پاۆلودارلىق قوعام بەلسەندىسى دياس قۇزايىردىڭ ۇستىنەن قىلمىستىق ءىس قوزعالدى. سول باياعى 174 باپ (ۇلت ارازدىعىن تۋدىرۋ). سونداعى بار ايىبى – ريددەر قالاسىنىڭ اكىمشىلىك قىزمەتكەرلەرىنەن مەملەكەتتىك ءتىلدى نەلىكتەن بىلمەيتىندىكتەرىن جانە قانشا ۋاقىتتا ۇيرەنەتىنىن سۇراعانى.

ول ۆيدەونى كورىپ شىققان جۋرناليست مۇحتار تۇمەنباي الەۋمەتتىك جەلىدە ءوز پىكىرىن جازعان ەكەن:

"دياس نە داۋىس كوتەرگەن جوق، نە بالاعات سويلەپ، بىرەۋدىڭ ۇلتىنا نە ناسىلىنە قاتىستى ءسوز ايتقان جوق، زاڭسىز تالاپتار دا قويعان ەمەس. تەك مەملەكەتتىك قىزمەتكەرلەردىڭ مەملەكەتتىك ءتىلدى بىلمەۋ سەبەپتەرىن انىقتاماق بولدى جانە ۇيرەنەتىن ويلارى بار ما دەپ سۇرادى. بولدى. باسقا دانەڭە دە جوق. ءبارى سىپايى ءوتتى.

مەنىڭ سۇرايىن دەگەنىم، قاشاننان بەرى قازاقستان زاڭدارىنىڭ ورىندالۋىن تالاپ ەتۋ قىلمىس بولىپ سانالاتىن بولعان؟ باسقاسى باسقا، مەملەكەتتىك قىزمەتكەرلەرلەردىڭ مەملەكەتتىك ءتىلدى ءبىلۋى شارت. زاڭمەن بەكىتىلگەن شارت. ونسىز ازامات مەملەكەتتىك ورگاندا جۇمىس ىستەي المايدى.

الايدا، بايقاپ وتىرسام، ريددەر قالاسىنىڭ اكىمشىلىگى ءوز زاڭدارىمەن ءومىر سۇرەتىنگە ۇقسايدى. ولارعا قازاقستان زاڭدارى زاڭ ەمەس. ول ازداي، دياس سياقتى جاق اشقانداردى قۋدالاۋعا كوشىپ وتىر. ءتىپتى ريددەر قالاسىنىڭ حۇقىق قورعاۋ ورگاندارى ەرىنبەي، پاۆلودارعا بارىپ، دياستىڭ ۇيىنە باسا كوكتەپ كىرىپ، ءتىنتۋ جۇرگىزگەن. قانداي نەگىز بولدى ءتىنتۋ جۇرگىزۋگە؟ ول نە، ەكونوميكالىق قىلمىس جاساپ پا، پاراقورلىقپەن ۇستالدى ما، الدە مەملەكەتكە ساتقىندىق جاسادى دەگەن ايىپ تاعىلىپ وتىر ما؟ نە ىزدەدى ونىڭ ۇيىنەن ريددەر ساقشىلارى؟ جالپى قىلمىستىق ءىس قوزعاۋعا نە نەگىز بولدى؟ سويتسەك، اكىمشىلىك قىزمەتكەرلەرىنەن تۇسكەن ءبىر پاراق ارىز شاعىم ەكەن.

ءجا، ونى دا ءجون دەيىك. ارىز ءتۇستى مە، ونى قابىلداپ، انىق-قانىعىن انىقتاۋ – حۇقىق قورعاۋ ورگاندارىنىڭ مىندەتى. ءبىراق ەرتەڭ دياستىڭ ەشبىر قىلمىستىق ءىس جاساماعانى انىقتالاتىن بولسا، وندا جاڭاعى ارىز-شاعىم تۇسىرگەن ادامدار جالعان جالا جاپقانى ءۇشىن جاۋاپقا تارتىلۋى ءتيىس. ونداي دا باپ بار قىلمىستىق كودەكستە. 2 جىلعا دەيىن باس بوستاندىعىنان ايىرۋ كوزدەلگەن. سونى بىلە مە ەكەن ارىزدانۋشىلار؟ جانە كەشەگى ءتىنتۋ جۇرگىزگەن پوليسەيلەر ولاردى جاۋاپقا تارتۋعا ءازىر مە؟".