اقتاۋداعى №3 مەكتەپتىڭ 11ء-شى سىنىبىندا وقيتىن قىز بالا مەكتەپ اجەتحاناسىندا ءومىرى بولمايتىن دارەتحانا قاعازى مەن سۇيىق سابىندى كورىپ، سول تۋرالى 20 سەكۋندتىق ۆيدەو تۇسىرگەن:

"كوميسسيا كەلە جاتىر دا ءبىزدىڭ مەكتەپكە. ءۇش تۋالەتتىڭ ۇشەۋىندە دە دارەتحانا قاعازى تۇر عوي! ول ول ما، ءتىپتى قول جۋاتىن جەردەگى سابىن سالعىشتىڭ ىشىندە سۇيىق سابىن تولىپ تۇر. بىلاي نەگىزى سابىن بولمايتىن"، دەگەن قىسقا عانا ءسوزىن قوسىپ، جەلىگە جاريالاپتى.

سويتسەك، الگى قاعاز بەن سابىننىڭ شىنىمەن دە بالالار ءۇشىن ەمەس، كوميسسيا ءۇشىن تۇرعانىن جاريا ەتىپ قويعانى ءۇشىن مەكتەپ باسشىلىعى وقۋشىنىڭ وليمپياداعا قاتىسۋىنا تىيىم سالىپ، اكە-شەشەڭە ايىپپۇل سالامىز دەپ قورقىتىپتى.

بۇل مەكتەپتىڭ ديرەكتورى – قۋانىشيەۆا گۇلميرا بالابايەۆنا دەگەن كىسى.

ەكىنشى ۆيدەودا الگى قىز جىلاپ وتىر:

"اكە-شەشەڭە شتراف سالامىز، جارىستارعا بارمايسىڭ دەدى. نامىسىما تيەتىن سوزدەر ايتتى. نەگە ويتەدى"، دەپ كۇيىنەدى.

جاسىراتىن نەسى بار، قازاقستاندا مەملەكەتتىك مەكەمە اتاۋلىنىڭ ءبارى تەك تەكسەرىپ كەلەتىن كوميسسيانىڭ كوزىن بوياۋ ءۇشىن جۇمىس ىستەيدى.

قازاقتىڭ مەكتەبى قازاق بالاسىن ەڭ الدىمەن تارتىپكە، ادالدىق پەن جاۋاپكەرشىلىككە تاربيەلەۋى ءتيىس ەدى-اۋ...

ءبىراق قازاقستاننىڭ بۇگىنگى جۇيەسىندە بارلىق سالالاردىڭ ىرىپ-شىرىگەنى سونشا، شىندىقتى ايتقانى ءۇشىن ەندىگى مەكتەپتەگى بالالاردى جازالاي باستاعان ەكەن.

ال وقۋ-اعارتۋ ءمينيسترى عاني بەيسەمبايەۆ بولسا، بۇگىن فەيسبۋكتە مۇعالىمدەر كۇنى مەرەكەسىنە وراي، نۇرتورە ءجۇسىپ، اسحات ايماعامبەتوۆ، تامارا دۇيسەنوۆا، ايدا بالايەۆا، ساياسات نۇربەك، اجار عينياتقا «ۇستازىم مەنىڭ، ۇستازىم!» اتتى چەللەندج جولدادى.