بۇگىن قاڭتاردا وققا ۇشقان 4 جاسار ايكوركەمنىڭ ىسىنە بايلانىستى سوت وتىرىسى ءوتتى. قىلمىستىق ءىس الماتى گارنيزونى اسكەري سوتىندا قارالىپ جاتىر.
بۇگىنگى سوت وتىرىسىندا كۋاگەرلەر تىڭدالدى. سوت جابىق بولعاندىقتان، جۋرناليستتەر سوتقا كىرگىزىلمەدى. ايكوركەمنىڭ اكەسى ايدوس مەلدەحان الداعى سوت وتىرىسىنا ءوزىن قاتىستىرماۋى مۇمكىن ەكەنىن ايتتى.
"كۋاگەر رەتىندە فارحات دەگەن جىگىت پەن مەنىڭ ۇلىم تىڭدالدى. نەگىزى سوت پروسەسسى جابىق ءوتىپ جاتىر. بۇگىن قۇپيا ماتەريالدار قارالماعاندىقتان عانا مەنى كىرگىزدى. الداعى سوت وتىرىستارىندا قۇپيا ماتەريالدار قارالاتىن بولسا، مەنى قاتىستىرماۋى مۇمكىن" – دەدى ايدوس مەلدەحان.
سونىمەن قاتار، ول بيلىك جوعارى لاۋازىمداعى اسكەري قىزمەتكەرلەردى قورعاپ قالۋعا تىرىسىپ جاتقانىن مالىمدەدى.
"سوت پروسەسسى نەمەن اياقتالاتىنى بەلگىسىز. شىنىنا كەلگەندە بيلىككە دە، اسكەري سوتقا دا سەنىم جوق. مەن قارۋ قولدانعاندار مەن قارۋ قولدانۋعا بۇيرىق بەرگەندەردىڭ جاۋاپكەرشىلىككە تارتىلۋىن عانا تالاپ ەتەم. ال بيلىك ۇلكەن لاۋازىمدا وتىرعان اسكەري قىزمەتكەرلەر مەن وق اتقانداردى جاۋاپكەرشىلىككە تارتپاۋدىڭ امالىن جاساپ جاتىر"– دەدى ايكوركەمنىڭ اكەسى.
پىكىر قالدىرۋ