەن ورتالىقتىڭ قىزمەتكەرى قازاقشا وتەتىن باعدارلامالار بارىن ايتتى. دەگەنمەن "قازىرگى ۋاقىتتا قانداي شوۋ قازاق تىلىندە وتەدى؟" دەگەن ءجۋرناليستىڭ ساۋالىنا جاۋاپ بەرە المادى. 

كەيىنىرەك "نەمونىڭ" PR مەنەدجەرى جاقىن ارادا رەسمي مالىمدەمە جاسايتىنىن ايتتى. 

«ءبىز جاقىن كۇندەرى وسى وقيعاعا قاتىستى Instagram جەلىسىندە تۇسىنىكتەمە بەرەتىن بولامىز. بارلىق بۇقارالىق اقپارات قۇرالدارىنا حابارلاسامىز. ءبىراق ءدال قازىرگى ۋاقىتتا سۇراقتارىڭىزعا جاۋاپ بەرە المايمىز»، - دەپ ورىس تىلىندە جاۋاپ قايىرىپ، تۇتقانى قويا سالدى.

ءبىر ايتا كەتەرلىگى مەكەمەنىڭ الەۋمەتتىك پاراقشاسىنداعى جازبالارى دا، اقپاراتتىق سايتىنداعى ماتىندەر دە تۇگەلدەي ورىس تىلىندە جازىلعان.

ايتا كەتەيىك، «نەمو» دەلفيناريى 2015 جىلدان بەرى جۇمىس ىستەپ كەلە جاتىر. رەسمي سايتىندا 350-گە تارتا بالالارعا رەابيليتاسيالىق كۋرس وتكىزگەنى جانە 2017 جىلى وتكەن فورۋمعا اكىمدىك قولداۋ كورسەتكەنى جازىلعان.

وسىعان بايلانىستى الماتى قالاسى اكىمدىگىنىڭ باسپا ءسوز قىزمەتىنە حابارلاستىق. باسپا ءسوز حاتشىسى "بۇل – تەك ءبىر رەتتىك قولداۋ بولعان" دەپ جاۋاپ بەردى. 

دەلفينارييگە قاتىستى بۇل العاشقى داۋ ەمەس. بۇعان دەيىن تەڭىز جانۋارلارىن جابىق كەڭىستىكتە ۇستاپ وتىرعانى ءۇشىن نارازىلىقتار كوبەيىپ، جابىلۋ الدىندا تۇرعان. ورتالىقتىڭ باسشىسى پرەزيدەنت قاسىم-جومارت توقايەۆقا حات جولداپ، اۋتيزم، دسپ سياقتى ناۋقاسقا شالدىققان بالالارعا دەلفينوتەراپيا وتكىزىپ وتىرعانىن العا تارتىپ، مەكەمەنى ساقتاپ قالعان.

قازاق تىلىنە شىققان داۋعا پىكىر بىلدىرۋشىلەردىڭ اراسىندا وسى ماسەلەنى قايتا كوتەرىپ، ورتالىقتى جابۋدى سۇراپ وتىرعاندار دا بار.

اۆتورى: اسەم جۇماقان