ءدىن مەن ءداستۇر باعىتى. ءقازىر ءدىن مەن ءداستۇر ساباقتاستىعىن ناسيحاتتاۋ بويىنشا قالالىق، وبلىستىق مەشىتتەر جانىنان «ءدىن مەن ءداستۇر» ورتالىقتارى اشىلىپ، جاماعات اراسىندا ادەت-عۇرپىمىز بەن ءسالت-داستۇرىمىز كەڭىنەن دارىپتەلۋدە. مەشىت اۋلالارىندا، مادەنيەت ۇيلەرىندە ءدىني مەرەكەلەردى ۇلتتىق ناقىشتا اتاپ ءوتۋ داستۇرگە اينالدى. ءدىني، رۋحاني ءىس-شارالاردا ۇلتتىق اسپاپتارمەن ارناۋ، تولعاۋ، تەرمە ورىندالىپ، بابالارىمىزدىڭ وسيەتتى ولەڭدەرى دارىپتەلۋدە. جاستاردىڭ ساناسىنا ۇلتتىق قۇندىلىقتارىمىزدى ءسىڭىرۋ جۇمىستارى ۇزدىكسىز جالعاسا بەرەدى.

ىزگى قوعام باعىتى. ءدىن قىزمەتكەرلەرى قوعامدى ىزگىلەندىرۋگە وزىندىك ۇلەس قوسىپ كەلەدى. يمامدار قوعامدا ادىلەتتىلىك، ادامگەرشىلىك، ادەپ سىندى قۇندىلىقتاردى قالىپتاستىرۋدا بەلسەندى قىزمەت اتقارۋدا. قالالىق، وبلىستىق مەشىت جانىنان اشىلعان «وتباسىلىق كەڭەس بەرۋ» ورتالىقتارى 1 جىلدا اجىراسۋعا شەشىم قابىلداعان 500-دەن استام جۇپتىڭ نەكەسىن ساقتاپ قالدى. جاستاردى جامان ادەتتەردەن (قۇمار ويىنعا تاۋەلدىلىك، تەمەكى شەگۋ، اراق ءىشۋ ت.ب.) ساقتاندىرۋ باعىتىنداعى ناسيحاتتىق جۇمىستار جالعاسا بەرەدى.

يحسان جانە ناسيحات باعىتى. جۇما جانە كۇندەلىكتى ناماز الدىنداعى ۋاعىز جۇمىستارىندا جاستارعا ءاربىر جاقسى ءىستى كوركەم تۇردە (يحسان دارەجەسىندە) ورىنداۋ تۋرالى ناسيحات ايتىلۋدا. ءمۇفتيات جانىنان اشىلعان «جاستار ءىسى» سەكتورى، «زەيىن» وقىرماندار كلۋبى جاس بۋىننىڭ زەيىنىن اشىپ، رۋحاني الەمىن بايىتۋعا ۇلەس قوسۋدا. ءقازىر الەم حالقى جات ءدىني اعىمدارعا تويتارىس بەرۋدىڭ توتە جولى - سان عاسىردان بەرى قالىپتاسقان ءداستۇرلى قۇندىلىقتاردى جاڭعىرتۋ ەكەنىن ءتۇسىندى. بۇگىندە يمامدار يحسان ءىلىمىن ناسيحاتتاۋمەن قاتار، ءسالت-داستۇرىمىزدىڭ جاناشىرىنا اينالدى.

ءدىني وقۋ-اعارتۋ باعىتى. سوڭعى 9 ايدىڭ ەسەبى بويىنشا قالالىق، وبلىستىق، اۋداندىق، اۋىلدىق مەشىتتەر جانىنان اشىلعان ساۋات اشۋ كۋرستارىندا 23 665 ادام العاشقى ءدىني ساۋاتىن اشتى. 7 417 ادام قۇران وقي الاتىن دارەجەگە جەتتى. 5 258 ادام نامازعا جىعىلدى. ءدىني ساۋات اشۋ كۋرستارىندا ءبىلىم العان ازاماتتاردا دەسترۋكتيۆتى ءدىني اعىمداردىڭ تەرىس يدەولوگياسىنا قارسى يمۋنيتەت قالىپتاستى.

جات ءدىني اعىمداردان ساقتاندىرۋ باعىتى. جاستاردى دەسترۋكتيۆتى ءدىني اعىمداردىڭ تەرىس يدەولوگياسىنان ساقتاندىرۋ – قازاقستان مۇسىلماندارى ءدىني باسقارماسىنىڭ نەگىزگى جۇمىس باعىتتارىنىڭ ءبىرى. بۇل – بارلىق مۇفتيدەن بەرى جالعاسىپ كەلە جاتقان اسىل مىندەت. ءمۇفتياتتىڭ ءدىني وڭالتۋعا جاۋاپتى ماماندارى وتكەن جىلى قوعامدىق ورىندار مەن تۇزەۋ مەكەمەلەرىندە 9928 جەكە ىقپال ەتۋ اكسيالارىن (جەكە كەزدەسۋلەر) جۇزەگە اسىردى. جۇمىس ناتيجەسىندە جالپى 1477 ادامعا وڭ ىقپال جاسالدى. اتاپ ايتقاندا، 773 ادام قازاقستاندىق قوعام قۇندىلىقتارىنا بەيىمدەلدى جانە 704 ادام دەسترۋكتيۆتى ءدىني اعىم يدەولوگياسىنان باس تارتتى